رواية الخفاش
البارت الاول
للكاتب المصري محمد مالك
جميع الحقوق محفوظة
أفان تتر ا ن/خ
في الشارع
سيف الاسلام يستقل ميكروباص شرطة وخلفة سيارة لنقل المجندين ومعه زميليه ايهاب السبيتي ومروان البنهاوي وخبير للمرفقعات في طريقها لأداء مهمة القبض على أحد التكيفريين الذي أحتمي داخل مدرسة خاصة ابتدائي وتاتيه تعليمات من القيادة على اللاسلكي.
القيادة
التكفيري احتمي جوة مدرسة النصر الابتدائية
وبيحتجز مجموعة من التلاميذ وبيهدد بتفجير نفسه وسطهم
التعامل مع الهدف بكل حرص وبدون خسائر في الارواح
سيف
علم وجاري التنفيذ يا فندم
القائد
ربنا معاكم
سيف (للسائق)
شد حيلك شوية يا ناصر
ناصر
حاضر يا فندم
افان تتر 2 ن/خ
مدرسة السلام الابتدائية الخاصة
تصل سيارة الشرطة التي يستقلها سيف وزملاءه الي المدرسة ونلاحظ تجمع من الناس بمحيط المدرسة وداخلها وحالة من الهرج الشديد .. ينزل سيف وزملاءه وخبير المرفقعات مسرعا ً متوجها ً داخل المدرسة ويقابل أحد الضباط الكبار برتبة لواء ويعطي له التحيه.
سيف
تمام يا فندم .. ملازم أول سيف الاسلام ادارة
مكافحة الارهاب ودول زمايلي
اللواء
اهلاً سيف .. الراجل اللي جوة ده من أخطر التكفيرين
ولابس حزام ناسف ومحتجز مجموعة من التلاميذ معاه وبيهدد
بتفجير نفسه لو مجبنالوش طياره تسفره افغانستان بعد نص ساعة
سيف
تمام يافندم .. ان شاء الله هيتم التعامل مع الهدف بدون خسائر
في الارواح
اللواء
مساعد الوزير بيقلي أنكم أفضل مجموعة ممكن تتعامل
مع ارهاب من النوع ده
ايهاب
هنكون عند حسن ظنك يا فندم
اللواء
ربنا معاكم يا بني
سيف والمجموعة يعطون التحية العسكرية للواء
مروان (للعساكر)
انت يابني .. الناس دي كلها تطلع بره مش عاوز
حد هنا خالص
وتعترض طريق سيف احدي الامهات في حالة من الاعياء والبكاء الشديد ويبدوا لنا أنها سيدة مسيحية ابنتها مريضة القلب يحتجزها التكفيري دتخل احدي الفصول.
السيدة
ابوس ايدك يابني .. بنتي جوة وعندها القلب ..
ان مقتلهاش هتموت من الخضه ابوس ايدك معنديش غيرها ..
مش عايزتها تموت .. ارجوك خرجهالي
سيف
متقلقيش يا فندم .. بنتك هتخرج سليمة وهتروح معاكي ان شاء الله
السيدة ( بترجي وامل)
يارب
يتوجه سيف ورفاقه ناحية الفصل الذي يحتمي فيه التكفيري ويحتجز معه مجموعة من التلاميذ ويبدوا لنا ان الاطفال في حالة شديدة من البكاء والصراخ ومعهم مدرسة ويراهم التكفيري فيوجه نسدسه نحوهم .
التكفيري
اللي هيقرب خظوه كمان هفجر الحزام.. ارجع ورا انت وهو
سيف يومئ لرفاقه للعودة للخلف
ايهاب
اللي انت بتعمله ده ممنوش فايدة .. احسنلك تسلم نفسك
التكفيري (غاضبا ً)
مش هسلم نفسي .. وان مجتش طياره خدتني خلال نص ساعة
هفجر نفسي وهفجرهم معايا
مروان
الاطفال دي ملهاش ذنب .. سيب الاطفال تخرج حالا
التكفيري
مش هسيب حد يخرج ومضيعوش وقتكم معايا
سيف
تمام .. الطيارة جاية في الطريق
سيف يرجع الي الوراء ويشاور لزملاءه بمراقبة الموقف .. وينظر يمينا ً ويسارا ً باحثا ً عن مكان يستطيع منه أقتناص التكفيري حتي يجد مبني تحت الانشاء مقابل للمدرسة فيتوجه اليه مسرعا ً فيجد الباب الحديدي مغلقا ً فيعتلي السقالة الخشبية حتي يصل الي مكان يواجه أحد شبابيك الفصل الذي يحتمي به التكفيري ويظهر لنا التكفيري بجانبه الايمن وهو في غاية الغضب ويلوح بيده ويشخط في التلاميذ .. سيف يوجه بندقيته نحو التكفيري ويحبس انفاسة ويستعد لأطلاق النار فتخرج رصاصته وتكسر زجاج الفصل وتستقر في رأس التكفيري ويظهر لنا التكفيري وقد سقط على الارض ويطلب ايهاب من التلاميذ بسرعة الخروج ونري خبير المفرقعات يتوجه نحو التكفيري لابطال مفعول الحزام الناسف ثم نري رد فعل على وجه سيف قائلا ً
سيف
اديك سافرت اهوه .. بس لجهنم
تترات البداية
م3 ن/د
نادي ضباط الشرطة
حفلة وزارة الداخلية لتكريم سيف ومجموعته نظرا ً لما ابلوه من بلاءً حسنا ً وشجاعة باسلة في التعامل مع التكفيري حيث سيتم اهداءهم نوط الشجاعة وترقيتهم الي رتبة نقيب في وسط جمع من الاهالي والاصدقاء.
المتحدث على المنصة
أولا ً :ـ منح الملازم أول ايهاب عبد الرحمن السبيتي
نوط الشجاعة وترقيته الي رتبة نقيب
يتقدم ايهاب وسط تثقيف حار من الجميع الي المنصة ويعطي التحية العسكرية حيث يتسلم النوط من السيد اللواء مساعد وزير الداخلية والذي يقوم بنزع شارة ملازم أول وتركيب شارة نقيب.
المتحدث على المنصة
ثانيا ً :ـ منح الملازم أول مروان أشرف البنهاوي
نوط الشجاعة وترقيته الي رتبة نقيب
يتقدم مروان وسط تثقيف حار من الجميع الي المنصة ويعطي التحية العسكرية حيث يتسلم النوط من السيد اللواء مساعد وزير الداخلية والذي يقوم بنزع شارة ملازم أول وتركيب شارة نقيب.
المتحدث على المنصة
ثالثا ً :ـ منح الملازم أول سيف الاسلام محمد حماد
نوط الشجاعة وترقيته الي رتبة نقيب
يتقدم سيف وسط تثقيف حار من الجميع الي المنصة ويعطي التحية العسكرية حيث يتسلم النوط من السيد اللواء مساعد وزير الداخلية والذي يقوم بنزع شارة ملازم أول وتركيب شارة نقيب.
قطع على وجه والد سيف ووالدته وتثقيف حار منهما.
رد فعل على وجه سيف.
م4 ل/د
منزل سيف
سيف في غرفة نومه يقوم بارتداء ملابس الخروج متوجها ً الي منزل صديقه ايهاب .. نسمع طرق لباب الغرفة ..
سيف
ادخل
تظهر لنا والدة سيف امراءة خمسينية تبدوا على وجهها تغيرات الزمن والام الطيبة الحنون ااقدم نحو سيف في فرح .
الام
بسم الله ما شاء الله .. قمر يابني
سيف يلتفت لأمه مبتسماً
سيف
انا اللي قمر برضه!! دا انتي قمر اربعتاشر يا ست الكل
الام
والله وجه اليوم اللي شفتك فيه ظابط اد الدنيا يا سيف
سيف (مقبلا يد امه)
ده بفضل دعواتك ليا يا ست الكل
فجأة يدخل الاب معلقا ً.. رجل خمسيني يحب سيف جدا ً ويخاف عليه
الاب ( ممازحا ً )
ماما بس اللي ليها فضل عليك ..
وابوك ملهش أي فضل عليك خالص؟!!
سيف متوجها ً نحو ابيه مقبلا ً يداه
سيف
ازاي بقي ! أما انت الخير والبركة يا حج ..
هو انا ليا حد غيركم في الدنيا .. ولولاكم مكنش
في حاجة اسمها سيف أصلا ً
الاب
ربنا يحافظ عليك يابني ويكفيك شر الوحش
سيف
تعيش يا حج
الام
علي فين العزم يابني؟
سيف
أبدا ً رايح لايهاب نحتفل مع بعض بالترقية الجديدة
الام
قلي يا سيف مش ناوي تتجوز بقي؟
سيف
قريب جدا ً يا ست الكل
الام (بتعجب)
شكلك يا واد حاطط عنيك على حد ؟
سيف
بصراحة .. اه
الاب
مين دي يابني؟ واحدة نعرفها ؟
سيف
قريب جدا ً هتعرفوا مين هي عشان تروحوا تخطبوهالي
.. بعد أذنكم بقي عشان أنا أتأخرت
سيف متوجها ً نحو باب الغرفة ورد فعل على وجه الاب والام
الام
روح يابني .. ربنا يرزقك ببنت الحلال
ويكتبلك في كل خطوة سلامة
م5 ل/د
فيلا السبيتي
سيف أمام باب الفيلا الخارجي ونري لافته مكتوب عليها فيلا اللواء عبد الرحمن السبيتي ويفتح له عم صالح الغفير رجل ستيني أو سبعيني يتحدث بلهجة صعيدية
سيف
ازيك يا عم صالح؟
صالح
نحمدوه يا سعت الباشا
سيف
ايهاب بي فوق طبعا
صالح
ايوه يا سيف باشا فوق
يسير سيف داخل حديقة الفيلا متوجها ً الي الباب الداخلي حيث نري مدي اتساع الحديقة وامتلأها بالاشجار والورود ونري أيضا ً حمام سباحة في وسط الفيلا وتظهر لنا صورة للفيلا من الخارج
م6 ل/د
فيلا السبيتي
يُفتح باب الفيلا من الداخل بواسطة أحدي الشغالات ويدخل سيف ويسأل الخادمة
سيف
ايهاب بي فين؟
الخادمة
في أوضته يا فندم .. مستني سعتك أتفضل
سيف
شكرا ً
يتوجه سيف ناحية السلم الداخلي وأثناء صعودة نري سالي السبيتي فتاه عشرينية جميلة خريجة الجامعة الامريكية وتعمل مضيفة باحدي شركات الطيران ويبدوا انها تتحدث الي احدي صديقاتها بالموبيل وتنزل مسرعة فتري سيف يصعد بجوارها.
سالي
ايوه يا بنتي .. اديني جاية اهوه .. انتي دايما ً متصربعة كدا ؟!!
طب اقفلي دلوقتي يا سهام هكلمك تاني .. سيف
سيف ملتفتا اليها
سيف
نعم
سالي (بتعجب شديد)
ايه .. طالع يعني ولا كأني معدية من جمبك؟!
سيف (مرتبك)
لااا .. اااا .. اصلي شايفك مشغولة بالموبيل
سالي (بتعجب)
اه .. طيب .. أولا ً مبروك ع الترقية
سيف
الله يبارك فيكي
سالي
ثانيا :ـ انت مش بترد ليه ع الموبيل
سيف
معلهش .. كنت مشغول جدا اليومين اللي فاتوا
سالي
طب وظروفك ايه دلوقتي ؟
سيف
مش فاهم؟
سالي
عايزة اقعد معاك في حاجة مهمة لازم نتكلم فيها
سيف
حاضر يا سالي
سالي
بكرة يا سيف
سيف
حاضر
ثم يظهر لنا ايهاب ويتحدث بسخرية
ايهاب
يعني انت لاطع امي فوق وواقف ترغي مع سالي ع السلم!!
سالي
انا كنت بباركلة ع الترقيه
ايهاب
طب يا ستي باركتيله خلاص ؟ منجلكيش في حاجة وحشة
.. اطلع يا عم واخلص
سالي
سيف اوعي تشرب سجاير ..او اي حاجة وحشة من اللي بيشربها ايهاب
سيف ( يبتسم)
لا متخافيش
ايهاب
يا ستي خليكي في حالك .. يلا اتكلي علي الله
سالي
باي
سيف (يمعن اليها النظربحب)
باي
ايهاب
باي يا حبيبتي
يلاحظ ايهاب ترقب نظرات سيف لسالي اثناء نزولها
ايهاب (بسخرية)
اطلع يا عم سيف ولا عجباك الوقفه ع السلم؟!
سيف (بخجل)
اااا ..احم .. انا طالع أهو
م7 ن/خ
كازينو على النيل
تجلس سالي وسيف داخل كازينو على النيل حيث نري منظر نهر النيل ويبدوا عليهما القلق والحيرة
سيف
خير يا سالي ؟ كنتي عايزة تكلميني في ايه؟
سالي
سيف انا جايلي عريس وهيقعد مع بابا الاسبوع الجاي
سيف(منصدما)
عريس؟! مين ده ؟
وكيل نيابة .. باباه كان رئيس محكمة وصديق لبابا
ومن عيلة غنية اوي في الصعيد
سيف (بتهكم)
اه .. من عيلة غنية! .. طيب وانتي ايه رأيك؟
سالي ( بتعجب)
نعم ؟!! هو انا بقلك كدا عشان تقلي أيه رأيك؟!!
سيف
أصلك بتقولي وكيل نيابه ومن عيلة غنية .. يعني عريس لقطة
سالي (بحزن)
سيف ارجوك مش وقت هزار .. انت لازم تتقدملي قبل العريس ده ما يقابل بابا
سيف
اه .. وانتي شايفة اني لما اتقدملك باباكي هيوافق عليا علطول؟!
سالي ( بتعجب)
يعني أيه؟!.. سيف انت مش عاوز ترتبط بيا ؟!! انت مبتحبنيش صح؟!!
سيف ( يتنهد)
يعني ايه مبحبكيش ؟!! سالي انتي عرفة ومتأكده اني
مقدرش أعيش من غيرك .. لكن كل ما أفكر في المسافة اللي
بيني وبينك ببقي خايف جدا ً ان ممكن.....
سالي تقاطعه
سالي
سيف متكملش .. انا مقدرش اتصور اني أعيش من غيرك
سيف
في حواجز كتير بيني وبينك يا سالي
سالي
بحبنا هنكسر كل الحواجز .. (ثم تمسك بيده ) هتيجي
بكرة الحفلة اللي عاملها بابا ل ايهاب عشان الترقيه؟
سيف
أكيد طبعا ً
سالي ( برقة)
خلاص هستناك .. بس هتغني في الحفلة.. صح؟
سيف(يبتسم)
حاضر .. هغني
رد فعل على وجه سالي
م8 ل/د
منزل سيف
سيف في غرفته متكئا ً على السرير هائما ً في حبه ونسمع أغنية لعبد الحليم ويبدوا أنها أغنية نار ياحبيبي ونسمع طرق لباب الغرفة والطارق والدة سيف
سيف
ادخل
تدخل الام وتتوجه نحو سيف
الام
ايه يا حبيبي مش هتتعشي ؟
سيف
لا ماليش نفس يا ماما
تقترب الام من سيف وتجلس بجواره
الام
مالك يابني
سيف
ماليش ياماما انا كويس
الام
لا ! أنا مش عرفاك ولا ايه ؟! أنت اليومين دول
حالك مش عاجبني وبتسمع عبد الحليم كتير .. انت بتحب يا سيف؟
سيف ( متفاجأ)
اه...
الام
ايوه انت بتحب .. وانا لما كلمتك في موضوع الجواز
قلتلي ان في واحدة وهنخطبها قريب
سيف (يبتسم)
مبتنسيش حاجة ابدا يا امي
الام
ازاي انسي حاجة تخص ولادي حبايبي .. هو انا عايشة غير ليكم يابني!
سيف مقبلا يد امه
ربنا يخليكي لينا يا ست الكل .. فعلا ً أنا مرتبط بواحدة عاطفياً
الام
مين دي ياسيف؟
سيف
على فكرة انتي تعرفيها
الام (متعجبة)
اعرفها ؟!
سيف
ايوه .. سالي أخت ايهاب
الام ( منصدمة)
سالي أخت ايهاب زميلك .. ابن مدير الامن؟!
سيف
ايوه
الام
بس يابني دول ناس مستواهم عالي أوي واحنا
زي ما انت شايف على اد حالنا
سيف ينهض من علي السرير ويبدوا أنه غاضب
سيف
يعني ايه على اد حالنا ؟! انتي ناسية أن ابنك ظابط شرطة؟!!
الام
لا يابني مش القصد .. دا أنت سيد الناس كلها ..
بس دول ناس مناخيرهم فوق عايشين على اد فلوسهم
دا انت اللي بتحكيلي يابني عن العيشة الابهه اللي عايشنها
سيف
بس أنا وسالي بنحب بعض .. وعايزك انتي وبابا تروحوا تخطبوهالي
الام (بنبرة أسي وحزن)
ماشي يابني نروح نخطبهالك واللي فيه الخير يقدمه ربنا
م9 ل/د
فيلا السبيتي
يبدوا لنا حفل على مستوي عالي تحضره شخصيات مرموقه في شتي المجالات ونري سيف يتجول داخل حديقة الفيلا واخته مريم فتاه عشرينية في سنة اول طب تظهر لنا محجبه وترتدي فستان محتشم ..سيف يقابل اللواء السبيتي ويسلم عليه ثم يتوجه الي ايهاب ومروان
السبيتي
اهلا اهلا .. سيف .. ازيك يا ابني ؟
سيف
الحمد لله بخير يا فندم
السبيتي ينظر الي مريم وكأنه يراها لأول مره
سيف
مريم .. أختي
السبيتي
اه .. اه .. اهلا اهلا .. اتفضلوا خدوا راحتكم
سيف
بعد اذنك يا فندم
ايهاب يخبئ السيجارة خلف ظهره عندما رأي ابيه يمر بجواره
ايهاب
مشي الحمد لله
سيف
يخرب بيتك .. حشيش يا ايهاب؟!
ايهاب( بسخرية )
حشيش يا ايهاب !! محسسني اني بشرب كوكايين ولا هيروين .. يابني الحشيش ده بقي موضه قديمة .. وبعدين دي سيجاره تفاريح
سيف (متعجبا ً ثم ينظر لمروان ويراه يمسك كأس من الخمر)
اه .. والخمرة دي كمان تفاريح يا عم مروان!!
مروان
ولا انت جاي تعكنن علينا ولا ايه ؟!.. أمسك اشرب
سيف
لا ياحبيبي انا مليش في الحاجات دي
مروان
احسن برضه .. هتعيش طول عمرك صحتك تعبانه عشان مبتشربش
مريم تنظر اليهم في تعجب ويبدوا انها لا يعجبها قولهم ومروان يلاحظ نظراتها
مروان ( معلقا ً)
في حاجة يا انسة ؟! ولاا يا سيف مش أختك مريم دي؟
سيف ( متعجبا ً )
ايوه .. انت اول مرة تشوفها ولا ايه؟
مروان
ايه اللي عملاه في نفسك دا يا بنتي ؟! انتي جاية حفلة ولا جاية تصلي ؟
مريم ( بغضب )
ليه هي الحفلة ممنوعة ع المحترمين ولا ايه ؟!
ايهاب يحاول اصلاح الموقف ويضرب مروان بالكوع
ايهاب
متخديش في بالك يا انسة مريم .. مروان مفكر دمه خفيف وبيهزر
مريم
هزار بايخ
وفجأة نسمع سالي تتحدث في ميكروفون الدي جي وتقول:
سالي
مساء الخير عليكم جميعا ً .. بشكركم جميعا ً لتشريفكم
الحفلة الليلة ويسعدني أني أقدملكم مطرب هتسمعوه لأول مرة ..
بس دا مش مطرب عادي .. دا مطرب برتبة نقيب ..
معايا ومعاكم النقيب سيف الاسلام محمد
نري تثقيف حار من الجميع .. وهنا يغني سيف أغنية
م10 ن/خ
مديرية امن القاهرة
نري واجهة مديرية امن القاهره .. سيف ينزل من علي السلم متوجها ً الي الشارع ويبدوا ان تليفونه يرن والمتصل سالي والمشهد قطع وانتقال ثم قطع وعودة تبعا ً للحوار
سيف
الو
سالي
ايه بطلبك من الصبح مبتردش ليه؟!
سيف
يا بنتي في اجتماع مع مدير الامن
سالي
تيجي انت واهلك انهارده عشان تطلبني من بابا
سيف
اشمعني انهارده؟!
سالي
عشان العريس اللي قلتلك عليه هيجي بكره
سيف
انتي قلتي جاي الخميس!
سالي
لا .. اونكل فرويز اتصل ببابا وقاله انهم هيجوا بكرة
سيف
طب انا لسة ما فتحتش اخوكي في الموضوع .. واخوكي سافر فجأة
سالي
بابا صمم يروح مع عمتو امريكا عشان ميسبهاش وحدها وهي بتعمل عملية المرارة .. انت عارف ان عمته جوزها ميت ومعندهاش اولاد .. وبعدين بابا هو الاهم في الموضوع ده .. يلا يا سيف مفيش وقت
سيف
حاضر يا سالي
سالي
بحبك .. يلا باي
سيف
وانا كمان بحبك .. باي يا حبيبتي
رد فعل على وجه سيف
م11 ل/د
فيلا السبيتي
يجلس سيف وامه وابوه واخته مريم وامامهم اللواء السبيتي فقد جأوا ليطلبوا يد سالي للزواج ونري السبيتي ينتفض فجأة غاضبا ً ونشاهد سالي تراقب الموقف من على السلم.
السبيتي (بغضب شديد ويقف فجأة)
نعم .. أنت بتقول ايه يا راجل انت؟!
والد سيف (مرتبك)
اااا .. احم ... بقول سعتك ان احنا جايين نطلب ايد بنتك سالي لأبني سيف
السبيتي
انت عاوز تجوز بنتي لأبنك؟!
الام
على سنة الله ورسولة واحنا مستعدين لطلباتكم كلها
السبيتي (يضحك بسخرية)
مستعدين لطلباتنا !! اه .. قلي يا حج انت بتشتغل ايه؟
والد سيف
انا باش تمرجي في مستشفي كبير
السبيتي
وياتري عارف انا كنت بشتغل ايه ؟ ولا ابنك مقالكش؟!
والد سيف
سعتك غني عن التعريف .. مدير امن...
السبيتي ( مقاطعا له)
مدير امن .. وباش تمرجي مش شايف انها متركبش ؟!
سيف ووالدية يتبادلان نظرات التعجب ويبدوا انهما
قد عرفوا ان طلبهم مرفوض
السبيتي
انت عارف بنتي بتضيع اد ايه في الشهر ؟! اد مرتبك انت
وابنك في سنة ! ياتري يا سيف هتقدر تعيش بنتي
في المستوي اللي هي عايشة فيه ؟!
سيف
يا فندم انا بحب سالي ...
السبيتي (مقاطعا ً)
بلاش كلمة بحب دي .. كلمة ملهاش قيمه قصاد واقع بنعيشه ..
لأنها مش هتقدر تغيرلها العربية بتاعتها كل سنة أو
تسافر تصيف في اوروبا اوتخليها تعمل تشيك اب
على صحتها في باريس .. او علي الاقل تجيبلها هدومها
واكلها من احسن محلات في البلد .. اسمع يا ابني ..
مش معني انك صديق مقرب لايهاب دا يديك الحق
انك تطمع في اخته .. خليك واقعي واحلامك
دايما ً تبقي على ادك .. اتفضلوا الزيارة انتهت
رد فعل على وجه سيف ووالديه ونري سالي وقد أصيبت بالذهول من رد فعل الاب ونراها تبكي وهي تصعد السلم.
م12 ل/ د
منزل سيف
سيف في غرفته جالسا ً على سريره منطوي على نفسه وقد بدا عليه الحزن والاكتئاب لا يكلم أحدا ً يرفض تناول الطعام نري على مكتبه صينية طعام كما هي ثم يطرق والده باب الغرفه ويدخل فيجد سيف في حالة سيئة ناظرا الي الامام شارد الذهن ونري تليفونه المحمول بجواره على وضع هزاز يرن ويبدوا أن المتصل سالي .. الاب يقترب من سيف وينظر الي الطعام فيجده كما هو ثم يجلس بالقرب من سيف ويلاحظ أن المحمول يرن فينظر في الشاشة فيجد المتصل سالي
الاب ( بغاية الاسي والحزن )
اسمع يا سيف يابني .. كل انسان معرض في حياته لصدمات ..
بس الانسان الذكي اللي يقدر يتجاوز محنته وميخليش الصدمه تئثر
عليه وعلي حياته .. بالعكس يخلق من الصدمه دافع يخليه انسان
ايجابي اقوي وافضل من قبلها .. انا عارف انك حزين ومضايق ..
بس صدقني لو حسبتها كويس هتلاقي نفسك كسبان مش خسران ..
بس فكر بعقلك مش بقلبك .. انت لسة قدامك مستقبل كبير
وياما هتحب وهتتحب .. انت لما طلبتنا نيجي معاك عشان نخبطلك ..
انا متكلمتش مع اني عارف ومتأكد انك هتترفض عارف ليه ؟
( سيف ينظر لوالده وكأنه يريد معرفة الاجابة )
عشان متفكرش ولو لثانيه اننا وقفنا في طريق سعادتك ..
احنا عملنا اللي علينا وانت كمان عملت الصح ودخلت البيت من بابه ..
بس مافيش نصيب .. يبقي لازم تنسي وتعيش حياتك ..
فكر في اللي جاي يا سيف
( ثم يربط على كتفه ويذهب ونري موبيل سيف ما زال يرن ونسمع صوت الهزاز)
م13 ل/د
فيلا السبيتي
سالي واخيها وابيها في مواجهة ساخنة وحادة بسبب رفضها للعريس .. نري الاب والابن جالسين يبدوا عليهم الغضب.. الاب يشرب السيجار وسالي واقفة امامهم ويبدوا عليها الحيرة والقلق .
السبيتي (بغضب)
يعني ايه مش عايزة تتجوزي ؟! ..
هتفضلي كدا يعني من غير جواز؟!
سالي
انا مقلتش اني هفضل كدا .. بس مبفكرش في
الجواز دلوقتي
السبيتي
امال هتفكري امتي يعني ؟ .. بعد ما تعجزي !! ..
انا شايف انك وصلتي للسن المناسب للجواز
والعريس اللي جاي مفهوش عيب .. سلطة ومال ..
ودول اهم شئ يخلوكي تعيشي في امن وامان
سالي ( بتعجب شديد )
بابا انت ليه بتحسب كل حاجة بطريقة مدير امن
وكأن حياتنا الشخصية مسألة أمنية وبتقيمها من كل الابعاد!!
السبيتي
حياتكم الشخصية عندي اهم واكبر
مسألة امنية في حياتي
سالي
بس الفلوس والسلطة مش هي اللي
هتخليني سعيدة في حياتي
ايهاب ( ينهض متجها نحوها)
امال ايه اللي هيخليكي تحسي بسعادة ؟! الواد ابن التمرجي؟
سالي
ايهاب .. لو سمحت .. أقفل الموضوع دا خالص
ايهاب
لا والله!! بقي بتستخفلينا وعماله انتي وابن التمرجي تحبوا في بعض
ومخططين كمان للجواز !!.. طب ايه رأيك بقي
( يقوم بلي ذراعها .. سالي تتألم) هتتجوزي العريس
اللي جايلك ورجلك فوق رقبتك
السبيتي
سيبها يا ايهاب
سالي تنظر الي ايهاب بنظرة ذات معني ثم تنصرف .. رد فعل على وجه ايهاب
م14 ل/ د
فيلا السبيتي
الخادمه تحمل صينية من الطعام وتقف امام حجرة سالي يبدوا انها تريد الاذن بالدخول ولكن سالي لا تجيب .. ثم نري ايهاب قادم باتجاه الخادمة
ايهاب
فيه ايه ؟
الخادمة
الست هانم ما اكلتش حاجة من الصبح ..
والباشا قالي طلعيلها الاكل فوق
ايهاب
طب هاتي الصينية دي وروحي انتي
يبدوا ان ايهاب يريد ان يصالح اخته ويعتذر عن اسلوبه العنيف معها .. يطرق الباب ويستأذن بالدخول ولكن سالي لا تجيب
ايهاب
سالي .. ممكن أدخل ؟ .. سالي جبيتي انا هفتح الباب
ايهاب يفتح الباب ويتجه الي داخل الغرفة وينظر الي السرير فلا يجد سالي يلتفت يمينا ويسارا بحثا عنها فلا يجدها ولكن يجد تليفونها المحمول على الكوميدينو فيقوم بمراجعة سجل المكالمات فيجد ان اخر اتصال كان بينها وبين سيف .. نري احمرار عيني ايهاب من الغضب .. فهو يظن ان اخته تركت المنظر وذهبت لتقابل سيف .. يخرج المحمول ويطلب سيف نسمع صوت رسالة مسجلة بأن الهاتف غير متاح .. ثم يتصل بمروان .. مروان يجيب
ايهاب
اه يا مروان .. متعرفش سيف فين دلوقتي؟ ..
عوامة ايه ؟ .. العوامه بتاعتك!! وبيعمل ايه في العوامه ؟
.. اه .. متضايق شوية .. طيب .. لا انا معرفش ايه اللي مضايقه
.. ماشي .. سلام .. (مخاطبا نفسه ) بقي كدا ..
بتربوا فضيحة عشان تحطونا قدام الامر الواقع ..
ماشي يا سيف الكلب ان ما وقفتك عند حدك مبقاش ايهاب السبيتي
رد فعل على وجه ايهاب
م15 ل/خ
كازينو على النيل
نري رد فعل على وجه سالي التي تجلس مع مريم اخت سيف والتي تطلب منها ان تبتعد عن سيف وتتركه وشأنه
سالي (نري بريق الدمع في عينيها)
سيف اللي قالك تيجي تقليلي الكلام ده؟
مريم
سيف ميعرفش أصلا ً اني جاية اقابلك ..
انا اللي بطلب منك انك تبعدي عن سيف
سالي
بس انا بحب سيف وهو كمان بيحبني .. مريم ..
سيف مبقاش يحبني صح ؟
مريم ( تتنهد)
يا ستي والله سيف بيحبك ومتعرفيش حاله عامل ايه دلوقتي!
سالي
طب ليه مش عايز يرد على تليفوناتي ؟! وخلاكي انتي تردي عليا
مريم
على فكرة انا رديت عليكي من غير ما سيف يعرف ..
عشان اقابلك ونحط نهاية للقصة دي..لو سمحتي يا سالي
ابعدي عن سيف وكفايه اهانه ليه ولينا لحد كدا ..
وباباكي عنده حق ايش جاب بنت مدير الامن لأبن التمرجي ؟!
سالي
بس سيف ظابط مجتهد ومستقبله كبير وعنده طموح
مريم
ماهو عشان خاطر مستقبله الكبير وطموحه ميتدمروش ..
لازم تبعدي عن سيف .. ارجوكي يا سالي لو
بتحبي سيف سيبيه في حالي .. بعد أذنك
مريم تنصرف ورد فعل على وجه سالي
م16 ل/د
العوامة
نري رد فعل على وجه سيف عندما يفتح الباب ليعرف من الطارق ويفاجأ بايهاب .. نري علامات الغضب على وجه ايهاب والذي ينوي الشر لسيف
ايهاب ( بسخرية )
ايه ..مفاجأة..صح؟
سيف
ايهاب !! .. اتفضل
ايهاب يدخل ويلتفت يمينا ويسارا بحثا عن اخته
ايهاب
فين سالي؟
سيف
سالي !!.. معرفش
ايهاب
انت هتستهبل! لسة مكلماك من نص ساعة ..
واكيد اتفقتوا انكم تتقابلوا هنا عشان تكمل مسرحيتك
القذرة وتحطنا قدام الامر الواقع
سيف
انت بتقول ايه .. مسرحية ايه اللي بتتكلم عليها؟!
ايهاب ( بتهكم شديد )
المسرحية اللي كتبتها بنفسك وبتمثلها بكل اتقان ..
اتقربت ليا عشان تبقي صحبي وادخلك بيتي واعرفك على أختي ..
تقوم تلف عليها وتعمل انك بتحبها عشان البنت تتعلق بيك
وتتجوزوا وثروة ابوها تبقي في جيبك .. بجد برافو عليك ..
قناص بجد .. رصاصة في الهدف يا ابن التمرجي
سيف(بغضب)
اخرص .. التمرجي ده احسن منك ومن ابوك
ايهاب (بغضب عارم)
التمرجي احسن من ابويا انا يا ابن الكلب !
( ثم يضرب سيف بقبضة يده على وجه ..يسقط سيف ارضا ثم ينهض ويشتبك مع ايهاب وتحتد المشاجرة ثم يشهر سيف مسدسة ويطلق ثلاث اعيره منه تجاه ايهاب فيصيبه في اماكن مختلفه من جسمه .. ايهاب يسقط غارقا في دماءه .. سيف لا يصدق ما فعل يقترب من ايهاب وقد توترت كل اعضائه .. نري الرعشه في يديه ..
سيف
ايهاب .. ايهاب
ايهاب لا يجيب ويبدوا انه قد مات .. سيف يترك المكان ويهرب مسرعا
م17 ل/د
منزل سيف
نسمع طرقات شديدة لباب الشقة .. مريم تتوجه مسرعة لتفتح الباب .. الشرطة قد حضرت للقبض على سيف .. نري ظهور الاب والام منزعجين
مريم
حاضر .. حاضر .. هتكسر الباب ياللي بتخبط !
الضابط
دا منزل النقيب سيف الاسلام محمد حماد
الاب ( منزعج)
ايوا يابني خير ؟!
الضابط
معانا أمر بتفتيش الشقة
الضابط يشير للقوة التي معة لتفتيش الشقة
الام
خير يابني في ايه؟
الضابط
سيف فين يا حاجة؟
الام
سيف من ساعة ما خرج الصبح مرجعش لدلوقتي
افراد القوة لم تعثر على سيف وتعطي تمامها للضابط
الاب
فهمني يابني ايه الحكاية .. ماله سيف؟
الضابط
أبنك متهم في قضية قتل
الام (بانزعاج شديد)
قتل .. يا ساتر يارب
الاب (مقاطعا ً)
ثانية يا اعتدال .. قتل ايه اللي ابني متهم فيه.. دا ابني ظابط زيك
الضابط
اتفضل معانا ياحج
الاب
اتفضل معاك فين؟
الضابط
في مديرية الامن .. هاتوه
يشير للعساكر للقبض عليه
الام
انتو واخدينه على فين ؟!
مريم
بابا .. بابا
رد فعل على وجه مريم وامها
م18 ل/خ
قرية ريفية
نري سيف ينزل من سيارة اجرة ميكروباص ويبدوا لنا انه قد حضر الي قرية ريفية تابعة لمدن الصعيد .. المنازل ريفية الشكل واطفال تلعب في الشارع ورجال ونساء بالزي الريفي حيث يسكن الصول عبد الناصر الذي كان يخدم مع سيف قبل عودته الي الصعيد.. سيف يسير بحذر مراقبا الطريق ويصل الي منزل عبد الناصر ويطرق الباب الخشبي عدة طرفات .. نسمع صوت عبد الناصر من الداخل والذي يتحدث باللهجة الصعيدية ..
عبد الناصر
ايوا جاي ياللي بتخبط
عبد الناصر يفتح الباب ويفاجأ بسيف
عبدالناصر (متفاجأ)
سيف باشا ؟!! خطوه عزيزة .. يا الف مليون مرحبا
سيف
ازيك يا عبد الناصر
عبد الناصر(بفرح)
تمام يا سعت الباشا .. اتفضل .. دا احنا زارنا النبي انهاردة
سيف يدخل ثم يلقي بنظره الي الخارج ليطمئن من عدم وجود احد خلفه
م19 ل/د
مستشفي الشرطة
نري اللواء السبيتي وسالي والنقيب مروان امام غرفة العمليات في انتظار خروج الاطباء الذين يحاولون انقاذ حياة ايهاب .. مظاهر الخوف والقلق تكسو وجوه الجميع .. يخرج الطبيب من حجرة العمليات وتبدوا عليه مظاهر الحزن ليخبرهم بموت ايهاب.
سالي
خير يا دكتور .. ايهاب يخير ؟
السبيتي
انطق يا دكتور .. ابني كويس ولا ايه؟
الطبيب
للأسف ..حاولنا ننقذ حياته .. لكن امر الله واجب النفاذ
السبيتي( منهار)
يعني أيه؟
الطبيب
البقاء لله
ينزل الخبر كالصاعقة على سالي وابيها وتبدأ بالبكاء الشديد
سالي
لا ... اخويا .. لا
السبيتي
يعني ايه الكلام ده ؟! دا انا أسفرة بطيارة دلوقتي بره
الطبيب
صدقني يا عبد الرحمن باشا .. احنا مقصرناش في حاجة
.. بس دا قضاء ربنا .. الله يصبركم
ينصرف الطبيب ورد فعل على وجه اللواء السبيتي
م20 ل/د
منزل الصول عبد الناصر
سيف والصول عبد الناصر داخل المندرة .. سيف بيده كوب شاي .. عبد الناصر متفاجأ ومذهول ويبدو أنه لا يصدق ما يحكيه له سيف
عبد الناصر
لا حول ولا قوة الا بالله .. معقول اللي بتحكيه ده يا
سيف باشا ؟! انا ممصدقش واصل
سيف (متعجبا ً)
يعني أنا اللي مصدق يا عم عبد الناصر! لكن للأسف
دي الحقيقة..انا مستقبلي ضاع خلاص
عبد الناصر
متقولش اكدة يا باشا .. بسيطه ان شاء الله
سيف
بسيطة ازاي بس !! بقلك ضارب عليه تلت
طلقات وتقلي بسيطة ! زمانه مات
عبد الناصر
ان شاء مماتش .. انت قلبك طيب وطول عمرك
مضحي بنفسك عشان الناس وربنا مش عيهملك واصل
سيف
المهم .. انا جايلك لأن مافيش قصادي حد تاني اثق فيه ..
عايزك تشفلي مكان استخبي فيه اليومين دول لحد ما
اشوف هيحصل ايه .. هتقدر يا عم عبد الناصر ؟
عبد الناصر
ودا سؤال ده يا سيف باشا ؟! دا انت ان ماشالتكش الارض
نشلوك جوه حبابي عنينا .. منجيني من الموت قبل اكده ..
نرد جمايلك عاد .. هم بينا يا سيف باشا .
م21 فجرا/د
منزل سيف
والد سيف يغير ملابس الخروج ويرتدي الجلبيه .. ام سيف بجواره علي السرير يبدوا عليهما الحزن والذهول الشديدين
الاب
الليل كله وانا س جيم .. س جيم .. رتبه تمشي
وتيجي رتبه اعلي منها وتعيد نفس الاسئلة
الام
يعني ايه .. الواد ضاع خلاص؟!
الاب
ابنك متهم بقتل ايهاب ابن مدير الامن يا اعتدال
الام
سيف ميعملش كدا ابدا .. دول كدابين..عايزين
يشيلوه قضيه وخلاص
الاب
طيب.. لو دول كدابين زي ما بتقولي ... ابنك فين ؟!
تليفونه مقفول ليه ؟ ابنك هربان يا اعتدال .. يبقي هو القاتل
الام ( تبكي منهاره)
يا لهوي .. ابني ضاع في شربة مية يا محمد ؟؟
الله يحرق سالي ويحرق اليوم اللي عرفها فيه هي واخوها
الاب
المصيبة ان الولد مات .. لا حول ولا قوة الا بالله .. يارب
استرها يارب وجيب العواقب سليمة
م22 فجرا/خ
الطريق الي منزل قديم ومهجور
نري عبد الناصر يسير وخلفه سيف بخطوات مسرعة وسط بيوت ريفيه .. نور الصباح بدأ في الظهور .. عبد الناصر يدخل الي منطقة زراعية .. نري مشهد لطريق زراعي .. سيارة ربع نقل تحمل اقفاص طماطم تمر من الطريق .. جرار زراعي يسير على الطريق .. عبد الناصر يقف امام منزل قديم ومهجور امام الطريق الزراعي ويفتح الباب الحديدي .. بمجرد ان يفتح الباب نري خفاش يخرج طائرا الي الخارج .. يدخل عبد الناصر وخلفة سيف .. عبد الناصر يلقي نظرة الي الخارج ليطمئن انه لم يرهم احد ثم يغلق الباب من الداخل.
م23 فجرا/د
داخل المنزل القديم المهجور
المنزل يبدوا لنا بحالة سيئة جدا ً .. السقف من الخشب .. نري دكة بلدي قديمة في الوسط .. طربيزة عليها تليفزيون قديم جدا.. المكان يكسوه التراب .. زير مياه في احد الجوانب على حامل حديدي .. علي الجانب الاخرغرفة نوم .. نري سرير اعمدة قديم جدا .. نري صورة على الحائط لرجل سبعيني يرتدي عبائة صعيدي يمسك عصاية .. صورة لوجه فقط رجل اربعيني.. سيف يستكشف المكان ..يري أعشاش للخفافيش والعناكب في كل مكان
عبد الناصر
اتفضل يا باشا.. عارف ان المكان ميليقش بحضرتك ..
لكن ما باليد حيلة .. المكان الوحيد اللي تقعد فيه وانت مطمن
سيف يتقدم نحو الدكة ويمسح بيده فيجد ترابا .. عبد الناصر يهرول مسرعا ليمسح الدكة بمنديل قماش يخرجه من جيبه .. نري ذرات التراب تتطاير .. عبد الناصر يكح عند استنشاق التراب
عبد الناصر
لامؤاخذه يا باشا المكان عاوز يتنضف .. انهاردة باذن
الله هجيب البت سعدية تنضفه
سيف
بيت مي نده يا عم عبد الناصر؟
عبد الناصر
دا بيت ابوي الله يرحمه .. مهجور بقاله تلاتين سنه
سيف
ما هو باين .. مافيش غير الخفافيش اللي قاعدة فيه
عبد الناصر
والله يا سيف باشا .. من ساعة ما ابوي واخوي ماتوا مقتولين
اهنه من تلاتين سنه.. وامه ماتت وراهم بحسرتها .. واحنا مهملينه
سيف
اظن كان بسبب طار ؟
عبد الناصر
ايوه والله .. محدش خارب البيوت اهنه عندينا في الصعيد
غير الملعون اللي اسمه الطار ده .. يلا الله يرحمهم بقي ..
ارتاح سيادتك دلوقيت وانا هعاود تاني .. واجيبلك وكل وهدوم
سيف يخرج محفظته ويخرج بطاقة صراف الي
سيف
امسك يا عم عبد الناصر .. وانت في طريقك .. اي مكنه
صراف الي تقابلها اسحبلي 5000 ج
عبد الناصر
برضوا اكده .. هتشمتني يا سيف باشا .. خلي فلوسك
معاك هتحتاجها بعدين
سيف
انا مش عارف هقعد اد ايه هنا .. ومحتاج حاجات كتير
عبد الناصر
انا هجبلك كل حاجة .. متعلش هم حاجة واصل
سيف (متأثرا ً)
انا مش عارف اشكرك ازاي يا عم عبد الناصر ..
لو اخويا مش هيقف جمبي الوقفة دي
عبد الناصر
رقبتي فداك يا باشا .. وقلتلك قبل سابق .. نرد جمايلك
سيف
عاوزك تجيبلي تليفون محمول وشريحة موبيل جديدة..
وعاوزك تتئصلي من زمايلك اللي تعرفهم عندنا في
المديرية .. الدنيا وصلت لحد فين
عبد الناصر
عنيا .. بس خلي بالك ياباشا متحاولش تخرج من البيت
اكده ولا اكده .. لأحسن حد يلمحك ولا حاجة .. بالاذن سعتك
يخرج عبد الناصر وسيف يغلق الباب .. ورد فعل على وجه سيف
م24 ن/د
فيلا السبيتي
نري سالي تنزل من أعلى السلالم الداخلية للفيلا ويبدوا عليها الاسي والحزن ترتدي فستان أسود تتوجه نحو والدها الذي يجلس على الانتريه مشعلا ً السيجار .. الاب غارقا ً في أحزانه لا يكاد يشعر بأبنته وهي تتحرك نحوه .. نري كراسي العزاء في وسط الفيلا ونسمع صوت القران المجود للشيخ عبد الباسط .. سالي تجلس بجوار أبيها وتقترب منه في خجل
سالي
بابا .. مش هتطلع ترتاح شوية ؟ حضرتك طول
الليل واقف على رجلك في العزا
السبيتي
انا مش هتراح ولا هنام الا لما يتقبض على
الولد المجرم ده وياخد عقابه
سالي
انا مش قادرة اتصور ان ايهاب مش في وسطنا دلوقتي!! ..
بابا انا اسفه بجد سامحني ارجوك ( تبكي بشدة)
السبيتي ( يضمها الي حضنه)
لا يا بنتي متتأسفيش .. انتي ملكيش ذنب .. اهدي يا بابا اهدي
م25 ن/د
المنزل المهجور
عبد الناصر داخل المنزل وقد احضر بعض الاغراض لسيف .. سيف ينظر الي عبد الناصر يري في عينيه حزن وكأنه يعلم شيئا ً .. سيف يسأل عبد الناصر بفضول
سيف(فضول شديد)
في ايه يا عم الناصر؟ .. عرفت حاجة؟
عبد الناصر(اسي شديد)
للأسف يا باشا .. ايهاب باشا مات وحضرتك اتحولت
للمحاكمة العسكرية العاجلة
سيف
كنت عارف .. طب والحل ؟ محاكمة عسكرية يعني
هترفد من شغلي وممكن توصل لاعدام كمان ..
يعني ايه ؟ .. مستقبلي ضاع خلاص ؟! طب انا
ايه ذنبي في دا كله ؟؟ عشان حبيت انسانه اهلها مناخيرهم
فوق وقاتلهم الكبر والغرور تبقي دي نهايتي؟!!
عبد الناصر(بحزن)
هدي نفسك ياباشا .. دا قدر ومكتوب
سيف
قدري اني اعيش باقي حياتي هربان يا من الاعدام يا
من السجن !! .. اعيش في خرابه ومطلعش غير بالليل
زي الخفافيش .. ايوا متستغربش .. انا والخفاش ده
(يمسك باحد الخفافيش)بقينا واحد يا عم الناصر ..
بس الفرق اللي بيني وبينه ان هو اختارحياته دي..
لكن انا مكنش عندي حق الاختيار ..
م26 ن/خ
كلية الطب جامعة القاهرة
نري لافتة كلية الطب .. مريم داخل حرم الكليه تسيرمع احدي زميلاتها وتدعي ريم .. نري فتاه اخري متعجرفة تدعي حنان تسير خلف مريم تحاول جر شكلها .. الفتاه تنادي على مريم .. مريم تتوقف عن السير
حنان (بغطرسة)
مريم .. مريم
مريم
نعم
حنان
صحيح اللي بنسمعه في التليفزيون ده ؟..
اخوكي الظابط قتل زميله عشان رفض يجوزه اخته؟
ريم
حنان .. مش وقته يلا امشي
حنان
لا مش همشي الا لما تقلي صح الكلام دا ولا لا ؟
مريم
وانتي مال اهلك
حنان
ايه دا .. ايه دا .. ايه قلة الادب دي .. فعلا بيئة اوي
.. ليه حق سعادة مدير الامن يرفض اخوكي ..
انتم مفكرين نفسكم ايه؟ عشان اخوكي ظابط
هتنسوا اصلكم الواطي
مريم
انتي قلية ادب ومش متربيه ولو ممشتيش
من قدامي حالا مش هيحصلك كويس
حنان
ايه هتقتليني ؟!! تعمليها ما انتوا بقيتوا قتالين قتله
ريم
امشي غوري يا بت انتي يلا
حنان تنظر بسخرية وتكبر ثم تنصرف
ريم
معلش يا مريم .. دي بنت طول عمرها مناخيرها فوق
وغبية ومستفزة كمان .. متاخديش عليها ارجوكي
مريم
يا ستي متدقيش .. ما احنا خلاص بقينا حلاوة الموسم
اللي ما يشتري يتفرج
م27 ن/د
منزل سيف
الام تجلس وتضع يدها على خدها وبجوارها مريم .. الحزن يخيم عليهما .. الاب يفتح الباب وقد عاد من عمله يحمل في يده بعض اكياس الخضار والفاكهة .. يضع الاكياس على المنضده .. يلقي بالسلام ثم يجلس بالقرب منهما
الاب
السلام عليكم
مريم
وعليكم السلام ورحمة الله وبركاته
الام
مافيش أخبار عن سيف .. ما اتصلش بيك؟
الاب
لا .. ما اتصلش
ينظر لمريم فيري وجهها حزين وتجز على اسنانها
الاب
مالك يا بنتي؟
مريم ( تتنهد)
مفيش يا بابا ..
الاب
زمايلك بيضايقوكي في الكلية .. صح؟
مريم
هما زمايلي بس !!.. انا بقيت معيرة للجامعة
كلها من الدكتور لفرد الامن اللي فيها
الاب
لا حول ولا قوة الا بالله .. محاكمة سيف بكرة
والمحامي بيقلي موقفه ضعيف جدا ً
الام
انا عايزه ابني يا محمد .. ابني وحشني اوي
وفجأه يرن محمول مريم .. تنظر في المحمول فتجد رقم مجهول غير مسجل .. نري الدهشه على وجهها
مريم (بدهشة)
ايه دا ! .. نمره مش متسجله عندي
الاب (منزعجا)
ردي بسرعة ليكون سيف
مريم
الو
قطع وانتقال الي
سيف داخل المنزل المهجور شعر ذقنه بدأ يكسو وجهه وأيضا نلاحظ ان شعر رأسه بدأ يطول
سيف
ايوا يا مريم .. انا سيف
قطع وعوده الي
مريم
سيف .. ازيك يا سيف ؟ انت فين؟
نري رد فعل على وجه الاب والام .. الام تريد ان تكلمه
الام (متأثرة)
ادهولي اكلمه .. ايوا يا سيف .. ايوا يا حبيبي ..
برضه كدا ؟ تعمل فينا كدا يا سيف؟!
قطع وانتقال الي
سيف
اسمعي يا امي مش وقت عتاب الله يخليكي ..
انا بتصل عشان اطمنكم عليا
قطع عودة الي
الام
طب انت فين يابني وانا اجيلك؟
قطع وانتقال الي
سيف
صدقيني مش هينفع تجوني .. انتم اكيد متراقبين ..
والموبيلات اكيد متراقبه .. خلي مريم تجيب
خط جديد مش باسم حد فيكم وابعتولي رساله
ع الرقم ده وانا هتصل بيكم .. اطمني انا بخير ..
خلي مريم تحذف الرقم ده من الجهاز ..
هكلمكم تاني .. مع السلامة
قطع وعودة الي
الام
الو .. سيف .. قفل الخط
الاب
مقالكيش هو فين؟
الام
مقالش حاجه .. متصل عشان يطمنا عليه وبس ..
يا حبيبي يابني .. ياتري انت فين وعايش ازاي؟
رد فعل على وجه الاب
م28 ن/د
قاعة المحكمة العسكرية
نري ولد سيف وامه واخته مريم في ناحية والناحية الاخري نري السبيتي وسالي ومروان. الجميع في حالة من الترقب والقلق.. نسمع صوت الحاجب وهو يفول محكمة .. يدخل القاضي القضاه المساعدين .. ينهض الجميع ..يأذن لهم بالجلوس
القاضي
حكمت المحكمة غيابيا ً على المتهم سيف الاسلام
محمد حماد بفصله من الخدمة مع احالة
اوراق القضية الي فضيلة المفتي لابداء
الرأي الشرعي فيها .. رفعت الجلسة
رد فعل على وجه الجميع
م29 ل/د
المنزل المهجور
عبد الناصر يخبر سيف بحكم المحكمة .. نري سيف في ذهول شديد عند سماع الخبر
سيف
فصلوني من الخدمة ؟ً!
عبد الناصر
وكمان القضية راحت للمفتي
سيف(يسخر من نفسه)
ها .. ها .. ها ..كنت متوقع
عبد الناصر
طب هتعمل ايه دلوقيت يا باشا ؟
سيف
خلاص يا عم عبد الناصر ملهاش لزوم كلمة باشا دي
عبد الناصر ( متأثرا )
لا .. هفضل اقلك يا باشا لحد اخر يوم في عمري ..
طول عمرك ظابط جدع وشهم
سيف ( بسخرية)
وادي النهاية !!والله ما انا عارف اعمل ايه بس
رد فعل على وجه عبد الناصر
م30 ل/د
منزل سيف
الام في غرفة نوم سيف ترقد على السرير تعاني من انهيار عصبي شديد ..نري على صدرها صورة لسيف تحضنها باحدي يديها .. نري الطبيب خارج من الغرفه خلفة والد سيف بعد أن أعطاها حقنه مهدئة .. مريم في الصالة نراها في قلق شديد تريد الاطمئنان على امها
مريم
خير يا دكتور .. ماما مالها؟
الطبيب
عندها انهيار عصبي شديد .. انا اديتها دلوقتي حقنه مهدئة ..
هتستريح للصبح .. وان شاء الله هتبقي احسن ..
مش هقلكم نبعدها عن مصادر التوتر والازعاج ..
لأني عارف الظروف اللي انتوا فيها دلوقتي ..
لكن حاولوا انكم تهونوا عنها بقدر الامكان .. الف سلامه
الاب
الف شكر يا دكتور .. تعبناك معانا ( يريد اعطاءه حق الكشف .. الطبيب يرفض)
الطبيب
عيب يا استاذ محمد
الاب
كتر خيرك يا دكتور ( يوصله الي باب الشقة ) مع السلامة
مريم
روح انت يا بابا نام .. عشان شغلك الصبح .. وانا هفضل جمبها
الاب
شغل ايه بقي يا بنتي .. خلاص مفيش شغل تاني
مريم ( بانزعاج شديد )
يعني ايه يابابا؟!!
الاب
مدير المستشفي بعتلي انهارده الصبح .. وكلمني بمنتهي
الصراحة وقالي وجودك معانا في المستشفي هيئثر
على سمعتها وخصوصا ً انها مستشفي استثماري كبير
مريم
يعني ايه ؟!! اترفدت من الشغل؟!!
الاب يومئ برأسه بمعني نعم ثم يترك مريم ويدخل الي الام
رد فعل على وجه مريم
تابعوني والبارت التالي ..
جميله كمل
ردحذف