رواية جرآة بأسم الحب
البارت الثامن
للكاتب المصري محمد مالك
جميع الحقوق محفوظةوفي الصباح يجلس كلا من جمال ونشوي علي مائدة الافطار وتقوم صفاء بوضع الطعام علي المائدة وكالعاده يسأل جمال عن عماد
جمال .. سيدك عماد صحي ولا لسة يا صفاء ؟
صفاء .. اكيد صاحي في اوضته يا سيدي عشان سامعه الكاسيت شغال من جوة الاوضة .. اغاني حزينة وكدا !!
نشوي .. محدش سألك ايه نوع الاغاني اللي بيسمعها !! وخلي دايما اجابتك علي اد السؤال .. فاهمه ؟
صفاء .. فاهمه يا ستي
جمال .. انا مش عارف ايه حكاية الولد دا ؟!! حاله مش عاجبني بالمره !! اطلعي اندهيله يا صفاء وقليله اننا مستنينه علي الفطار
صفاء .. حاضر يا سيدي
نشوي .. اسمعي
صفاء .. نعم
نشوي .. وانتي بتنضفي الاوضة امبارح ماشفتيش البروش الالماظ بتاعي ؟!
صفاء .. لا يا ستي .. ما شفتش حاجة
جمال .. ماله البروش الالماظ؟!
صفاء .. بقالي يومين بدور عليه ومش لاقياه !
جمال .. جايز يكون وقع هنا ولاهنا .. او تكوني حطتيه في مكان وناسيه
نشوي .. في الحالتين مش هيخرج بره الاوضة .. ومفيش حد بيدخل ينضف الاوضة غيرها !
صفاء .. قصدك ايه يا ستي ؟؟!!
نشوي .. قصدي انك تفتكري كويس جايز تكوني شفتيه هنا ولا هنا !
صفاء .. لا ما شفتهوش يا ستي وبعدين انا عميه وطرشه وخرصة !! اروح انده لسيدي عماد
نشوي .. خدي يا بنت
صفاء .. نعم يا ستي
نشوي .. ايه عميه وطرشة وخرصة دي ؟!!
صفاء .. يعني لا اري لا اسمع لا اتكلم !!
نشوي .. يلا غوري
صفاء .. ادينا غورنا !!
جمال مندهش من معاملة نشوي ل صفاء
جمال .. في ايه يا نشوي ؟!! بالراحة علي البنت شويه !!
نشوي .. ارجوك يا جمال البنت دي لئيمه ومش سهله فاسيبني اعامل الاشكال دي بطريقتي
جمال .. انا معاكي انها لمضة شويه .. بس امينه جدا .. دي بقالها خمس سنين في القصر هنا وماشفتش منها حاجة وحشة ابدا
نشوي .. ولو .. صنف الخدامين دا مالوش امان .. ما جايز تكون لطشت البروش !!
جمال .. لا لا لا .. حرام عليكي يا شيخه .. صفاء متعملش كدا ابدا .. دوري انتي بس عليه كويس وهتلاقيه ان شاء الله
نشوي .. اكيد هدور تاني .. المهم بقي عايزه انزل الكليه انهارده عشان صحبتي اتصلت عليا امبارح وقالتلي ان في امتحان شفوي انهارده ودكتور الماده دا غلس جدا لو محضرتش هيديلي صفر علطول
جمال .. وماله انزلي يا حبيبتي .. تحبي اوصلك في طريقي وانا رايح الشركة ؟؟
نشوي .. لا ما انا بستأذنك عماد يوصلني معاه في طريقه
جمال .. اها .. انا نسيت ان عماد معاكي في كلية الاعلام ونفس التيرم كمان .. وماله يا حبيبتي مش محتاجة استئذان دي يوصلك طبعا
ثم ينزل عماد وكالعاده الحزن يخيم علي وجهه وذقنه طويلة
عماد .. صباح الخير يا بابا
جمال .. صباح الخير يا عماد
عماد يسحب كرسي ويجلس ونشوي تنظر اليه في غضب لأنه لم يصبح عليها
جمال .. طب ونشوي مش هتقلها صباح الخير ؟!!
عماد .. صباح الخير
نشوي .. صباح النور
جمال .. مالك يا عماد ؟!! حاسك متغير كدا ومش عاجبني .. انت فيه مشكلة معاك ولا حاجة؟؟!!
عماد .. لا يا بابا
جمال .. طب مالك متغير ليه ؟! دي مش طبيعتك ابدا !!
عماد .. انا زي الفل اهوه يا بابا
جمال .. هو انا غريب عنك ؟! وسايب دقنك طويلة ليه كدا ؟!! اها .. تكنش بتحب جديد ؟!!
عماد يشنق عند سماع تلك الجملة ويسعل بشدة ويمسك بكوب الماء ويرتشف منه
جمال مندهش .. ايه مالك ؟!!
عماد .. ماليش .. انا شبعت خلاص
جمال .. انت ما اكلتش حاجة عشان تقول شبعت ؟؟!! ع العموم انت حر .. اسمع .. ابقي خد نشوي معاك في طريقك للكلية
عماد .. بس انا مش رايح الكليه انهارده
جمال .. ازاي ؟؟!! دي نشوي بتقول ان عندكم امتحان شفوي انهارده !!
عماد .. ايوا .. بس انا مش هحضر الامتحان
جمال .. ليه ؟؟!!
عماد .. عشان مذاكرتش المادة
جمال .. ومذاكرتش المادة ليه ؟!!
عماد .. اهو كدا
جمال .. يعني ايه اهو كدا ؟!! انت ايه حكايتك بالظبط يابني ؟؟!!
نشوي .. ولا يهمك انا عرفة الاسئلة اللي هتيجي في الامتحان ولسة قدامنا اربع ساعات نراجع فيهم مع بعض
جمال .. تمام .. وياريت بالمره تعرفيلي ايه اللي ملخبط كيانه بالشكل دا ؟!
جمال ينهض من علي مائدة الطعام وينصرف وعماد ينظر في غيظ ل نشوي ونشوي تبتسم له في برود شديد يستفز عماد
عماد .. انا طالع اغير هدومي
نشوي .. بسرعه بس عشان نلحق نراجع الماده قبل الامتحان
وتستقل نشوي السياره مع عماد وعماد طوال الطريق لا يتفوه بكلمه واحده
نشوي .. هتفضل ساكت طول الطريق كدا ؟؟!!
عماد .. هتكلم اقول ايه ؟؟!!
نشوي .. قول اي حاجة .. لكن متفضلش ساكت كدا !! بتستفزني !!
عماد .. الطريق زحمه خالص انهارده !!
نشوي .. نعم !! هي دي الكلمه اللي قدرك عليها ربنا ؟!
عماد .. انتي مش طلبتي مني اتكلم واقول حاجة ؟!! اديني اتكلمت اهوه
نشوي .. يا سلام !! هو انا بقلك اتكلم عشان تقلي الطريق زحمه انهارده ؟!! ما هو زحمه كل يوم !! ايه الجديد يعني ؟!
عماد .. امال عاوزاني اتكلم اقول ايه ؟؟!!
نشوي .. عارف عاوزاك تقول ايه ؟!!
نشوي تخرج اسطوانه DVD من حقيبتها وتضعها في كاسيت السياره فنسمع اغنيه ل عبد الحليم .. قلي حاجة .. اي حاجة .. قول بحبك .. قول كرهتك .. قول وميهمكش حاجة ...
نشوي .. عرفت عايزاك تقول ايه ؟!!
عماد .. مش فاهم ؟!!
نشوي .. لا انت فاهم كويس !! يا عماد انا احترت في امرك .. امبارح كنت شايفه في عنيك حب واشتياق مالوش حدود .. وانهارده انت مش طايق حتي تبص في وشي ؟!! حدد موقفك معايا بالظبط .. انت بتحبني ولا خلاص بقيت بتكرهني ؟؟!!
عماد .. انا قلتلك اننا لازم ننسي اللي بينا .. وكفايه اللي حصل امبارح .. خلتيني مش قادر ارفع عنيا في الشغاله !!
نشوي .. الشغاله دي انا هعرف اكسرها كويس .. يا عماد فكر معايا في حل للمصيبة اللي انا فيها دي.. انا قربت اتجنن بجد !!
عماد .. للأسف مفيش حل
نشوي .. لا فيه حل .. تعالي نهرب سوا
عماد .. انتي اتجننتي ؟؟!!
نشوي .. ما انا لو فضلت قاعده مع ابوك هتجنن برضوا !!
عماد .. ابويا دا يبقي جوزك!!
نشوي .. انا ضحيه يا عماد وانت عارف كدا كويس
عماد .. ضحيه بقي مش ضحيه .. اديكي بقيتي مراته وهو بقي جوزك !!
نشوي .. يعني ايه ؟! هتسيبني بتعذب كدا وانت قاعد تتفرج عليا !!
عماد .. قلتلك مش في ايدي حاجة يا نشوي .. وطلعيني من دماغك بقي
نشوي .. بقي كدا ؟!! وقف العربيه .. بقلك وقف العربيه
عماد يقف ونشوي تفتح الباب وتنزل من العربية وتنظر له من الباب الشباك الزجاجي وتقول بعصبيه شديدة وغضب
نشوي .. روح بقي الكلية لوحدك .. وشوف مين يراجع معاك المادة!! .. اه .. ومش هطلعك من دماغي يا عماد .. سامع ؟؟!! يلا باي .. استني .. هات الاسطوانه بتاعتي ..
عماد يعطيها الاسطوانه
نشوي .. خليك بقي في الاغاني الحزينة بتاعتك اللي بتسمعها في اوضتك !!
نشوي تنصرف ورد فعل علي وجه عماد يضع اسطوانه في الكاسيت ونسمع اغنيه ظلموه .. ظلموه.. القلب الخالي ظلموه .. ل عبد الحليم ثم يواصل السير في طريقه ...
تابعوني والبارت التالي .. تحياتي ..
اكثر من رائعة
ردحذف