معلش اتأخرت عليكم .. تفاعل كبير بقي عشان نخلصها انهارده..
#دليل_خيانتي
ج ٥
للكاتب المصري محمد مالك
جميع الحقوق محفوظة
وائل ونادر يجلسان مع بعضهما في كوفي شوب ووائل تبدوا عليه مشاعر الندم والحزن ونادر يبدوا انه مستاء جدا
نادر .. انا مش قادر اصدق ابدا اللي حصل !! انت يا وائل تشك فيا وعاوز كمان تقتلني ؟!
وائل بصوت حزين .. معلش يا نادر سامحني انا اعصابي تعبانه جداا اليومين دول ومش قادر اتحكم في انفعالاتي ولا في تصرفاتي !!
نادر .. بس مش لدرجة انك تشك في صديق عمرك وعاوز تقتله ؟! انا بجد في ذهول
وائل .. خلاص بقي يا نادر قولتلك معلش انا فعلا اتهورت بس انت عارف الضغط النفسي الرهيب اللي انا بمر بيه دلوقتي .. انا في دوامة وحيرة يا نادر
نادر .. يعني لولا سوسن مراتي هي اللي عارفة حكاية الهدوم دي انا كان زماني دلوقتي مع الاموات وبإيد مين ؟! صديق عمري وشريكي كمان !!
وائل .. خلاص بقي يا عم انت مابقولك اعصابي تعبانه واللي انا فيه مش قليل حط نفسك مكاني وانت تعرف حجم العذاب اللي انا فيه
نادر .. انت اللي معذب نفسك بنفسك وماشي تدور ورا اوهام في دماغك
وائل بغضب .. مش اوهام !! للأسف طلع حقيقة
نادر مرتبك .. ايه هو ده اللي طلع حقيقة ؟!
وائل .. محمد وشيماء مطلعوش ولادي !
نادر .. ازاي ؟! يابني انت مش عملت التحليل واتأكدت انهم ولادك ؟!
وائل .. انا عدت التحليل تاني في فرنسا وطلعوا مش ولادي للأسف يعني الاعتراف فعلا حقيقي ودول ولاد الكلب اللي كان معاها في العربية ؟!
نادر .. انت هتجنني يا جدع انت ؟! انت مش لسة قايل ان الظابط صلاح بيمدح في الاخ اللي كان مع مراتك في العربية وقت الحادثة وان التحريات اثبتت ان مفيش بينهم اي علاقة
وائل .. وانت مصدق التحريات دي ؟!
نادر .. وليه مصدقهاش ؟! ايه مصلحتهم انهم يداروا عنك الحقيقة ؟!
وائل .. وليه ميكونوش اصلا معرفوش يوصلوا للحقيقة ..وان اللي وصلوله ده مش هي الحقيقة .. صح ولا لا ؟!
نادر .. انا مش عارف اقولك ايه بصراحة
وائل .. مش عاوزك تقول حاجة خالص لأني مش هسمع لأي صوت غير الصوت اللي جوايا انا وبس .. بس انت متأكد انك متعرفش عزت ده ؟
نادر .. هترجع تشك فيا تاني ؟! ما انت عارف اصحابي كلهم وانا قولتلك ان ده صاحب محمود وجه معاه النادي سعتها وطلب انه يتصور معايا باعتباري رجل اعمال مهم ومعروف وفيه حاجة كمان مش جايز يكون التحليل اللي انت عملته في فرنسا مش مظبوط ؟
وائل .. جايز اه وجايز لا .. ع العموم انا هاعيده تاني وكويس اني ما اتسرعتش وقتلت الولاد
نادر مصدوم ..يخرب بيتك .. انت كنت هتقتل الولاد ؟!
وائل .. ايوه
نادر .. انت مجنون يابني انت ؟! حد يقتل ولاده ؟! وبفرض انهم مش ولادك زي ما بتقول هما ذنبهم ايه ؟!
وائل .. ذنبهم انهم ولاد مريم .. الانسانه الوحيدة اللي انا حبيتها في حياتي واخلصت ليها وفي المقابل هي خدعتني
نادر .. بس انت لحد دلوقتي متأكدتش انها خدعتك فعلا او لا .. بقولك ايه العيال من انهارده يجوا يباتوا عندي مع ولادي ميستنوش معاك تاني ونصيحة مني سافر كده كام يوم بره مصر غير جو لأن فعلا اعصابك تعبانه وبقيت تتصرف تصرفات مش طبيعية .. بقولك ايه روح اليونان خدلك اسبوع هناك ولا اسبوعين
وائل .. انا مش هسافر ولا هسيب هنا غير لما اوصل للحقيقة ولو عاوز الولاد خدهم اشبع بيهم انا اصلا مبقتش طايقهم
وائل ينصرف ويترك نادر بمفرده ونادر يحادث نفسه قائلا
نادر .. شكلك مش عاوز تجيبها لبر !! انت حر يا عم وائل !
ونذهب الي الظابط صلاح حيث ورد تقرير خبير الخطوط يثبت ان الخط الموجود في الاعتراف وعقد الزواج العرفي هو فعلا خط عزت وايضا اسم مريم علي عقد الزواج هو توقيعها وخط يدها
صلاح يقرأ التقرير ويقول .. الحكاية كل شوية عماله تتعقد وشكلنا هناخد وقت لحد ما نوصل للحقيقة !!
ثم يدخل العسكري ويقول .
العسكري .. في واحدة بره عاوزة تقابل سيادتك يا فندم
ثم يعطيه البطاقة وصلاح ينظر في البطاقة ثم يقول
صلاح .. خليها تتفضل
وتدخل اسراء خطيبة المرحوم عزت اللي كان مع مريم في العربية وقت الحادثة
اسراء .. صباح الخير يا فندم
صلاح .. صباح النور .. اتفضلي اقعدي
اسراء .. شكرا .. طبعا حضرتك عارفني ؟
صلاح .. اكيد .. انتي خطيبة المرحوم عزت
اسراء .. ايوه انا
صلاح .. تحت امرك
اسراء .. انا كنت جاية لحضرتك عشان اقول علي حاجات غريبة حصلت مع عزت في اخر كام يوم قبل الحادثة
صلاح .. زي ايه ؟! ياريت تحكي بالتفصيل
اسراء .. انا هاقول لحضرتك كل حاجة بالتفصيل
ونذهب الي سوسن حيث عاد نادر الي المنزل ويبدوا عليها الغضب الشديد
سوسن .. تعالي بقي فهمني ايه حكاية هدوم مريم دي ؟! وايه اللي جابها عندنا في الشقة وحطها جوة الصندوق ؟! اظن انت وعدتني هاتقول الحقيقة بعد ما خلتني كدبت علي صاحبك وائل وقولت انها جت عندي واصرت تغير هدومها بعد ما عاجبها فستان من فساتيني وحبت تلبسه وتخرج بيه !!
نادر يقبل يدها .. انا مش هنسالك الموقف ده ابدا يا حبيبتي .. انا لولاكي كان زمان وائل قتلني
سوسن .. بقولك ايه مش هتعرف تبلفني المرة دي قول الحقيقة احسنلك لأني انا ناويالك بجد
نادر .. طبعا يا قلبي وانا اقدر اخبي عنك حاجة يا مراتي يا حبيبتي.. تعالي اقعدي جمبي كده وانا هاقولك كل حاجة
ونذهب الي وائل حيث ذهب الي منزل محمود ليسأله عن عزت وتقابلة زوجته حنان
وائل مندهش.. متعرفيش راح فين بالظبط ؟
حنان قلقة .. معرفش هو جاله تليفون ونزل بعدها علطول وكان مستعجل لدرجة انه مكملش فنجان الشاي بتاعة
وائل .. وجاله تليفون من مين ؟
حنان .. معرفش .. مقاليش نزل جري وما ادانيش فرصة حتي اسأله في ايه !!
وائل .. طيب لما يرجع خليه يكلمني ضروري
حنان .. حاضر .. بس انا قلقانه اوي خايفة يكون حصله حاجة .. اول مرة يغيب بالطريقة دي من غير ما بطمني عليه وتليفونه يفضل مقفول بالطريقة دي
وائل .. ان شاء خير متقلقيش
ونذهب الي قبر مريم حيث ذهب ابوها وامها لزيارة قبرها فوجدوا التربي منزعج جداا
والد مريم .. في ايه يا عم محروس ؟!
محروس .. الحقني يا سعت البية .. جثة الست مريم اتسرقت !!
والد مريم .. ايه ؟!!
ام مريم .. يا لهوي ؟؟؟؟!!
يتبع ....
تعليقات
إرسال تعليق