رواية انقذني ايها الموت
للكاتب المصري محمد مالك
البارت الاول
عدلي نور الدين لواء شرطة حازم وصارم جدا حتي في بيته كل شئ عنده بحساب يرفض النقاش او الجدال طالما اخذ قراراً في امر ما وزوجته نورهان مدبولي استاذ الطب النفسي ولديها بنت وحيدة اسمها فيروز تدرس بكلية الطب بالفرقة الرابعة .. عدلي هو وزوجته علي طربيزة الافطارعدلي .. امال فرويز فين ؟!! مبتفطرش معانا ليه ؟!!
نورهان .. نايمه في اوضتها
عدلي .. ليه مش رايحة الكليه انهارده ولا أيه ؟!!
نورهان .. لا مش هتروح انهارده
عدلي .. ليه ؟!!
نورهان .. يعني مضايقة شوية من موقف امبارح
عدلي ..اها .. عشان زعقت فيها تقصدي ؟!!
نورهان .. انت مزعقتش فيها وبس .. انت ضربتها كمان ؟!!
عدلي .. عادي بنتي وبربيها .. وبعدين انا ضربتها بالقلم بس !!
نورهان .. ليه وانت كنت عاوز تعمل ايه كمان ؟!! ما تصربها بالنار احسن عشان ترتاح ؟!
عدلي .. انتي زعلانه اني بعاقب بنتك لما اتأخرت بره ؟!
نورهان .. اكيد زعلانه من الاسلوب اللي انت بتعاقبها بيه .. ايوا فعلا البنت اخطأت لما اتأخرت بره ومن غير ما تتصل وتعرفنا هتتأخر ليه .. لكن دا ميديلكش الحق انك تهينها وتضربها قدام الشغالة
عدلي .. انا خايف علي البنت .. البنت في سن خطر واديكي شايفة وسامعة اللي بيجري حوالينا .. بنات بتختفي وبنات بتتخطف وبنات بتخرج مترجعش وبنات بتجيب لأهلها العار !!
نورهان .. خلاص خايف عليها يبقي اتناقش معاها بكل ود وحب ولما البنت تحس انك خايف عليها بجد.. صدقني هتسمع كلامك وهتاخد رأيك في كل خطوه بتعملها .. لكن الضرب والشتيمة والاهانه بيعملوا رد فعل عكسي تماما .. خليك صديق للبنت افضل ما تكون عدو يا سيادة اللوا
عدلي .. ايه يا دكتوره .. انتي هتعلميني اربي بنتي ازاي ولا أيه ؟!!
نورهان .. لا انا بصححلك فكرتك الغلط عن التربية
عدلي .. والله ما حد هيفسد اخلاق البنت دي غيرك انتي !! روحي خليها تغير هدومها عشان اخدها في طريقي للكلية
نورهان .. قلتلك البنت عندها اكتئاب مش هتروح انهاردة
عدلي .. يعني ايه عندها اكتئاب ؟!! انا اللي اعرفه مش هتروح الكلية عشان عندها مغص كلوي .. مغص معوي .. دور برد وسخونيه .. لكن عندها اكتئاب دي معناه ايه ؟!!
نورهان .. الاكتئاب دا مرض زيه زي المغص الكلوي والمغص المعوي ودور البرد والسخونية .. بالعكس الاكتئاب دا اشد واخطر من اللي انت قلته دا كله
عدلي .. بس بقي بلاش كلام فارغ .. اكتئاب ايه وزفت ايه !! بنتك عايشة احسنها عيشة وطلباتها كلها مجابة وغيرها بيتمني واحد علي عشرة من العيشة اللي هي عايشاها
نورهان .. بس ناقصها حاجات تانيه كتير اولها حنية ابوها .. من فضلك يا عدلي غير طريقة معاملتك للبنت .. البنت بجد بدأت تتعب نفسيا وكفاية بقي تدخل في حياتها وشؤنها الخاصة كبنت
عدلي .. انا ابوها ومن حقي اعرف الكبيرة والصغيرة عنها . . انا اللي بشوفه بسبب مهنتي يخليني احبسها جوة قفص حديد بقفل
نورهان .. بنتك غير اللي انت بتشوفهم يا عدلي !! فيروز متربيه وبنت ناس
عدلي .. ههههه .. صدقيني اغلب البنات المنحرفه دلوقتي بنات ناس ومن عائلات محترمه .. انتي اللي من فضلك سيبيني اربي بنتي بطريقتي لو فعلا مش عاوزة في يوم من الأيام انك تتعايري بيها .. سلام يا دكتورة
نورهان تنظر الي عدلي في تعجب ولسان حالها يقول مفيش فايدة .. تصعد الي غرفة ابنتها حيث تجدها ما زالت نائمه .. تقترب منها وتجلس بجوارها علي السرير
نورهان . فيروز اصحي يا حبيبتي
فيروز تستيقظ مفزعه ..
فيروز .. مين ؟؟!!
نورهان .. انا ماما يا حبيبتي متخافيش
فيروز تنفس الصعداء .. ماما !! فكرت بابا
نورهان .. بابا مشي راح الشغل
فيروز .. احسن برضوا
نورهان .. بنت .. عيب
فيروز .. يعني عاجبك اللي عمله معايا امبارح ؟!!
نورهان .. باباكي وخايف عليكي
فيروز .. انا مقلتش حاجة . بس مش مديني فرصة اني اتكلم معاه .. افهمه اللي حصل .. علطول شخط ونطر وشتيمه وضرب كمان .. زي ما اكون مجرم عنده في القسم!! مش كفايه انه متحكم في كل شئ في حياتي !! حتي ما خلانيش ادخل الكلية اللي بحبها ودخلني كليه مش بحبها
نورهان .. بس كلية الطب دي مش وحشة يا فيروز .. عشان حتي تبقي دكتورة زي ماما !!
فيروز .. يا ماما انا مش عاوزه ابقي دكتوره .. انا عاوزه ادخل المعهد العالي للسينما .. انا عندي موهبه .. نفسي اكون ممثلة
نورهان .. انتي عرفة ان بابا رافض فكرة التمثيل اطلاقا يا فيروز
فيروز .. ومالهم الممثلين بس ؟!
نورهان .. ملهمش .. بس بابا مش بيحب المهنه دي
فيروز .. بس انا بحبها .. ومش فرض عليا اني عشان بابا مش بيحبها انا محبهاش ولا فرض عليا اني احب مهنة الطب اللي انا فعلا مبحبهاش لأن بابا بيحبها .. انا من حقي يكون ليا شخصيتي المستقلة
نورهان .. عادي كملي طب وبعد ما تخلصي ممكن تدخلي معهد السينما وياما اطباء وبقوا ممثلين زي يحيي الفخراني وفؤاد خليل وغيرهم كتير
فيروز .. يعني حضرتك موافقة ادخل معهد السينما ؟!!
نورهان .. موافقة طبعا بس خلصي طب الاول وليكي عندي واحدة واحدة اقنع بابا بكل اللي انتي عاوزاه
فيروز .. ايوا كدا يا ست الكل خليكي في صفي بقي .. لأني بجد بقيت احس اني وحيده
نورهان .. لا فيروز .. ازاي تحسي انك وحيدة واحنا كلنا حواليكي وبنحبك
ثم تضمها الي حضنها وتقبلها في رأسها
نورهان .. لسة مش عاوزة تروحي الكلية ؟!!
فيروز .. معلش يا ماما سيبيني انهارده بس
نورهان .. حاضر .. ويكون في علمك دي اخر مره تغيبي فيها عن الكلية .. يلا انا رايحة المستشفي .. عايزة حاجة ؟؟
فيروز .. لا يا ماما
نورهان .. باي يا حبيبتي
فيروز .. باي
وبعد ان تنصرف الام فيروز تفتح الفيسبوك لتجد خبر صادم ؟!!
تابعوني والبارت التالي اليوم ان شاء الله .. تحياتي الكاتب المصري محمد مالك.
حضرتك كده بتلخبطنا نخلص القديم الأول
ردحذفأزال المؤلف هذا التعليق.
ردحذف