رواية حياتك ثمن عذريتي للكاتب المصري محمد مالك
البارت الرابع
وكيل النياية .. هوانت عرفت ازاي ان امبارح كانت دخلة الدكتورة مي والدكتور وائل؟!!عصفور مرتبك .. دا .. دا .. دا الواد حسن اللي في شاعرنا شغال في محل الكوافير اللي راحت عنده حرمنا المصون عشان تتمكيج وتتزوق لراجل تاني ميجوزلهاش شرعا لما شافها جه قالي علطول رحت الفرح لقيتها هي مي مراتي .. مراتي اللي مرمغت شرفي في الوحل وخلت سيرتي علي كل لسان
مي بغضب واضح .. انت اكيد مجنون مش طبيعي
وكيل النيابة .. وانت ويقصد وائل اسمك وسنك ومهنتك وعنوانك
وائل ..وائل زهران عبد السلام .. ٣٤ سنة .. طبيب امراض باطنية ش سوريا المهندسين
وكيل النيابة .. انت متهم بأنك قمت بعقد قرانك علي الدكتورة مي نور الدين مع العلم انها متزوجة بالمدعو عصفور حمدان وما زالت في عصمته حتي تاريخه
وائل .. محصلش .. الراجل دا كداب ونصاب ولا يعقل ابدا ان في دكتورة واستاذة في كلية الطب هتتجوز من نجار مسلح مفيش اي مبرر لكدا اطلاقاً
وكيل النيابة .. يعني انت بتشكك في اقوال المدعو عصفور وفي وثيقة الزواج المقدمة منه لنا ؟
وائل .. انا مش بشكك انا متأكد ان الكلام دا كله كدب والقسيمة دي مزورة وان وراه دافع عشان يعمل كدا وكمان بتهمه بالتزوير والتضليل وتشويه سمعة زوجتي
وكيل النيابة .. بس انت يا دكتور لما عقدت قرانك عليها مكنتش تعرف الموضوع ده ؟!!
وائل .. لا طبعا .. الفيلم العربي دا كله اول مرة اعرف بيه لما جت الشرطة عندنا البيت واخدتنا بهدوم البيت في نص الليل
وكيل النيابة .. عصفور .. هل لديك اقوال اخري ؟!!
عصفور .. نعم ؟!!
وكيل النيابة .. عايز تقول حاجة تاني ؟
عصفور .. عايز اقول ان الست دي مراتي قدام ربنا وقدام الناس والقانون كمان وراحت اتجوزت من راجل تاني وهي لسه علي ذمتي انا بتهمها بالزني وبطالب بتوقيع اقصي عقوبه عليها هي والكائن ده ويقصد وائل
وكيل النيابة .. وانتي يا دكتورة عاوزة تضيفي حاجة؟
مي .. عاوزة اقول ان كلام البني آدم دا كدب وافتراء انا متجوزتش غير من وائل وبس وعاوزة اعرف هو ليه عمل كدا ومين اللي مسلطه عليا؟!!
وكيل النيابة .. دكتور وائل هتضيف حاجة في اقوالك ؟
وائل .. زي ما قالت مي ان ده راجل كداب وان في حد ورا الموضوع ده وهو اللي قايلة يعمل الفيلم دا كله بهدف ايه ؟ معرفش
وكيل النيابة .. هنشوف .. اكتب يابني امرنا نحن عصام المنياوي وكيل النائب العام اخلاء سبيل المدعو عصفور حمدان من سرايا النيابة وحبس كلا من المتهمه مي نور الدين عثمان ووائل زهران عبد السلام اربعة ايام علي ذمة التحقيق واستعداء كلا من السيد عبد الباسط خليل المأذون الشرعي ومحرر قسيمة عقد الزواج رقم ١٢٦٧ والمؤرخة بتاريخ ١٣ /١٢ والسيد اسعد شوشة وكيل السيدة مي عز الدين والسيد احمد حسين محمود والسيد محمد همام مرسي الشهود علي قسيمة الزواج سالفة الذكر علي ان يتم استدعائهم للمثول امامنا باكر
وكيل النيابة .. امضوا يا حضراتكم
مي .. طب انا عاوزة اعرف ايه لزمته حبسنا بقي انا ووائل اربع ايام علي ذمة التحقيق ؟! حضرتك افرج عننا ولما تطلبنا في وقت هنيجي ونقف قدامك
وكيل النيابة .. معلهش لصالح التحقيق
مي .. يعني عشان صالح التحقيق تحبسني انا وجوزي ليلة فرحنا بتهمه زور وتفرج عن الكداب النصاب ده .. هو ايه العدل اللي احنا بقينا فيه ده ؟!!
وكيل النيابة .. هو حضرتك جاية تعلميني افرج عن واحبس مين انا هنا وكيل النيابة واللي انا بشوفه لصالح التحقيق بعمله واذا كنتي حضرتك حاسة انك مظلومة اكيد هيبان
مي .. بس دا ظلم
وكيل النيابة .. تاني ؟!! انا لولا مقدر موقفك كنت وجهتلك تهمة اهانة عضو من اعضاء النيابة
وائل .. خلاص يا مي . طب يا فندم مينفعش تفرج عننا بضمان محل الاقامة او حتي بضمان مادي مش مشكلة
وكيل النيابة .. أسف .. واتفضلوا بقي . عشان اشوف غيركم ثم يضغط جرس الباب فيدخل العسكري ثم يقول .. خدهم يابني
تخرج مي ووائل وعصفور خارج مكتب وكيل النيابة
مي بأسي وحزن عميق .. انا مش مصدقة اللي بيحصل ده .. ده اكيد كابوس
وائل .. انا مش عارف مين البني آدم ده وطلعلنا من انهي داهيه ومين مسلطه علينا وايه الدافع من ورا دا كله؟!!
مي .. لازم اكلم ماما تشفلنا محامي
وائل ينظر لعصفور نظرة غل وغضب
عصفور .. ان ما حبستك يا كتكوت انت وهي مبقاش انا عصفور .. سلام يا ميمي .. ههههههه
مي بغيظ .. شايف بيقول ايه؟!!
وائل .. بقلك ملذوذ دت شخص اهبل وعبيط ومضحوك عليه وهيلبسها في الاخر
مي .. ايه اللي بيحصلنا بس دا ياربي ؟؟!
امين الشرطة .. امشي يا استاذ انت وهي انتم مفكرين نفسكم ماشيين ع الكورنيش عمالين تحكوا ؟!! انتوا هنا في سرايا النيابة يعني الزم الصمت
وائل .. يا حول الله يارب .. حاضر يا سيادة الامين اتنطط انت كمان هي جت عليك يعني !!
الامين .. بتقول ايه يا استاذ ؟!!
وائل .. وكمان استاذ !! مبقلش حاجة ادينا سكتنا
احداث الرواية بدأت في الاشتعال .. تابعوني والبارت الخامس .. تحياتي الكاتب والسيناريست المصري محمد مالك.
تعليقات
إرسال تعليق