رواية الخفاش
البارت الرابع
للكاتب المصري محمد مالك
جميع الحقوق محفوظة
م56 ل/د
قاعة أفراح بفندق كبير
نري السبيتي واقفا ً على باب القاعة وبجواره المستشار عز النمكي والد اشرف العريس في أستقبال المعازيم .. يدخل الي القاعة السيد وزير الداخلية وحرمه وخلفهما طاقم الحراسة
السبيتي ( مرحبا به)
اهلا .. اهلا .. اهلا معالي الوزير..دا شرف كبير ان سيادتك
قبلت الدعوه وشرفتنا بالحضور
الوزير
دا كلام يا سيادة اللواء .. الشرف لينا احنا
السبيتي
الله يعزك يا فندم .. سيادة المستشار عز النمكي والد العريس
الوزير
اهلا .. اهلا .. الف مبروك
النمكي
الله يبارك في حضرتك
السبيتي
اتفضل يا معالي الوزير
ثم يدخل مروان ويسلم على السبيتي
مروان
الف .. الف مبروك يا فندم
السبيتي
الله يبارك فيك .. بعد اذنك يا معالي المستشار ..
بقلك ايه يا مروان
ويتحرك بعيدا عن النمكي
مروان
افندم سعتك
السبيتي
مفيش اخبار عن الولد اللي اسمه سيف
مروان
للأسف لسه يا فندم .. بس هيقع قريب سعتك
السبيتي
اهله مراقبه 24 ساعة .. هما الخيط اللي هيوصلكم ليه
مروان
حصل يا فندم .. اهله وتليفوناتهم تحت المراقبة
المستمرة .. دا حتي والده اتوفي من يومين
السبيتي
احسن اهو ارتاح منه ومن عاره
ثم نري السبيتي ينظر وهو يبتسم الي ابنته التي نراها ترقص مع العريس على اغنية رومانسية لعمرو دياب ولكن لا نري علي وجهها مظاهر السعادة .
م57 ل/د
منزل سيف
مريم وامها كلا ً منهما يجلس على مقعد نراهما بملابس سوداء ونسمع قران مجود للشيخ المنشاوي علامات الحزن والاسي تكسو وجوههما ثم يرن المحمول .. مريم تمسك التليفون والمتصل سيف . . نري التردد على وجهها ثم تقرر ان ترد وتتحدث باسلوب فظ وشديد
مريم
نعم .. عاوز ايه يا سيف؟
قطع وانتقال الي
سيف في حجرته بفيلا جابر نراه قد تعافي قليلا من اصابته
سيف
مش عايزة تردي ليه يا مريم؟
قطع وعودة الي
مريم
بتتصل بينا ليه تاني ياسيف ؟ مش كفايه اللي عملته في نفسك وفينا.
. عايز مننا ايه تاني؟
قطع وانتقال الي
سيف
فيه ايه يا مريم ؟ انا عايز اطمن عليكم
قطع وعودة الي
مريم (بسخريه)
تطمن علينا .. لا فيك الخير بجد .. انت لو يهمك
امرنا مكنتش عملت فينا كدا
قطع وانتقال الي
سيف
لو سمحتي يا مريم .. اديني بابا او ماما
مريم (باسي وحزن)
بابا !! بابا مات يا سيف
قطع وعودة الي
رد فعل على وجه سيف
سيف(متفاجأ)
مات .. مات ازاي؟!!
قطع وعودة
مريم
مات من حزنه واهرته على نفسه وعلينا وعليك ..
انت دمرتنا يا سيف .. ارجوك سيبنا في حالنا ..
متتصلش بينا لو سمحت (ثم تغلق الخط)
مريم تبكي بشدة ثم تحضن امها التي سارعت هي ايضا بالبكاء ورد فعل على وجه سيف الذي يرمي بشدة المحمول على الارض من شدة الغضب
م 58 ل/د
كازينو السلطان
الصالة مكتظة بالزبائن .. مقدم البرامج على خشبة مسرح المنوعات يقدم فيروز للغناء التي ستشاركها بالرقص الراقصه ميمي ..ونري صدام ريختر على البار ونادر يجهز طلبات الزبائن
مقدم البرامج
والان مع الراقصة الفاتنه ميمي التي ستمتعنا بوصلة من
الرقص الشرقي وستشاركها بالغناء الفنانة المبدعة
التي طال انتظاركم لها .... الفنانة فيروز
نسمع ونري تثقيف حاد من الجميع وهنا تغني فيروز اغنيه شعبية وطوال الاغنية ينظر اليها ريختر بنظرات شوق وحنين ونراه كلما فرغ كأسه يشي لناردر ليصب له اخر حتي يصبح سكران .. ونادر يتظر اليه في تعجب
م60 ل/د
كازينو السلطان
فيروز بحجرتها تبدل ملابسها .. نسمع طرق الباب والطارق صدام الذي نراه في حالة من السكر
فيروز
ادخل
صدام يدخل ورد فعل على وجه فيروز عندما تراه .. صدام يقترب من فيروز
صدام
ازيك يا فيروز؟
فيروز
كويسة .. اامر
صدام
كنتي مختفيه فين اليومين اللي فاتوا؟ ومبترديش على تليفونك ليه؟
فيروز (بقرف)
كنت مطرح ما كنت وانت مالك؟ّ!
صدام
مالي ازاي !.. مش لازم اعرف خط سيرك ايه
فيروز
نعم ياخويا .. ليه كنت ولي امري وانا معرفش
صدام
يا بت انا بحبك وكنت قلقان عليكي
فيروز
لا متقلقش ياخويا انا بخير
صدام
طب كنتي بتعملي ايه عند مستر جابر في الفيلا؟
فيروز
بعمل اللي بعمله وانت مال اهلك .. وانفضل بقي وريني عرض
كتافك عايزه اغير هدومي
صدام
بقي كدا .. ماشي يا فيروز
صدام ينصرف ورد فعل على وجه فيروز ونسمعها تقول .. أف
م61 ل/د
فيلا جابر
نري سيف داخل غرفته يبكي حزنا على والده .. ثم يمسح دموعه ويمسك بالمحمول ويطلب فيروز .. نسمع صوت جرس المحمول .. ثم ترد فيروز نسمع صوتها ولكن لا نراها.
سيف (بنبرة حزن)
ايوه يا فيروز .. انتي فين ؟
فيروز
انا في الكازينو .. لسة مخلصة نمرتي حالا
سيف
ممكن تجيني دلوقتي ؟
فيروز
من عنيا حاضر .. انت كويس ؟
سيف
انا كويس .. بس محتاج اقعد مع حد
فيروز
مسافة السكة اكون عندك .. سلام
م62 ل/د
فيلا جابر سلطان
نري سيف وفيروز داخل حجرته بالفيلا .. فيروز تريد معرفة ما يضايق سيف .. سيف يتردد في اخبارها بالحقيقة ولكنه سيخبرها لأنه يثق بها
فيروز
مالك يا سيف ايه اللي تعبك ؟ تسمحلي اقلك سيف حاف؟
سيف يومئ بمعني انه موافق
فيروز(بمداعبه)
قلي بقي احكيلي .. كلي اذان صاغية
سيف متردد ثم يتنهد ويقف ويسير باتجاه شباك الحجره ويعطي ظهره للكاميرا
فيروز(تكمل حديثها)
عارف.. انا من اول مره شفتك فيها وانا حاسة انك
ابن ناس ..بس وراك حكاية .. وحكاية كبيره كمان
سيف يدير وجهه مره اخري الي الكاميرا .. ثم يعود واقفا امام فيروز
سيف ( بحزن وبكاء )
فيروز انا تعبان .. تعبان اوي
فيروز(متأثره وتمسك بكلتا يديه ثم تقف امامه)
سيف .. انت بتعيط ؟! .. اقعد احكيلي
سيف ينظر اليها خائفا مترددا في اخبارها بالحقيقة .. فيروز تدرك ذلك
فيروز
متخفش .. طلع اللي جواك عشان ترتاح
م63 ن/د
فيلا السبيتي
سالي في غرفة نومها بعد أن أصر السبيتي أن تقيم معه بعد زواجها حيث نراها تجلس على كرسي تقلب في البوم صور تجمعها هي واخيها وسيف وتسترجع ذكرياتها والدموع في عينيها ونسمع اغنية لازم اعيش لشيرين .. يدخل زوجها اشرف النمكي يتعجب عند سماع الاغنية ويجلس بجوارها
اشرف (بمداعبة)
القمر بتاعنا مش ناوي يفطر ولا ايه ؟
سالي(برقة)
اديني نازلة
اشرف
يلا باباكي مستنينا تحت .. وبعدين ايه الاغنية دي؟!
بذمتك يا شيخه دي اغنية تسمعيها في شهر العسل!!
سالي
انا اسفة
اشرف
لا يا حبيبتي متتأسفيش .. انا بهزر معاكي..بصي ..
عاوزك تفهمي اني هحاول اسعدك بكل ما املك
وهبقي كل حاجة في حياتك .. بس اديني فرصة
اني اثبتلك ده .. اتفقنا؟
سالي
اتفقنا
اشرف
طب يلا نفطر؟
سالي تومئ برأسها بمعني يلا
م64 ن/د
منزل سيف
مريم في غرفتها ترتدي ملابس سوداء تأخذ كشكول المحاضرات من على مكتبها ثم تأخذ البالطو تخرج من غرفتها ثم تتوجه نحو امها بالمطبخ والتي نراها تقوم بتحضير طعام الافطارلابنتها حيث يبدوا لنا انها تقوم بتقشير بيض مسلوق
مريم
صباح الخير يا ماما
الام (متعجبه)
صباح الخير يا بنتي .. ايه ده انتي ماشية ولا ايه؟!
مريم
اه عشان عندي عملي انهاردة وبعدين انتي عرفه
المواصلات وقرفها
الام
طب انا حضرتلك الفطار اهوه .. افطري وانزلي
مريم
معلش افطري انتي بقي .. هنتغدي سوا
الام
لا احتمال ترجعي متلاقنيش
مريم
ليه رايحه فين
الام
ما انا قلتلك يا بنتي رايحه اشوف طنطك جمالات
نشوفلي شغلانه نعيش منها
مريم
انتي مصممة برضوا على الموضوع الشغل ده
الام
امال هنعيش ازاي يا بنتي .. اديكي شايفه ابوكي مات
ومسابلاناش جنيه واحد ولا حتي معاش نعيش منه ..
واخوكي ربنا يلطف بيه
مريم
انا اللي هشتغل يا ماما
الام
لا يابنتي .. انتي تخليكي في دراستك وبس .. معادليش
غيرك وعاوزاكي تفرحيني بشهادتك .. وطول ما انا عايشه
انتي ملزومه مني .. روحي يا بنتي
على كليتك عشان متتأخريش
مريم
سلام يا ماما (ثم تقبلها)
الام
مع السلامة يا حبيبتي
مريم تنصرف ورد فعل على وجه الام
م 65 ن/د
فيلا جابرسلطان
فيروز تفتح باب غرفة سيف ونراه نائما ثم تفتح شباك الغرفة للتهوية وتقترب من سيف وتوقظه بكل رفق
فيروز
سيف .. سيف
سيف (منزعجا)
اه .. مين
فيروز
انا فيروز.. متخفش
سيف
صباح الخير
فيروز
صباح النور
سيف
هي الساعة بقت كام؟
فيروز
احنا بقينا الضهر
سيف
ياه .. ده انا نمت كتير
فيروز(بمداعبه)
عشان لما طلعت الهم اللي جواك .. ارتحت فنمت
.. عشان تصدقني بس
سيف
مش هتصدقي لو قلتلك اني اول مره انام مش كام شهر فاتوا
فيروز
معلش .. قوم بقي عشان تفطر معانا انا ومنستر جابر
سيف (متعجبا )
مستر جابر!!
فيروز
اه عايز يفطر معاك وبالمره يدردش معاك شوية
سيف
ماشي
م66 ن/د
فيلا جابر
سيف وجابر في حجرة المكتب .. نري جابر علي مكتبه وأمامه سيف يتناول فنجان من القهوه .. جابر بأسلوب انتهازي يفاجأ سيف بأنه يعلم حقيقته ويطلب منه العمل معه وان يخلصه من وزير سابق كان جابر يعمل مع في السابق ويعلم كل شئ عن جابر وحاليا يقوم بتهديده وابتزازه
جابر
تصدق اني فرحان اوي انك خفيت وقمت بالسلامة
سيف
الفضل يرجع ليك .. انا بشكرك
جابر
بالعكس ده المفروض انا اللي ممنون ليك بعد اللي
عملته معايا .. الا بالحق انت ليه عملت كدا وخاطرت
بحياتك مع انك متعرفنيش؟!
سيف (يبتسم)
بصراحه .. مش عارف
جابر(يضحك)
بس انا عارف (سيفا متعجبا) .. عشان ليك نصيب تقابل
جابر سلطان اللي ممكن يكون سبب سعادتك ونجاتك
سيف(متعجبا )
مش فاهم؟!
جابر
اسمع يا سيف .. ولا تحب اقلك يا سيادة النقيب؟
رد فعل على وجه سيف
جابر
متستغربش اني عرفت عنك كل حاجة .. واظن يعني مش
صعب ان اعرف عنك كل حاجة وخصوصا اني حكايتك
وصورك في كل الجرايد وعلى كل مواقع السوشيال ميديا..
سيف
وبعدين؟
جابر
ولا قابلين .. بص يا سيف انت انقذتني من الموت مره ..
لكن انا في ايدي اضمنلك حياتك طول العمر ومحدش هيعرف يوصلك ابدا
سيف
برضوا مش فاهم؟
جابر
انت هتشتغل معايا
سيف ( متعجبا)
هشتغل معاك ايه؟ انا منفعش اظهر قدام الناس؟
جابر
وانا محبش غير شغل الضلمه .. واذا بليتم فأستتروا
سيف
هات من الاخر
جابر
بص يا سيف انا عرفت انك قناص محترف وبالاماره
ملقبينك بالفرعون القناص.. وبصراحة قاصدك في خدمة
سيف
ايه هي ؟!
جابر
عاوزك تخلصني من وزير سابق قارفني في عيشتي .. مكفر سيئات امي
سيف
بس انا مش قاتل يا استاذ جابر
جابر (بسخرية)
ياراجل .. طب قول حاجة غير دي .. سيف انت
مقدامكش غير طريقين .. انك تقبل تشتغل معايا
في مقابل اني اضمنلك حياتك دا غير الفلوس الكتير
اللي هتعملها طبعا وبعد كدا تسافر بلد تانية
وتبدأ حياه جديده .. او تقبل بطبلية عشماوي..
وبعدين ضربوا الاعور على عينه قالك ايه ...؟ فكر وقرر
رد فعل على وجه سيف
م67 ن/د
مدرج كلية الطب
مريم داخل المدرج لأستماع احدي المحاضرات تجلس بجوارها صديقتها ريم .. نري حنان في المدرج الخلفي تنظر الي مريم نظرات كلها غل ومكر نستشعر منها انها تدبر لها مكيدة .. وهي بالفعل قامت بذلك فقد أخفت انسيالها الالماظ داخل شنطة مريم وادعت انها انسيالها تمت سرقته واتفقت مع احدي صديقاتها بأن تشهد بأن مريم هي من فعلت ذلك
حنان (تحدث ضجة)
ايه ده .. انسيالي الالماظ فين ؟
مريم وريم ينظران اليها بتعجب
حنان
لو سمحت يا دكتور
الدكتور
في ايه يا حنان؟
حنان
الانسيال الالماظ الحر بتاعي كان على
المدرج قدامي ومش لاقياه؟
الدكتور
شوفيه وقع تحت رجلك
حنان
دورت ..مش موجود
احدي الطالبات
لو سمحت يا دكتور أنا شفت مريم ماسكاه وبتتفرج عليه
وبعد كدا قامت حطاه في شنطتها
مريم ( متعجبه)
انا !!
الدكتور يقترب من مريم ويأمرها بفتح شنطتها
مريم ( مرتبكة)
صدقني يا دكتور محصلش ..
الدكتور يفتح شنطة مريم ويخرج الانسيال ويقول ل حنان
حنان
اه هوده .. لو سمحت يا دكتور اطلب الامن بسرعة .. البنت دي حراميه
رد فعل على وجه مريم وريم
م68 ل/د
عيادة أستشاري قلب
الوزير السابق امام باب العيادة وخلفه اربعة من البودي جاردات .. نري لافته بجانب الباب من الخارج مكتوب عليها د / عبد العظيم كامل استشاري جراحة القلب والاوعية الدموية ويبدوا انه من مشاهير الاطباء في مصر .. العيادة مكتظة بالزبائن .. اثنان من البودي جاردات ينتظران بالخارج بجوار الباب واثنان يتبعانه .. الممرضة تقف فورا عندما تري الوزير .. ثم تفتح له باب عيادة الطبيب
الوزير السابق
الدكتور موجود؟
الممرضه
في انتظارك يا فندم اتفضل
الوزير يتقدم الي داخل الغرفة ويشير للبودي جاردات بالانتظار بالخارج .. نري الطبيب يقف مرحبا به
الطبيب
اهلا .. اهلا معالي الوزير
الوزير السابق
اهلا يا دكتور
الطبيب
اتفضل اقعد يا معالي الوزير
الوزير السابق
بستأذنك ان حضرتك تكشف عليا بسرعة
عشان مرتبط بمواعيد مهمه
الطبيب
تحت امرك يا فندم .. اتفضل حضرتك نعمل رسم قلب الاول
الوزير يخلع الجاكت ويفك زراير القميص .. نري فلنته مليئة بالعرق .. الطبيب يلاحظ ذلك
الطبيب (متعجبا)
يا ه انت حضرتك عرقان اوي!!
الوزير (معللا)
انت عارف يا دكتور مبستحملش الحر
الطبيب يقوم بتوصيل كابلات الجهاز بصدر الوزير
الطبيب
لا واليومين دول الرطوبه عالية جدا .. ايه الاخبارسعتك؟
الوزير
والله بحس بنغزات بسيطه كدا
الطبيب
لا لا .. متقلقش .. شئ طبيعي بعد الاستره .. وهنعمل
رسم القلب وهنطمن ان شاء الله وفجأة ينقطع التيار
الكهربائي بالغرفه وينير كشاف الطوارئ
الطبيب
ايه البواخه دي .. معلش يا فندم دقيقتين والمولد يشتغل
.. افتح لحضرتك الشباك يجيب تيار لحد ما يجي النور
الطبيب يفتح الشباك ونري شبابيك مغلقة لمنزل مجاور
الطبيب
ايه اخبار سعتك والاولاد ؟
الوزير
اسكت يا دكتور .. مطلعين عيني .. وخصوصا الولد
الصغير اللي في الجامعة الاميريكية
الطبيب
مين سمعك يا معالي الوزير .. تصدق ابني حكم عليا ..
(النور يأتي) اهو النور جه (يقوم بتشغيل الجهاز) نشغل ده بقي
.. (الطبيب يتوجه ناحية المكتب باحثا عن القطن ويعطي ظهره للوزير)
كنا بنقول ايه؟ .. اه الولد عشان مسافرش بره يصيف
السنه دي .. خلاني غيرتله العربيه ب500 الف جنيه
.. بيعاقبني قال .. شفت الولد ؟!
نري خروج شريط رسم القلب من الجهاز .. الطبيب يمسك بالشريط ليقرأه .. رد فعل على وجه الطبيب عندما يجد ان بداية الشريط النبض منتظم ثم توقف تماما
الطبيب
ايه ده ؟!! معالي الوزير ..
(يدير رأس الوزير ناحية الكاميرا فنري ثقب لطلقة بالرأس تخرج منه الدماء .. الطبيب ينظر من الشباك المفتوح فنري احد الشبابيك بالمنزل المقابل مفتوح بعد ان كان الجميع مغلق .. ورد فعل على وجه الطبيب)
م69 ل/د
فيلا جابر
سيف وجابر داخل غرفة المكتب
جابر(بفرح شديد)
ايه الدماغ العالية دي !! عفارم عليك يا بطل .. وتستحق دول
يفتح شنطة بها فلوس .. سيف ينظر اليها في تعجب
سيف
ايه ده؟
جابر
دول نص مليون جنيه .. عرقك
سيف(متعجبا)
نص مليون جنيه؟!! للدرجه كان مضايقك؟
جابر
دا كان كابوس بعيد عنك .. بس انزاح خلاص
سيف
تمام .. اتشاهد بقي
جابر(يضحك)
هاهاها .. حلوه دي يا نجم .. اه ايه رأيك؟
سيف
رايي في ايه؟
جابر
في الشغل معايا
سيف
لو على كدا يبقي ممتاز
جابر
ولسة اللي جاي احلي.. اوعدك
سيف
المشكلة دلوقتي .. عاوز مكان امين استخبي فيه
جابر(بنبره تهديد)
متقلقش عامل حساب كل حاجة .. عشان تعرف ان جابر
اصيل اوي مع رجالته.. وواطي اوي مع قليل الاصل
رد فعل على وجه سيف
يتبع ......
جميله
ردحذفممتعه ومشوقه حضرتك محترف
ردحذفجميله جدا تسلم ايدك بس ياريت تطول البارت شويه وتنزل كل يوم
ردحذفجميله جدا تسلم ايدك بس ياريت تطول البارت شويه وتنزل كل يوم
ردحذفجميله جدا تسلم ايدك بس ياريت تطول البارت شويه وتنزل كل يوم
ردحذفجميله جدا تسلم ايدك بس ياريت تطول البارت شويه وتنزل كل يوم
ردحذف