رواية اغتصاب شرعي البارت العشرون والاخير من الجزء الثاني

 صرخة ارملة 

البارت الثالث

للكاتب المصري محمد مالك

جميع الحقوق محفوظة

نجاة في حداد علي زوجها اسلام حزينة في غرفتها ترتدي الاسود وتدخل عليها امها 

الام .. ويعدين معاكي يا نجاة هتفضلي قاعدة في اوضتك اليوم كله تعيطي بالشكل ده ؟!

نجاة .. اومال عايزاني ايه بس يا ماما ؟! واحدة جوزها مات ليلة فرحها هيبقي حالها ازاي يعني ؟!

الام .. يابنتي الله يرحمه .. دا قضاء وقدر .. ومحدش قالك متزعليش علي جوزك .. بس ارحمي نفسك شوية يابنتي .. انتي مش شايفة شكلك بقي ايه ؟! وبعدين من امتي الحزن بيرجع اللي راح ؟!

نجاة .. منلحقناش نفرح ببعض يا ماما !! احنا كنا راسمين احلام كتير في خيالنا وكان نفسنا نحققها واحنا مع بعض 

الام .. معلش يا بنتي بقي .. ده قضاء ربنا ومنقدرش نعترض .. ادعيله بالرحمه 

نجاة .. ربنا يرحمك يا اسلام يا حبيبي 

الام .. اللهم آمين .. قومي بقي اتعشي معانا 

نجاة .. لا يا ماما .. صدقيني ماليش نفس لأي حاجة 

الام .. مينفعش اللي بتعمليه ده يا نجاة ؟! انتي كده هتتعبي وهتقعي من طولك مرة واحدة ومن غير ما تحسي .. انتي بقالك يومين ما اكلتيش حاجة ؟! كده غلط علي صحتك يا بنتي.

نجاة .. طب اعمل ايه بس ؟! انا فعلا نفسي مسدودة من كل شئ  .. مليش نفس لحاجة خالص

الام .. لا اضغطي علي نفسك شوية .. قومي خدي شاور وتعالي اتعشي معانا

نجاة .. حاضر يا ماما

الام .. قومي دلوقتي حالا .. يلا اتحركي 

ثم تنهض نجاة من علي السرير ثم تنظر لأمها والدموع في عينيها وتحضن امها وهي تقول 

نجاة .. اسلام وحشني اوي يا ماما .. اوي 

الام متأثرة بشدة تكاد تبكي من الحزن 

الام .. انا حاسة بيكي والله يا بنتي .. ربنا يصبرك ويرحمه يارب ..

ونذهب الي ناصر الشرقاوي حيث يجلس في مكتبه بالشركة ويبدوا عليه الفرح الشديد يستمع الي الكاسيت ويبدوا انها اغنية عودوني ل عمرو دياب ويردد كلمات الاغنية مع الهضبة .. وفجأة يدخل الدكتور شريف فيغضب ويستنكر بشدة ما يفعله ناصر

شريف .. ايه اللي انت بتعمله ده ؟! 

ثم يتوجه نحو الكاسيت ويغلقه

ناصر .. ايه يا عم فيه ايه ؟!

شريف .. قاعد بتسمع اغاني واخوك ميت مالوش يومين ؟! بذمتك مش مكسوف من نفسك ؟! الموظفين اللي في الشركة يقولوا عليك ايه ؟! فرحان ان اخوه مات ؟! 

ناصر .. مالك يا عم شريف .. ايه الدخلة دي ؟! بالراحة عليا شوية يا حبيبي !!

شريف .. انت اللي بالراحة علي نفسك شوية وعيب اللي بتعمله ده ؟! اومال لو مكنش اخوك هو اللي مات كنت عملت ايه ؟!

ناصر .. كنت اتحزمت ورقصت وحياتك !! .. بقلك ايه يا عم شريف انا راجل فريش وصاحب مزاج بحب الفرح والانبساط .. اما الحزن والحداد بتاعكم ده انا ماليش فيه .. وبعدين يا سيدي المثل بيقول الحي ابقي من الميت .. وخليك فريش عشان وشك ميكرمش .. ههههه

شريف .. للدرجه دي معندكش دم ولا احساس ؟! انسان فاقد للشعور ؟! اخوك اللي مات ده مش مئثر فيك خالص .. ايه مش صعبان عليك فراقه ؟!

ناصر .. يا عم صعبان عليا والله .. بس هو انا لازم اقعد بوذي شبرين وايدي علي خدي وعمال اعيط عشان ابان اني حزين يعني ؟! الحزن في القلب يا دكتور 

شريف .. والله ما اعتقدش ان يكون عندك قلب اصلا !!

ثم يتركه وينصرف 

ناصر .. انا معنديش قلب ؟! الله يسامحك يا جدع !! 

ثم يقوم بتشغيل الكاسيت مرة اخري ويبدوا انها نفس الاغنية السابقة ثم يمسك المحمول ويتصل بإحدي الفتيات وتدعي سوسو

ناصر .. الو .. اه يا سوسو .. وحشتيني يا بت الاية ..بقي كده مش تتصلي تعزيني يا قليلة الاصل انتي ؟! .. تعزيني في مين ؟! .. هو انتي متعرفيش ان اخويا الصغير مات ؟! .. لا والله وانتي كمان اخوكي مات ؟! .. ههههه .. ده ايه الصدف الكئيبة دي ؟! طب بقلك ايه اشوفك انهارده بقي عشان اعزيكي في اخوكي وانتي كمان تعزيني في اخويا واهو نواسي بعض احنا الاتنين .. طيب في انتظار تليفونك يا قمر .. باي ..

ثم يغلق الخط ويقول .. 

ناصر .. الله يرحمك يا اخويا وينتقم منك يا درويش الكلب

ونذهب الي شريف حيث يجلس في عيادته حزينا علي فقدان اخيه ثم يدخل اليه مسعود التمرجي 

شريف .. فيه حد بره تاني يا عم مسعود ؟

مسعود .. ايوه في واحدة قاعدة مستنية من بدري اوي ومش راضية تدخل غير لما تخلص كشف خالص .. 

شريف .. مين دي ؟!

مسعود .. الدكتورة سمية 

شريف .. اه .. هو فيه حد تاني غيرها بره ؟!

مسعود .. لا خلاص الكشوفات كلها خلصت .. ادخلها ولا ايه ؟!

شريف .. خليها تتفضل

مسعود .. حاضر .. اتفضلي يا ست الدكتورة 

ثم تدخل سمية طبيبة اطفال عمرها ٢٥ سنه 

مسعود .. تشربي ايه حضرتك؟

سمية .. ياريت قهوة مظبوط من فضلك يا عم مسعود

مسعود .. وانت يا دكتور اجيبلك قهوة انت كمان ؟

شريف .. ماشي يا عم مسعود

وبعد ان ينصرف مسعود تقول سمية

سمية ..ازيك يا شريف .. اخبارك ايه ؟

شريف .. الحمد لله انا كويس 

سمية .. ممكن اعرف مبتردش علي تليفوناتي ليه ؟!

شريف .. معلش اليومين اللي فاتوا مكنتش قادر ارد علي حد خالص !!

سمية .. هو من قبلها علي فكرة ؟! ع العموم انا كنت بتصل عشان اعزيك .. البقاء لله يا شريف

شريف .. حياتك الباقية .. شكرا .. اتفضلي اقعدي 

سمية .. مرسي .. بجد انا زعلت اوي لما عرفت بالخبر ده .. ربنا يرحمه يارب ويصبركم انت واخوه 

شريف .. ياارب .. انتي اخبارك ايه ؟!

سمية .. انا ؟! يهمك تعرف اخباري ؟!

 شريف .. سمية من فضلك بلاش الاسلوب ده انا بجد مش مستحمل حد يضايقني بأي كلمه اليومين دول 

سمية .. مش عايز حد يضايقك بأي كلمه لكن انت تضايق الناس بكلامك عادي ؟!

شريف .. وبعدين ؟!

سمية غاضبة .. ولا قابلين يا دكتور .. مالوش لزوم الكلام .. انا كنت جاية عشان اعزيك وبس ولو كنت حضرتك رديت ع التليفون انا مكنتش جيت اصلا  .. البقاء لله مره تانية .. بعد اذنك.

سمية تنصرف ورد فعل علي وجه شريف ويدخل عم مسعود ويحمل صينية عليها فنجانان من القهوة

مسعود.. هي مشيت ولا ايه ؟!

شريف .. ايوة مشيت 

مسعود .. طب والقهوة دي مين هيشربها ؟!

شريف ينهض من علي كرسية ويخلع البالطو ويرتدي الجاكيت ويتوجه ناحية الباب ويبدوا انه ينوي المغادرة ثم يقول لمسعود 

شريف .. اشربها انت بقي .. وابقي اقفل العيادة وروَّح انت خلاص .. سلاموا عليكم 

مسعود مندهش .. وعليكم السلام .. اشربها انا !!.. هشرب فنحانين قهوة انا لوحدي ؟! لما اروح انده للواد فكري يجي يشرب الفنجان التاني ...

ونذهب الي نجاة حيث تجلس في البالكون وتدخل اليها امها وهي تحمل صينية الشاي

الام .. الشاي يا نجاة 

نجاة .. شكرا يا ماما

الام .. قليلي يا بنتي هما اخوات المرحوم جوزك ما اتصلوش بيكي بعد الجنازة ؟!.

نجاة .. لا يا ماما

الام .. غريبة !! المفروض يسألوا عنك يعني ويطمنوا عليكي !!

نجاة .. اعذريهم يا ماما .. هما اكيد كمان زعلانين علي موت اخوهم ويمكن اكتر مني 

الام .. اكيد يا بنتي .. بس انا مش عاوزاكي تنسي ان ليكي ورث عندهم

نجاة .. ورث ايه ؟!

الام .. ورثك في جوزك يا حبيبتي !! انتي ناسية ان ليكي الربع في تركة جوزك ولا ايه ؟!

نجاة .. مش وقت الكلام ده خالص يا ماما 

الام .. انا بفكرك بس عشان متنسيش .. لأني بصراحة مش مرتاحة للأسمه ناصر ده .. من اول مره شفته فيها وانا حاساه العبان كده ولئيم ومش ساهل كمان .. خلي بالك 

رد فعل علي وجه نجاة..

يتبع ...