دُعا الحسرة
رواية للكاتب المصري محمد مالك
جميع الحقوق محفوظة
انا منال الشايب عمري ٢٨ سنه جاهلة مش متعملة عشان اهلي مكنش حيلتهم حاجة يعلموني بيها لأنهم كانوا ناس فقرا علي قد حالهم ابويا كان شغال عامل في مصنع حلويات وامي كانت خياطة وبعد ما جالها مرض في عنيها وضعف نظرها بطلت شغل انا ليا تسع اخوات غيري خمس بنات واربع ولاد .. انا الكبيرة وهما كمان زيي ما اتعلموش مفيش غير سليم اخويا هو الوحيد اللي اتعلم فينا لأنه كان غاوي علم وعنده اصرار انه يتعلم وياخد شهادة كبيرة .. محدش صرف عليه .. هو كان بيشتغل صبي ميكانيكي وصرف علي نفسه لحد ما ربنا كرمه واخد بكالوريوس طب وعشان كان متفوق اتعين معيد في الكلية وبعدها سافر بعثة لليابان عشان ياخد الماجستير من هناك .. بعدها انقطعت اخباره وبطل يتصل بينا خالص ؟! مش عارفه ايه السبب ؟!! انا طول عمري وانا متمرده علي حياتي وعيشتي ومش عاجبني العجب ولا راضية ابدا باللي ربنا قاسمهولي !! وفي مرة وانا قاعدة ولا علي بالي جاتلي ام زينب ست جيرانا وشغالة خاطبة وداية ومعددة وكل حاجة !! ولقيتها بتزغرد في قلب البيت
منال .. مالك يا ولية بتزغردي ليه ؟!
ام زينب .. بزغرد عشانك ياختي !!
منال .. بتزغردي عشاني انا ؟! ليه ان شاء الله ؟!
ام زينب .. عشان جايلك عريس زي الفل ..
منال .. عريس !! ليا انا ؟!
ام زينب .. ايوا ليكي انتي .. عريس ابهه .. واجاهة ايه وقيمة ايه وسيمة ايه !! حاجة ع الفرازة .. بصي شوفي كده
منال مندهشة .. يخرب بيتك دا راجل عجوز ؟!
ام زينب .. اه عجوز .. بس قلبه شباب وبقوة ٧٠ حصان دا متجوز اربعة في عين العدو وكلهم بنات من سنك
منال .. وكمان متجوز اربعة ؟! تصدقي بالله .. لولا اني واخدة عهد علي نفسي اني ابطل غلط وقلة ادب علي مخاليق ربنا .. انا كنت وريتك مقامك يا ولية انتي ؟!
ام زينب .. توريني مقامي ؟! جزاتي اني جايبالك عريس مليان ؟!
منال .. مليان !! اه .. عندك حق ما هو اللي في سن ده اكيد مليان امراض ملهاش اول من اخر !! يا ولية يا اللي ما تتسمي دا قد عمري ٣ مرات !!
ام زينب .. ما انا قلتلك يا عنيا .. الشباب شباب القلب وبعدين زي ما هو مليان امراض .. مليان كمان فلوس ملهاش اول من اخر !!
منال .. ليه بيشتغل ايه بسلامته ؟!
ام زينب .. ده مقاول كبير اوي ومعاه ملايين متلتلة !!
منال .. ملايين حته واحدة ؟!.
ام زينب .. اومال حتتين ؟! ده عنده عمارتين في الزمالك واجنس عربيات ومستودع حديد واسمنت وبعدين زي ما قلتي كده مليان امراض .. يعني انفاسه في الدنيا بقت معدودة .. افهمي انتي بقي
منال تفكر قليلا ثم تقول .. هو عنده اولاد ؟!
ام زينب .. لا مبيخلفش .. سبحان الله ربك مش بيدي كل حاجة ؟!
منال .. هما الاربعة علي ذمته ؟!
ام زينب .. ايوه
منال .. اومال هيتجوز الخامسة ازاي ؟!
ام زينب .. ما هو هيطلق واحدة عشان يتجوزك
منال .. لا .. يطلقهم كلهم .. لو عاوزني فعلا مفيش واحدة تبقي علي ذمته غيري .. تمام ؟!
ام زينب .. معرفش هيوافق ولا لا .. اقوله واشوف رده .. بس المهم انتي موافقة ؟
منال .. ايوه موافقة بس بالشرط اللي قلتلك عليه .. اه .. حكم انا زي الفريك محبليش شريك .. قليلي يا وليه انتي .. هو شافني فين ؟!
ام زينب .. هو اصله بيدور علي عروسة وكلمني وانا بصراحة وريته صورتك واعجب بيكي اوي !!
منال .. وانتي جيبتي صورتي منين ؟!
ام زينب .. امك اديتهالي بصراحة .. قالتلي شوفي عريس ل منال
منال .. امي انا عملت كده ؟! دي ليلتها سوده معايا انهارده
ام زينب .. لا والنبي ما تكلميها عشان خاطري .. دي قالتلي مقولكيش علي حكاية الصورة دي .. انا اللي خلاني بس انسحبت من لساني ؟!
منال .. طول عمرك ولية مسحوبة من لسانك !!
ام زينب .. انا ؟! الله يسامحك .. طب بالاذن
منال .. اذنك معاكي ياختي ..
ام زينب .. وهارد عليكي .. ماشي
منال .. ولو مردتيش ..عادي .. مع السلامة
وبعد ان تنصرف ام زينب وتغلق منال باب الشقة تقول لنفسها
منال .. بقي بتدللي عليا يا امي عشان تجوزيني .. ماشي !!
الرواية من واقع المجتمع وفيها عظة وعبرة .. تابعوني ..
تعليقات
إرسال تعليق