رواية سفاحا من ابي
البارت الاول
للكاتب المصري محمد مالك
جميع الحقوق محفوظة
مشهد/1 منزل ماهر السمان الشهير بماهر كونياك نهار داخلي
حيث يقيم ماهر السمان مع أبنته يسرا في شقته بالمهندسين وهي الان تقوم بتحضير طعام الغداء وتقوم بوضع الاطباق على السفرة بيد واليد الاخريتمسك بكتاب مدرسي تذاكر به وهي الان تخرج من المطبخ وتحمل طبق الارز وتنادي علي أبيها ماهر :ـ
يسرا :ـ بابا ...يا بابا .. ( تضع الطبق على السفرة وتتنهد ) أف
( تدخل مرة أخري الي المطبخ وتقوم بأحضار طبق السلطة وتسير نحو السفرة وهي تنظر في كتابها )
يسرا :ـ وبعدين بقي ... يابابا ... يابابا
(يخرج ماهر من غرفته يفرك في عينيه )
ماهر :ـ في أيه يابت المسروعة ... بابا بابا ( يجلس على طربيزة السفرة )
يسرا :ـ الحق عليا اني بصحيك عشان تتغدي
ماهر :ـ أتغدي.. ليه هي الساعة كام؟
يسرا :ـ الساعة 6 المغرب
ماهر :ـ يااااه هو أنا نمت كل ده ... ومصحتنيش ليه يا بت الكلب من بدري
يسرا :ـ والله صحيتك .. وأنت مردتش تصحي .. كان ناقص أضربك بحاجة عشان تقوم
ماهر :ـ تضربيني يا بت الكلب ... ما هو ده اللي ناقص يا بت عواطف
يسرا :ـ ملكش دعوة بأمي ... سيب أمي في المكان اللي هي فيه ... وخليك في اللي أنت فيه
ماهر :ـ وأيه اللي في أيدك ده .. كتاب أبله نظيرة ؟
يسرا :ـ ده كتاب العلوم ..انت ناسي أني أنا في الاعدادية السنه دي
ماهر :ـ الاعدادية ... جاتك ستين نيلة ... يعني هتبقي اية دكتورة يا بت عواطف الممرضة
يسرا :ـ أن شاء الله هبقي دكتورة ... وهفرسك يا ماهر يا كونياك
ماهر :ـ (يتعصب )عرفة يا بت الكلب لو قلتي كلمة كونياك تاني .... هكسر عضمك .... غوري أعمليلي فنجان قهوة... ( تذهب يسرا لأحضار القهوة ) قال دكتورة قال ... جاتك ستين نيله وانتي فقرية زي أمك
ـ قطع ـ
مشهد / 2 فيلا د/ غيداء البحيري المحامية بالنقض نهار / داخلي
تطرق أبنتها الدكتورة / نسرين دكتورة النساء والتوليد حيث حضرت وهي وزوجها الدكتور / فيصل والذي قد سافرا الي اليابان ليحصل زوجها علي الدكتوراه من جامعة كيوتو وذلك لحضور سبوع أبنة اختها المذيعة ريهام ويرن جرس الباب وتتوجه دادا عفاف لتفتح الباب ..
عواطف :ـ ايوة أديني جاية أهوه
د / نسرين :ـ السلام عليكم ... ازيك يادادا
عواطف :ـ دكتوره نسرين ... حمدالله علي السلامة يا بنتي ( ثم تقبلها ) ازيك يا دكتور فيصل
فيصل :ـ ازيك يا دادا
عواطف :ـ ايه المفاجأة الحلوة دي ... دي الدكتورة هتفرح أوي لما تشوفك
د / نسرين :ـ ماما ... هي فين وحشاني أوي
تنزل غيداء من أعلي السلالم الداخلية للفيلا
غيداء :ـ مين يا دادا
نسرين :ـ ازيك يا ست الكل
غيداء :ـ ( بفرح شديد ) نسرين
ـ قطع ـ
مشهد / 3 داخل ورشة ماهر السمان لميكانيكا السيارات ليل داخلي
يجلس ماهر على مكتبه بالورشة يتناول الشيشة وأمامه احد الزبائن يحاسبه علي اصلاح سيارته.
ماهر :ـ ايه دا يا باش مهندس
الزبون :ـ دول 20000 جنيه يا حج
ماهر :ـ نعم ... عمرة موتور وظبط زوايا وسنكرة ودوكو وتنجيد كراسي ب 20000 ج بس ... انت مش عايش في الدنيا ولا ايه ... انت مش عارف الدولار بكام انهاردة
الزبون :ـ امال عايز كام بس ياحج
ماهر :ـ قدهم تاني
الزبون :ـ ده كتير أوي ياحج
ماهر :ـ ده حق المونه والصنايعية وغلاوتك ... والله ما خت قرش ابيض في جيبي ... ده عشان بس خاطر المرحوم أبوك كان حبيبي... وبعدين دا انا سلمتك العربية زيرو كأنك لسة مشتريها من المعرض
الزبون :ـ ماشي يا حج .. بكره هجبلك خمسة تاني
ماهر :ـ بس..
الزبون:ـ عشان خاطر المرحوم أبويا كان حبيبك ...كدا كويس
ماهر :ـ ماشي يا باش مهندس ... الا قلي هو المرحوم أبوك كان أسمه أيه؟
ـ قطع ـ
مشهد / 4 داخل فيلا د/ غيداء البحيري ليلي / داخلي
حيث تجلس غيداء مع أبنتها في البلكون وتتناول غيداء فنجانا ً من الشاي وأمامها نسرين تتحدث بالتليفون المحمول مع اختها ريهام لتبارك لها على المولود الجديد:ـ
نسرين :ـ الف الف مبروك يا ريهام يا حبيبتي ... يتربي في عزك انتي وطارق ... سمتوه ايه بقي ... ثائر ... حلو اوي الاسم دا... ربنا يجعله كدا دايما ُثائر في الحق ...يااارب يا ريري يا اختي ... أدعيلي ... بكره ان شاء الله هنكون عندك ... الله يسلمك يا حبيببتي.. مع السلامة0
غيداء:ـ مكنش ليه لزوم يا بنتي تيجي وتتعبي نفسك ... المشوار صعب
نسرين :ـ ده كلام يا ماما .... لو مكنتش أجي عشان أحضر سبوع أبن أختي الوحيدة .. أجي عشان مين
غيداء :ـ بنا يخليكم لبعض ... قوليلي بقي ... جوزك عامل ايه في رسالة الدكتوراه
نسرين :ـ اهوه بيواصل الليل بالنهار عشان يخلص ... تعب اوي والله يا ماما
غيداء :ـ معلش يا حبيبتي ... بس لما ياخد الدكتوراه هينسي التعب دا كله
نسرين :ـ يارب
غيداء :ـ وبالنسبة لموضوع الخلفة ... بيتكلم معاكي فيها
نسرين :ـ من ناحية فيصل مش محسسني أبدا ًأن في مشكلة عندي ... بالعكس سايب الامور ماشية عادي جدا ً ولما بتكلم معاه يقلي دي حاجة بتاعة ربنا ... أنا اللي تعبانه اوي يا ماما
غيداء :ـ من ايه يا حبيبتي
نسرين :ـ يعني 5 سنين بتعالج من موضوع ضعف التبويض ومافيش فايدة ... وبصراحة أبتديت أيأس
غيداء :ـ اوعي تقولي كلمة زي كدا تاني ...اليأس يعني قنوط من رحمة ربنا والليعاذ بالله ... وبعدين يا بنتي أنتي بتعملي اللي عليكي وبتاخدي بالاسباب ... الباقي بقي بتاع ربنا مش بتاعك انتي ...فهنتي
نسرين :ـ فهمت ( ثم يدخل فيصل اليهم )
فيصل :ـ يعني عشان مامتك وحشاكي هتفضلي ترغي معاها طول الليل وسايباني قاعد برة عصافير بطني بتصوصو ... ينفع كدا يا حماتي
غيداء :ـ لا مينفعش طبعا ً
فيصل :ـ طب ممكن نتعشي بقي
غيداء :ـ (تضحك ضحكة خفيفة ) ممكن ـ قطع ـ
مشهد / 5 داخل ورشة ماهر السمان ليلي داخلي
حيث يغلق ماهر خزنته الخاصة بعد ان أخذ منها بعض المال ووضعة في جيبه وفجأه يدخل عليه أحد العاملين بالورشة ويدعي صفوت :ـ
ماهر :ـ أنت لسه ممشتش يا صفوت
صفوت :ـ ولا حد من العمال راض يمشي يا حج
ماهر :ـ ليه أن شاء الله
صفوت :ـ العمال بقالهم 3 جمع مقبضوش مليم وأنا شرحهم ... وحضرتك عارف... اللي مبيصرفش فينا علي بيته وعياله بيصرف على أمه وابوه ... والحياه بقت صعبة يا حج
ماهر :ـ أه ... عايزين فلوس يعني ... ماشي ... بكرة أن شاء الله
صفوت :ـ ليه ... مينفعش تحاسبنا دلوقت يا حج ؟
ماهر :ـ لا مينغفعش ... معيش فلوس
صفوت :ـ معاكش ازاي يا حج ...وأنت محاسب تلات زبايين أنهاردة وقابض منهم لا مؤاخذه الوفات
ماهر :ـ أنت بتعد عليا الزباين ياض يا صفوت
صفوت :ـ لا يا حج .. ربنا يزيد ويبارك ... بس أحنا شقيانين برضه
ماهر :ـ ولا متكترش ... ولم نفسك أنت والعيال الصنايعية وغوروا روَحوا .... قلت بكرة هحاسبكم...ماشي
صفوت :ـ ماشي يا حج ... وبكرة مش بعيد برضه ... تصبح علي خير يا حج ( ثم ينصرف )
ماهر :ـ جاتكم البلاوي في اشكالكم العرة ... الواد بيعدلي الزباين ... ميعرفش ان ورايا هم ما يتلم ومصاريف ما ليها أول من اخر.
ـ قطع ـ
مشهد/6 داخل شقة ماهر السمان ليلي داخلي
يسرا تجلس على مكتبها الصغير داخل حجرة نومها وفوق المكتب مجموعة من الكتب والملخصات وعلي الحائط من جهة اليسار صورة للمرحومه أمها وهي الان تحفظ من كتاب وتكتب ما تحفظه في ورقة خارجية ثم يرن الموبيل والمتصل منال أبنة خالتها0
يسرا :ـ الو قطع وانتقال الي
منال :ـ الو ... ايه ... كنتي نايمه قطع وعودة الي وهكذا...
يسرا :ـ لا ... قاعدة بذاكر والله
منال :ـ يا بنتي أرحمي نفسك شوية ... مش كدا
يسرا :ـ أرحم نفسي أزاي بس والامتحانات خلاص قربت... ده انا شهادة يا بنتي السنة دي
منال :ـ ماشي ... بس أنتي بترهقي نفسك أوي في المذاكرة... ده انا كل ما بكلمك الاقيكي بتذاكري
يسرا :ـ نفسي أجيب مجموع كبير وادخل كلية نضيفة ...وأحقق حلم ماما الله يرحمها ... يلا هانت
منال :ـ الله يرحمها ... ربنا يوفقك ... أسكتي مش الواد علاء واد عم سيد السباك اللي علي أول الشارع عايز يتقدملي
يسرا :ـ أنتي أكيد بتهزري
منال :ـ والله ما بهزر ... أبوه كلمني انهاردة الصبح وأنا راجعة من المدرسة وعايزين يجوا يقابلوا بابا
يسرا :ـ أنتي عبيطة يا بنتي ... الواد ده جاهل .. مبيعرفش يكتب أسمه
منال :ـ بس بيعرف يكتب على مكنة الصراف الالي ... يا بنتي ده عنده عربيات ولا عربيات محمد رمضان
يسرا :ـ الفلوس مش كل حاجه يا جاهلة ... لازم يبقي فيه تكافئ عشان تقدروا تعيشوا مع بعض
منال :ـ الكلام ده كان زمان ... الفلوس هي كل حاجة دلوقت ... وبعدين أنتي محسساني أني انا دكتوره ... ده انا حيالله دبلوم تمريض
يسرا :ـ منطق غريب وغير مقبول ... بس للاسف هو اللي ماشي حاليا ً
منال :ـ وع العموم انا لسه بفكر .... واللي فيه الخير يقدمه ربنا .... يلا تصبحي على خير
يسرا :ـ وأنتي من أهله ... باي
ـ قطع ـ
مشهد / 7 داخل كباريه الراقصة توتا ليلي داخلي
يدخل ماهر السمان من باب الكباريه ويتوجه الي داخل الصالة حيث يوجد عدد كبير من الطرابيزات والكبارية مزدحم بالزبائن وصاحبة الكبارية ترقص على أغنية شعبية ويستقبل ماهر شخص يدعي ضاحي ويعمل مدير للكباريه ومنظم حفلات للراقصة توتا .
ضاحي :ـ اهلا ً ..أهلا ً .. أهلا ً بماهر باشا
ماهر :ـ ازيك يا ضاحي
ضاحي :ـ تمااام .. نورت الصالة يا باشا
ماهر:ـ لا وانت الصادق دي اللمض الليد اللي أنتوا ركبتوها جديد
ضاحي :ـ ( يضحك ) دمك خفيف يا باشا
( يتجه ماهر نحو طربيزة يجلس عليها رجل اعمال يدعي حامد تاجر قطع غيار سيارات وأمامه فتاه جالسه تدعي بسبوسة وتصب لحامد كأس من الخمر وحامد يتناول الكأس وهو يرقص علي الاغنية الشعبية وبصره نحو الراقصة توتا)
بسبوسة :ـ أشرب يا باشا
حامد :ـ وماله ... أشرب يا قمر
( بسبوسة تضحك بصوت عال )
ماهر :ـ أيه ... هو انت يا راجل خلفوك في الكباريه ده ونسيوك
حامد :ـ الله ... ماهر باشا ... ازيك ... أتفضل أقعد
ماهر :ـ ( يجلس بجوار حامد وينظر لبسبوسة ) ودي مين الوجه الجديد ده ... أسمك أيه يا شاطرة
بسبوسة :ـ بسبوسة
ماهر :ـ بسبوسة .... ويا تري محشية ولا سادة يا بسبوسة
بسبوسة :ـ لا ... أنسة
ماهر :ـ الله
حامد :ـ ( يقاطعة ) بقلك أيه ملكش دعوة بيها .. دي بتاعتي أنا
ماهر :ـ طب متزقش كلها يا خويا ... أنشالله حتي تحط عليها كريمة
( تضحك بسبوسة مرة أخري بصوت عال )
ماهر :ـ ادوب أنا
( ينظر له حامد بغيظ )
ماهر :ـ خلاص ... يا ضاحي
ضاحي :ـ نعم يا باشا
ماهر :ـ خد مسيلنا ع الست توتا ( ويخرج بعض المال ويعطية له )
ضاحي :ـ يوصل يا باشا ( يتوجه ناحية الراقصة ويقوم بتنقيطها قائلا ً ) ماهر بيه بيمسي عليكي يا ست الكل
توتا :ـ أديني نازلاله
(وعلي احد الطرابيزات الاخري تجلس أميرة أبنة ضاحي مع رجل اخر يدعي هاشم وهي فتاه صغيره يجبرها أباها على الجلوس مع الزبائن وهي غير مقتنعة بذلك فهي فتاه متدينه ترفض ما تفعله وهي الان جالسة وقد بدت عليها مظاهر الضيق والعبس الشديد )0
هاشم :ـ ( ينظر في الكأس ويجده فارغا ً ) الله ... ما تصبيلي كاس يابت .. مش شايفاه فاضي قدامك
أميرة :ـ ( تتنهد وتمسك بالزجاجة وتصب له كأس ) أتفضل
هاشم :ـ أنتي في حاجة مدايقاكي
أميرة :ـ لا
هاشم :ـ طب ماتيجي جمبي ... فاعدة بعيد ليه
أميرة :ـ كدا كويس
هاشم :ـ طب ولعيلي السيجارة دي
أميرة :ـ أف ... ( ثم تمسك بالولاعة وتشعل له السيجارة وبعدها مباشرة يقبل يدها ) أيه ده .... متخليك محترم
هاشم :ـ نعم ياروح أمك ... محترم ... قومي يا بت من هنا ( ثم يضربها بكأس الخمره في وجهها ويتوجه ضاحي مسرعا ً نحوهما )
ضاحي :ـ فية أيه يا باشا
هاشم :ـ أيه يا عم بنتك الكئيبة دي اللي أنت مقعدها معايا
ضاحي :ـ عملت أيه يا باشا ( ثم ينظر لأميرة بغضب )
هاشم :ـ البت قاعدة معايا قرفانه مني ... وفي الاخر بتقلي خليك محترم .. ( ينهض ويخرج بعض النقودمن جيبه ويرميه على الطربيزة ) فهم بنتك يا ضاحي ... أن كلمة محترم ملهاش مكان هنا .. ماشي
ضاحي :ـ ماشي يا باشا
( ينظر هاشم اليهما بغضب شديد ثم ينصرف قائلا ً )
هاشم :ـ جاتك القرف أنت وبنتك ... عكننتوا عليا الليلة
ضاحي :ـ عجبك كدا
أميرة :ـ يا بابا...
ضاحي :ـ ( يقاطعها ) امشي روحَي .... وحسابي معاكي في البيت
( تنصرف اميرة ثم يتوجه ناحية ماهر وحامد اللذان يجلسان على الطربيزة الاخري )
ضاحي :ـ منورين يا بشوات
ماهر :ـ ما قلتك ده نور اللمض الليد يا ضاحي
( ثم تتوجه الراقصة توتا صاحبة الكبارية ناحية الطرابيزة بعد أن أنتهت نمرتها )
توتا :ـ منوريين يا بهوات
ماهر :ـ ( بدأ يسكر ) يوووووه دي شغلانه بقي
توتا :ـ ( لبسبوسة ) قومي يا بت من هنا ... شوفيلك طربيزة تانية اتلحقي عليها
حامد :ـ متسبيها قاعدة شوية يا ست توتا
توتا :ـ هبقي الفهالك في ورقة يا خويا وأنت ماشي
ماهر :ـ ( يضحك )حلوة دي
توتا :ـ لا والنبي... عجبتك أوي
ماهر :ـ كلك عاجبني يا جميل
توتا :ـ عاش من شافك يا ماهر بي
ماهر :ـ الله يخليكي شكرا ً
توتا :ـ بقي يا راجل يا واطي ... أقعدك ساعة واحدة مع البت زنوبه الرقاصة ..أفاجأ تاني يوم أنك أتجوزتها عرفي
ماهر :ـ أديكي قلتي ... عرفي ... يعني ورقتين ع السريع ... وغلاوتك الاتنين في جيبي
توتا :ـ هتفضل طول عمر ندل وواطي وغشاش كمان ... أمال فين بحبك يا توتا ... بموت فيكي يا توتا .. ماليش غيرك يا توتا
ماهر :ـ ودي الحقيقة والله
توتا :ـ حقيقة ايه يا راجل وأنت أتنيلت أتجوزت اهوه
ماهر :ـ بقلك عرفي تقوليلي جواز ... البت دخلت دماغي وحلفت اني ما المسها غير لما أكتب عليها ... قلت ماله ورقتين وندلع علي حسَهم
توتا :ـ اه ... طيب يا خويا
حامد :ـ بس سيبك أنتي زي القمر انهاردة
توتا :ـ بجد
ماهر :ـ هو انهارده بس ... دي كل يوم بدر منور
توتا :ـ ايوه يا خويا كل بعقلي حلاوه .. زنوبه أنا
ماهر :ـ فشر ... زنوبة أيه المقشفه دي اللي تشبهي نفسك بيها ... دي نزوه وعدت ... لكن أنت اللي في القلب يا قمر
توتا :ـ مضطره اصدقك عشان بحبك
ماهر :ـ ( يضحك ) طب أشربي أشربي
حامد:ـ في صحتك يا ست الكل
ـ قطع ـ
مشهد / 8 منزل طارق وكيل النيابة ليلي داخلي
غرفة النوم :ـ تستلقي ريهام على السرير وتنظر الي طارق زوجها وهو يداعب المولود في سريره
طارق :ـ ( يهز سرير المولود ) ننا هو ... ننا هو .. يلا نام ( ثم ينظر الي المولود فيجده قد نام فينظر الي زوجته ويقول بصوت خافت ) هس ... نام ( ثم يغطيه ويتوجه ببطء ناحية السرير )
ريهام :ـ نام خلاص
طارق :ـ نام ... علي فكرة ثائر دا شكلة هيبقي صعب أوي ودماغه ناشفة... ساعة احايل فيه عشان ينام
ريهام :ـ يعني هيجيبه من بره يا حضرت وكيل النيابه
طارق :ـ قصدك أنا يعني ... وماله... ياريت يبقي صعب ودماغه ناشفه ... بس في الحق
ريهام :ـ وايه كمان يا باشا
طارق :ـ ايه في ايه
ريهام :ـ يعني توقعاتك عن شخصية الولد ...في أيه تاني غير أنه صعب ودماغه ناشفة ... قول ... طلع القطط الفطسانه في الواد
طارق :ـ يعني ... أتوقع أنه هيبقي عنيد .... زي مامته طبعا ً ..رقيق .. زي مامته طبعا ً ... جذاب ... زي مامته طبعا ً ... ذكي ... زي مامته طبعا ً ... والحاجة اللي واضحة دلوقتي ومافهاش كلام .. انه ملامحه جميله جدا ً ورقيقة جداً ....
ريهام :ـ ( تقاطعه ) زي مامته طبعا ً
طارق:ـ لاء طبعا ً ... زي باباه
ريهام :ـ بقي كدا ... طب يلا قوم من جمبي
طارق :ـ بهزر معاكي يا حبيبتي ....أما دي أحلا حاجه فيه أن ملامحه كلها انتي ياحبيتي ...عنيكي .. يقك ... مناخيرك .. ضحكتك الحلوة ( ثم يمسك يدها ويقبلها) يارب يخليكم ليا ... دي انتي وثائر نور عنيا
ريهام :ـ ويخليك لينا يا حبيبي وما يحرمني منك ابدا ً
ـ قطع ـ
مشهد / 9 فيلا غيداء البحيري ليلي داخلي
غرفة نوم د/ نسرين :ـ يستلقي د/ فيصل علي السرير يقرأ في أحد المراجع الطبية وبجواره نسرين متوتره بعض الشئ تنظر اليه مرة وبعدها تتنهد ثم تنظر اليه مرة اخري وتقول:ـ
نسرين :ـ فيصل
فيصل :ـ نعم يا حبيبتي ( ما زال ينظر الي الكتاب )
نسرين :ـ فيصل
فيصل :ـ نعم يا حبيبتي
نسرين :ـ ممكن تسيب الكتاب اللي في ايدك ده وتبصلي شويه ( يغلق فيصل الكتاب وينظر اليها )
نسرين :ـ أنت بتبحلق فيا ليه كدا
فيصل :ـ أنتي مش قلتي سيب الكتاب وبصلي شوية... أديني ببصلك اهوه
نسرين :ـ يوووه ...وحياتك مش وقت هزار
فيصل :ـ مالك يا حبيبتي ... مدايقة ليه؟
نسرين :ـ فيصل ... أنت زعلان اني مخلفتش لدوقتي ؟
فيصل :ـ وايه لزمته السؤال ده؟
نسرين :ـ جاوبني ارجوك
فيصل :ـ والله انا لو زعلان انك مخلفتيش لدلوقتي ... يبقي أنا كدا بعترض على أمر ربنا .. وأنا عمري ما هعترض علي حاجة ربنا قسمهالنا أبدا ً
نسرين :ـ يعني .. مش بفتكر تتجوز تاني
فيصل :ـ لا لا لا ... انتي تفكيرك غريب انهارده .. مالك في ايه .؟ ...اه .. يمكن عشان أختك ريهام ربنا رزقها بمولود .... غريزة الامومة اتحركت عندك
نسرين :ـ أكيد نفسي تبقي ام ... وأنت مش نفسك تبقي أب؟
فيصل :ـ أكيد نفسي ... بس كل حاجة بأمر ربنا.. وادينا أهوه بنعمل اللي علينا .. وان شاء الله ربنا هيكرمنا.. بس أنتي قولي يارب ( ثم يقبلها في جبينها وتبتسم نسرين )
ـ قطع ـ
مشهد / 10 شقة ماهر السمان ليلي داخلي
يفتح ماهر باب الشقة ويتقدم الي الداخل عائداً من كباريه الراقصة توتا وقد بدت عليه مظاهر السكر ويترنح يمينا ً ويسارا ً ويتقدم الي الداخل بعد ان يشعل النور وهو يرد الاغنية الشعبية للفنانه الشعبية بوسي حط ايده ياه0
ماهر :ـ حط ايده ياه على ايدي ياه ... حط ايده علي ايدي .. اشمعني ايده يعني ... طب حط رجله ياه .. علي رجلي ياه ( يتقدم ناحية غرفة يسرا وقد أغلقت على نفسها الباب من الداخل بالمفتاح ) بت يا يسرا ... أنتي يا بت ...(يفتح الباب فيجده مغلقا ً) البت قافلة بالمفناح ...بت الكلب ...زي ما أكون هاكلها ولا ايه ... هاكلها ... ايوه انا عايز حاجة اكلها أنا جعان ( يتوجه ناحية السفرة فيجد نسرين أحضرت له الطعام وغطته بقطعة من القماش فيسحب قطعة القماش فيجد الطعام ) الله ... أكل ...( ثم يتناول قطعة من الدجاج ويأكل منها ثم يتوجه الي غرفة النوم وهو يردد نفس الاغنية ثم يرمي بنفسه على السرير ويغرق في النوم)
ـ قطع ـ
مشهد / 11 أمام مبني النيابه العامه نهار خارجي
تقف سيارة الشرطة ويخرج منها أربعة نساء مكلبشين يتم عرضهم علي النيابة العامة بتهمة ممارسة الدعارة يقودهم أثنان من العساكر ويخرج الضابط من السيارة ويتوجه نحوهم ويقول :ـ
الضابط :ـ يلا يا ماما أنتي وهي ... اتحركوا شوية
أحد السيدات وتدعي كاريمان وهي صاحبة الشقة :ـ علي مهلك يا خويا متزفش... هي النيابة هتطير
الضابط :ـ طب يلا يا ختي بلاش لماضة
كاريمان :ـ ( للضابط ) يا ختي قمر وانت بتشخط كدا... النجوم أترعبت على كتفك
الضابط :ـ طب يلا
ـ قطع ـ
مشهد / 12 داخل سرايا النيابة نهار داخلي
حيث تمثل الاربعة نساء أمام السيد / طارق عبد اللطيف وكيل النيابة وقد بدأن يتشاجرن مع بعضهن البعض0
طارق :ـ بس ... بس .. مش عايز أسمع صوت خالص ... تعالي أنتي ( يقصد كاريمان)
كاريمان :ـ نعم يا باشا
طارق :ـ أسمك أيه
كاريمان :ـ كاريمان يا باشا
( يبحث فبي البطاقات الاربع التي أمامه ثم يمسك بطاقتها وينظر في الصورة ثم ينظر اليها )
طارق :ـ مش ده بطاقتك .
كاريمان :ـ ( تنظر اليها ) تمام يا باشا
طارق :ـ أمال ايه كريمة دي؟
كاريمان :ـ ما ده أسمي اللي في البطاقة لكن اسم الشهرة كاريمان
طارق :ـ أه ...الاسم الحركي يعني
كاريمان :ـ لا ياباشا ... حد الله بينا وبين السياسة
طارق:ـ علي رأيك الدعارة أهون
كاريمان :ـ ليه بس كدا يا باشا ... أنا ست محترمه
طارق :ـ ماشي ... أكتب .. يابني .. كريمه أحمد فرغلي ... السن .. عندك كام سنة؟
كاريمان :ـ تديني كام سنة:
طارق :ـ ( بغضب ) أخلصي
كاريمان :ـ 40 يا باشا
طارق :ـ أكتب يا بني ... أربعون عاما .... ومقيمه في حدائق القبة ..س .. ما هو قولك في ما هو منسوب أنك تملكين شقة بالمهندسين عمارة 115 ... وهذا الشقة تدار لممارسة الرذيلة والاعمال المنافية للأداب
كاريمان :ـ أنا .. حد الله يا باشا بيني وبين الحرام
طارق :ـ يعني الشقة دي بتاعتك ولا مش بتاعتك
كاريمان :ـ بتاعتي يا باشا ... ملكي سيادتك ... بس أنا للبت ثنية عشان تعنلها مشغل ... والعقد أهوه ومتوثق كمان في الشهر العقاري0
طارق :ـ (ينظر في العقد ثم يقول لثنية ) دي أمضتك؟
ثنية :ـ ( تنظر في العقد ) أيوه يا باشا ... بس العقد دا مظور
طارق :ـ أمضتك ولا مش أمضتك
ثنية :ـ أمضتي يا باشا
كاريمان :ـ أنا مش كدابه يا باشا ... أنا صاحبة الشقة أه ..بس أنا أجرتها للست اللي قدامك دي ...يعني مبقتش مسئولة عنها من تاريخ الايجار ... بس وغلاوتك يا باشا لو أعرف أنها ست بطالة ومأجراها عشان تجيب فيها نسوان ... أنا مكنتش أجرتها ..أمال أية ..دا انا ست حجيت بيت ربنا تلت مرات ومرداش بالنجاسة دي
ثنية :ـ لبستهاني يا كريمة وطلعتي منها أنتي
كاريمان :ـ كريمان هانم يا بت ... ليكي عيني تتكلمي يا وحشة
ثنية :ـ ماشي ... ماشي ... أن ما وريتك
طارق :ـ بس أنتي وهي .. .أكتب يابني ... قررنا نحن طارق عبد اللطيف وكيل النائب العام حبس كلا ً من بثينة محمود عبد السلام ـ فتحية أحمد خليل ، ماريان لطفي لبيب أربعة أيام علي ذمة النحقيق كما قررنا اخلاء سبيل كريمة أحمد فرغلي من سرايا النيابة بضمان محل أقامتها ما لم تكن مطلوبه في قضايا أخري..أمضي يا ماما أنتي وهي
كاريمان :ـ ( تزغرد ) ظهر ...أيوه كدا يا حكومة ... تسلم يا باشا
( ثم يضغط جرس الباب فيدخل العسكري فيلقي التحية )
طارق :ـ خدهم يابني
( ثم يرن الموبيل الخاص بطارق والمتصل زوجته ريهام تذكره بعيد الميلاد )
طارق :ـ الو ...أيوا يا حبيبتي ...يا سلام .. مش ناسي طبعا ً ... هخلص شغل وأجي علطول ...لا مش هتأخر ... سيدنا محمد رسول الله.. مع السلامة0
ـ قطع ـ
مشهد / 13 منزل ضاحي نهار داخلي
يجلس ضاحي على كرسي الانترية في الصالة وقد بدت عليه مظاهر الغضب الشديد ثم تقبل اليه زوجته نعمة وتجلس بجوارة .
ضاحي :ـ صحيَت
نعمة :ـ صحيَت يا أخويا .. بس بالله عليك كلمها بالراحة.. ومن غير ضرب
ثم تخرج اميرة من غرفتها ترتدي أسدال وقد بدت عليها مظاهر الخوف من رد فعل أبيها وتتوجه نحوهما ثم تجلس بجوار امها
ضاحي :ـ عايز أفهم أيه سبب اللي عملتيه أمبارح
أميرة :ـ يا بابا أنا مش طايقة المكان ده ... ومش عايزة أروحوا تاني
ضاحي :ـ نعم يا روح أمك ... مش عايزة تروحيه ليه بقي يا ضنايا
أميرة :ـ يا بابا اللي بيحصل في المكان ده حرام في حرام ... وكل اللي فيه بيغضبوا ربنا ... وأنا حاسة أن ربنا بيحبني ومكرهني في الحاجات الوحشة دي ... ليه عايز تغصبني عليها
ضاحي :ـ تقلش يا أخواتي رابعة العدوية قاعدة قدامي ... انا مش فاهم حاجة من الرط بتاعك ده
أميرة :ـ يا بابا أنا بصلي وبحفظ قرأن ... وبحب ربنا أوي ... فمش قادرة أعمل حاجة تغضبة
ضاحي :ـ يكنش يا بت بقيتي تبع داعش وأنا مش دريان
أميرة :ـ داعش أيه بس ... هو أنت حياتك الغلط خلتك مش عارف تفرق بين التدين الوسطي والارهاب
ضاحي :ـ نعم ياروح أمك ... ( ينهض ثم يمسك بشعرها )هو انتي هتعمليلي فيها الشعراوي
نعمة :ـ خلاص والنبي يا ضاحي ... سيب شعر البت ( يترك شعرها بمجرد أن يدفعها فتقع علي الكرسي )
أميرة :ـ انا مش قادرة أفهم ... ازاي تقبل علي نفسك أن بنتك تقعد في أماكن زي دي ... وتسمع كلام سافل من ناس سفلة يجرحها ... وبتوصل أن أيديهم ممكن تتمد علي جسمها ... أنت أيه ... مبتغرش علي عرضك ...معندكش دم
ضاحي :ـ (بغضب شديد ) أنا معنديش دم يا بت الكلب ( يضربها بالقلم فتحاول الام ابعاده عنها )
نعمة :ـ خلاص يا ضاحي ... اهدي ياخويا
ضاحي :ـ ايه ... عايشة دور رابعة العدويه علي أيه ... أمك كانت رقاصة وأبوكي شغال في كباريه ... عايزة تطلعي أيه ... داعية ... طب عليا الطلاق بالتلانه ان ما نزلتي الشغل واشتغلتي زي الجزمة .. لأكون راميكي أنتي وأمك في الشارع ...جاتكوا القرف ع الصبح ( ثم يفنح باب الشقة وينصرف )
( ينتاب أميرة نوبه من البكاء الشديد والام تطبطب عليها )
نعمة :ـ معلش يا بنتي ... ربنا موجود وهينتقم منه أن شاء الله
ـ قطع ـ
مشهد/14 منزل عادل زوج خالة يسرا نهار داخلي
يجلس عادل وزوجته عائشة في الصالة علي أنتريه قديم وأمامهما طعام الافطار فول وبيض وجبن والاب يتناول طعام الافطار0
عائشة :ـ ايه رأيك يا عادل في العريس اللي جاي لبنتك
عادل :ـ وانا لسه قعدت معاه يا عيشة ... لما أقعد معاه اللي فيه الخير يقدمه ربنا
عائشة :ـ أنا أقصد من ناحية المبدأ..أنت موافق عليه
عادل :ـ والله مش عارف ... أنا أسمع أن الواد ألعبان وبيتعاطي مخدرات
عائشة :ـ بس أبوه معاه فلوس متلتله أد كدا
عادل :ـ طظ في فلوس أبوه ... هتعملنا ايه الفلوس لو اتجوز بنتك ورجعتلك بعد شهر ومعاها ورقتها... و كمان حامل ... ما انتي عارفة المخدرات بتعمل في البني ادم ... ربنا يحفظنا... ومتنسيش كمان ان الواد جاهل يا عيشة
عائشة :ـ يا راجل .. بلا جاهل بلا نيلة ... ياللي أخدوا الشهادات عملوا بيها ايه ... ما هم قاعدين عواطلية ابهاتهم بتصرف عليهم
عادل :ـ بس العلام برضه بينور الدماغ يا عيشة
( ثم تدخل منال وتحمل صينية الشاي عليها ثلاث كوبيات من الشاي وتضعها علي الطربيزة وتجلس بجوار أمها )
منال :ـ الشاي ... قلي يا بابا هتكلم الناس أمتي عشان تيجي
عادل :ـ لا حول ولا قوة الا بالله .... يا جماعة مالكم متسربعين ليه كدا
عائشة :ـ معلش يا خويا اي بنت بتفرح لما بيجلها عريس
عادل :ـ ماشي مقلناش حاجة .... طب حتي بعد ما تخلصي امتحانات نبقي نقعد معاه
منال :ـ يعني همتحن البكالوريوس يا بابا
عائشة :ـ يا راجل أقعد معاه بدال ما يطفش ... ده البنات علي قفا من يشيل
عادل :ـ مايطفش ولا يروح لحاله .. هو بنتك بايرة يعني .. بكره هتتوظف والف جدع يتمناها
منال :ـ ماشي ... بس ده مريش ومعاه فلوس ... وهيجيبلي كل اللي بتمناه
عادل :ـ متحسبهاش كدا يا بنتي ... ايه يعني معاه فلوس وابن ستين كلب ميعرفش ربنا يصبحك بعلقة وينيمك بعلقة ... وممكن يقتلك لا قدر الله
عائشة :ـ يا ساتر يارب
عادل :ـ امال ايه .. انتي مش بتشوفي المصايب اللي بيجبوها في التليفزيون ... اللي بيقتل مراته وعياله كمان... ما هو بسبب المخدرات اللي بتلحس المخ بعيد عنكم
عائشة :ـ لا .....أنا مش مستغنية عن بنتي
عادل :ـ عشان كدا بقلكم أهدوا لحد ما أسال عنه كويس ... وأتأكد من سيره وسلوكه ... ده جواز يا جماعة ... يعني عشرة وأطفال
منال :ـ طب خد يابابا نمرة تليفون أبوه اهيه ... عشان لما تسأل عنه تكلمه علطول ... بس متطولش والنبي
عادل :ـ هاتي .... يلا يا عيشة أحنا أتاخرنا ع الشغل
عائشة :ـ يلا بينا .... عايزه حاجة يا منال
منال :ـ ابقي شوفي هتعملي أيه على الفراخ اللي في المطبخ دي
عائشة :ـ حاضر ... هجبلك خضار وأنا جاية .... يلا... لا اله الا الله
منال :ـ محمد رسول الله ... هو أبويا مش عايزني أتجوز ولا أيه ؟
ـ قطع ـ
مشهد / 15 منزل ماهر السمان نهار داخلي
يطرق ربيع الجوكر جرس الباب وهو صاحب طربيزة القمار التي لعب عليها ماهر وقد ذهب اليه يطلب منه المليون دولار التي أقنرضهم منه منذ أسبوع ليلعب بهم وخسرهم أمام رجل صيني ووتذهب يسرا لنفتح الباب فتجد شهص يرتدي نظارة سوداء ولحية صغيرة وسلسلة في رقبته وأصابعة مليئة بالخواتم0
ربيع :ـ صباح الخير
يسرا :ـ صباح النور
ربيع :ـ الحج ماهر موجود
يسرا :ـ مين حضرتك
ربيع :ـ ربيع ... ربيع الجوكر
يسرا :ـ موجود ... أتفضل
( يدخل ربيع وهو يلتفت يمينا ً ويسارا ً الي أركان الشقة )
يسرا :ـ أتفضل حضرتك في الصالون ... ثواني بس أصحية عشان نايم
ربيع:ـ أتفضلي ( يدقق النظر اليها فتلاحظ ذلك )
( تخرج يسرا من غرفة الصالون متجهة الي غرفة أبيها متعجبه من هذا الشخص )
يسرا :ـ ودا يطلع مين دا كمان
ـ قطع ـ
مشهد / 16 منزل ماهر السمان نهار داخلي
تدخل يسرا الي حجرة نوم أبيها ماهر السمان لايقاظه فتجده نائما ً بملابس الخروج0
يسرا :ـ يا لهوي .... أنت نايم بهدوم بره ... بابا ... بابا ... أصحي ...( تحركه ) أصحي يا بابا
ماهر :ـ أيه يا بابت في أيه
يسرا :ـ واحد بره عايزك
ماهر :ـ مين عايزني
يسرا :ـ بيقول أسمه ربيع الجوكر
ماهر :ـ ربيع الجوكر ... يخرب بيته وده عرف طريق البيت منين ... أكيد الحيوان اللي أسمه صفوت قاله ع العنوان ( ثم ينظر لنفسة فيفاجأ بأنه نائم بملابس الخروج ) وده ايه ده ... ده أنا مقلعتش من أمبارح
يسرا :ـ كتر خيرك ... شقيان طول الليل
ماهر :ـ أنتي هتتريقي عليا يا بت ... أمشي أنجري أعملي فنجانين قهوه
يسرا :ـ حاضر
( تتوجه يسرا خارج الغرفة )
ماهر :ـ حاضر يا صفوت الكلب ... أن ما سودت نهارك
ـ قطع ـ
مشهد / 17 منزل ماهر السمان نهار داخلي
حجرة الصالون :ـ يدخل ماهر مرتديا ً بجامه حرير الي حجرة الصالون حيث يجلس ربيع الجوكر
ماهر :ـ أهلا ً أستاذ ربيع
ربيع :ـ ( ينهض ) حج ماهر أزيك
ماهر :ـ الحمد لله ... أتفضل
ربيع :ـ شكرا ً ... مبتسألش قلت أجي أسأل أنا
ماهر :ـ لا والله ...أنا اليومين دول مشغول في الورشه وعقبال أملتك كدا داخل علي مشاريع جديدة .. قلي عدم لا مؤاخذة ... عرفت العنوان ازاي
ربيع :ـ من الورشه
ماهر :ـ هو الكلب صفوت
ربيع :ـ نعم
ماهر :ـ شرفت يا أخويا
ربيع :ـ شكرا ً يا حج
ماهر :ـ بقلك أيه ما بلاش كلمة حج دي ... مش راكبه
ربيع :ـ وماله.... أقلك كونياك؟
ماهر :ـ ولا دي كمان... قلي ماهر بي
ربيع :ـ ولا تزعل ... ماهر باشا كمان ... المهم الارنب الاخضر ايه أخباره
ماهر :ـ أرنب ..أرنب أيه ؟
ربيع :ـ الارنب اللي أخدته مني يا عم ماهر وطار علي طربيزة القمار
( وفجأة تدخل يسرا بالقهوه فتسمع الجملة الاخيرة فتنظر الي أبيها بتعجب)
ماهر :ـ اه .... قصدك الارنب اللي طار من العشة ... يا عم هتلاقيه والله ... بس أنت دور عليه كويس
( بعد خروج أبنته من الغرفة )
ماهر :ـ ايه ياعم جوكر انت هتسيحلي قدام البت ولا أيه
ربيع :ـ عدم لا مؤاخذة من المادموزيل؟
ماهر :ـ بنتي يا سيدي
ربيع :ـ بسم الله ما شاء الله ... ربنا يخلي
ماهر :ـ ويخليك يا سيدي
ربيع :ـ ماشي .. يا ماهر بي...الارنب اللي طار ده هيرجع العشة بتاعة الجوكر أمتي ؟ حلو كدا ... بالالغاز اهوه
ماهر :ـ متفكرنيش دا كان يوم ملعون لما لعبت مع الواد الصيني ده ... الواد حظه نار ... قاعد يلم في الملايين بتاعتنا واحنا قاعدين نتفرج
ربيع :ـ انا حذرتك منه وقلتلك ظهره عالي ... مصدقتنيش
ماهر :ـ اه ... تصدق ... مكنتش اعرف انهم أذكيا قوي كدا ...ده أنا فكرته زي البضاعة بتاعتهم مش هيستحمل غلوة
ربيع :ـ وهو اللي غلاك ( يضحك )المهم ... أنا عايز الارنب بتاعي
ماهر :ـ انهارده هجبهولك بالليل .... بس مش هلعب تاني مع صينين خالص
ربيع :ـ متخفش ... انهارده في أعضاء جدد ... وهتعوض خسارتك
ماهر :ـ لما نشوف
ـ قطع -
مشهد / 18 سوبر ماركت الحج راضي نهار داخلي
تدخل أميرة أبنة ضاحي الي السوبر ماركت وترتدي الحجاب لكي تشحن الباقة الشهرية لخط التليفون وتنادي علي الحج راضي فيقابلها أبنه حسام .. شاب مهذب ملتحي مدرس بالازهر الشريف0
أميرة:ـ السلام عليكم ... حج راضي
حسام :ـ أيوه ... وعليكم السلام ورحمة الله وبركاته ... أزي حضرتك يا أنسة أميرة
أميرة :ـ الحمد لله ... هو الحج راضي مش موجود
حسام :ـ لا والله ... هو بعافية انهاردة شوية ... أتفضلي تحت أمرك
أميرة :ـ لا أصل أنا كنت عايزة أشحن الباقة للخط بتاعي
حسام :ـ ماشي ... ( ثم يمسك مكنة الشحن ) هي الباقة بتاعة حضرتك بكام
أميرة:ـ 50 جنية
حسام :ـ تحت أمرك ... اتفضلي
أميرة :ـ شكرا ..( وتعطيه النقود ) أتفضل الفلوس
حسام :ـ طب ما تخلي
اميرة :ـ شكرا ً الله يخليك
حسام :ـ بتكلم بجد والله مش مجاملة
أميرة :ـ عرفة والله ... شكرا ... أتفضل
حسام :ـ ( يمسك الفلوس ) ماشي
أميرة :ـ بعد أذنك ... سلاموا عليكم
حسام :ـ أنسة أميرة
أميرة :ـ نعم
حسام :ـ معلش .... أتفضلي الكنز ده أشربيه عشان الجو سخن اوي أنهارده .. وباين عليكي عرقانه جامد
أميرة :ـ اه .. فعلا ً ... بعرق جامد لما أمشي في جو حر
حسام :ـ ما دام جسمك بيفقد ميه كتير خصوصا ً في جو سخن زي كدا... حاولي نشربي سوايل كتير عشان تعوضي الفاقد ومتتعبيش... أتفضلي
أميرة :ـ شكرا ً ... سلاموا عليكم ( ثم تستدير الي جهة الباب للخروج )
حسام :ـ أنسة اميرة
أميرة :ـ ( تستدير نحوه وتبتسم ) نعم
حسام :ـ معلش ممكن أسأل حضرتك سؤال
أميرة :ـ أتفضل
حسام :ـ هو حضرتك مرتبطة؟
أميرة :ـ ( تتعجب ) ليه
حسام :ـ ( مرتبك ) يعني .. أنا .. لو مش عايزة تجاوبي بلاش .. أنا أسف
أميرة :ـ لا
حسام :ـ ولا أي نوع من الارتباط؟
أميرة :ـ لا
حسام :ـ ( بفرح ومرتبك ) الحمد لله ... قصدي ربنا يوفقك
أميرة :ـ في أسئلة تاني؟
حسام :ـ لا
أميرة :ـ اوك ( ثم تستدير ناحية الباب لتخرج )
حسام :ـ أنسة أميرة
ـميرة :ـ ( تستدير نحوه وتنظر له في تعجب ) نعم
حسام :ـ ايصال الشحن وقع من حضرتك ( ويأخذه من الارض ويعطيه لها )
أميرة :ـ ( تمسك بالايصال ) شكرا ً (ثم تستدير نتحية باب السوبر ماركت وتخرج ويقف حسام وقد بدت عليه مظاهر الفرح الشديد ويقول ) الحمد لله
ـ قطع ـ
مشهد / 19 أمام منزل عادل زوج خالة يسرا نهار خارجي
حيث يعكف أحمد أبن عادل على أصلاح أحد الموتسيكلات أمام ورشته الصغيرة لاصلاح الموتوسيكلات بيته وتمر من أمامه يسرا حيث تذهب لزيارة خالتها..
أحمد :ـ تمام يا باشا ... زي الفل هيشتغل معاك طيارة
الزبون :ـ يعني مش هيعطل مني تاني في الطريق ؟
أحمد :ـ لا مش هيعطل أن شاء الله ... المشكلة كانت في البوجيه وغيرناه
الزبون :ـ ولو عطل
أحمد :ـ ياعم قلتلك مش هيعطل
الزبون :ـ فرضا ً يعني ... أتصرف أزاي ؟
أحمد :ـ لو عطلت تاني أبقي شممها بصلة ...
الزبون :ـ أشممها بصلة... أنت بتتريق؟
أحمد :ـ هات يا عم الحساب خلينا نشوف أكل عشنا
الزبون :ـ ( يعطيه الحساب ثم ينصرف وهو يردد ) قال أشممها بصله .. قال
أحمد :ـ( يلتفت الي موتوسيكل أخر ) وماله دا كمان؟
الزبون الاخر :ـ بيطفي كتير مني
أحمد :ـ وريني كدا ( يضغط مارش ويدوس بنزين ) بتعبيها بنزين ايه
الزبون الاخر :ـ بنزين 80 طبعا ً ... هو أنا قد ال 92
أحمد :ـ ما ده عيبه.. الكاربيراتير عايز يتحل ويتنضف.... وعايز تركب فلتر بنزين
الزبون :ـ ماشي ... اللي فيها أعمله ... بس مش عايز أشممها بصله
أحمد :ـ ( يضحك ) لا متخافش ... توكلنا علي الله ...( فليتفت فيري أبنة خالته يسرا تدخل من باب المنزل فيركض ورائها مسرعا ً ) يا ض ياسوكة ... تعالي حل الكاربيراتير ده ونضفه
ـ قطع ـ
مشهد / 20 منزل عادل زوج خالة يسرا ماهر نهار داخلي
حيث تعتلي يسرا سلالم المنزل الداخلية متجهة الي شقة خالتها ويتبعها أحمد ابن خالتها وينادي عليها
أحمد :ـ يسرا
يسرا :ـ أحمد ... ازيك
أحمد :ـ ازيك أنتي عامله ايه
يسرا :ـ الحمد لله
أحمد :، ليكي فتره مبتجيش يعني
يسرا :ـ معلش ... الامتحانات قربت والمذاكرة واخدة كل وقتي
احمد :ـ ربنا معاكي ... طب أنا هخلص اللي في ايدي وهطلع علطول
يسرا :ـ ( بعدم أهتمام )براحتك
احمد :ـ أنفضلي
( تستكمل يسرا صعود السلم )
ـ قطع ـ
مشهد / 21 داخل منزل عادل نهار داخلي
تجلس يسرا مع خالتها عائشة وزوجها عادل وابنة خالتها منال في الصالة
عائشة :ـ عاملة أيه يا بنتي
يسرا :ـ الحمد لله يا خالتي
عائشة :ـ وابوكي عامل ايه معاكي ... تلاقيه مطلع عنيكي
يسرا :ـ والله يا خالتي بقيت عايشه معاه في رعب
عائشة :ـ هتفوليلي يا بنتي ... ما هو سبب موت أمك الله يرحمها يكون هو
عادل :ـ مالوش لزوم الكلام ده يا عيشة
عائشة :ـ أسكت يا اخويا ... ده راجل مفتري من يومه ...وأفنري أكتر بعد ما ربنا اداله من وسع
عادل :ـ ربنا يهدية
عائشة :ـ يا خي قول ربنا ياخده ... خلي البنت ترتاح من قرفه
( ينظر لها عادل لكي تكف عن الوار بهذا الاسلوب )
عائشة :ـ ويا تري لسه بيشرب المدعوق بتاعه ولا بطل
يسرا :ـ بالعكس كل يوم بيشبط فيها اكتر من الاول ومافيش يوم الا لما يرجع فيه اخرالليل يتطوح
عادل :ـ لا حول ولا قوة الا بالله
عائشة :ـ اقفلي عن نفسك الاوضه وانتي نايمه يابنتي لاحسن يعمل فيكي حاجه وهو مش دريان
عادل :ـ وبعدين معاكي ياعيشة .... بصي يا بنتي ركزي في مذاكرتك وحاولي تتجنبيه بقدر المستطاع ... وان شاء الله ربنا هيكرمك وتحققي كل احلامك ... وربنا يصلح حاله
يسرا :ـ يارب يا جوز خالتي ... مالك يا منال ساكته ليه؟
عادل :ـ منال زعلانه يا ستي ... جايلها عريس والا بالدين اقعد معاه دلوقتي ... مش صابره حتي اسأل عليه
منال :ـ يا بابا ما انا خايفة العريس يطير ... وده لقطه
عادل :ـ لو ليكي نصيب فيه مش هيطير
يسرا :ـ كلام اونكل عادل صح ... لو هو ده فعلا ً نصيبك عمره ما هيقسم لغيرك
عادل :ـ الله يفتح عليكي يا بنتي ... سامعة الكلام الموزون ... وبعدين أنا أسمع ان الواد علاء ده واد مش تمام وبيشرب مخدرات
منال :ـ يا بابا ... مش تتأكد من الكلام ده الاول
عادل :ـ ما هو ده اللي هعمله يابتي ... عشان لوطلع صح ... يبقي رفضناه من بره بره ولا ايه رأيك يا عيشة
عائشة :ـ أصبري يا بنتي لحد ما ابوكي يسأل عليه ... ما هو لو طلع فعلا ً مدمن مخدرات يبقي ميلزمناش يغور بفلوسة ... هو احنا هنرميكي وخلاص يا بنتي
يسرا :ـ أسمعي الكلام يا منال .. خالتي وجوز خالتي عاوزين مصلحتك ...أسألي كويس عن البني أدم اللي هتعيشي معاه بقيت عمرك وهتجيبي منه أطفال .. عشان مترجعيش وتندمي ... وبعدين أنا مش عرفه ايه اللي عاجبك فيه ... ده حتي جاهل
منال :ـ وانتي مالك ... جاهل ولا مش جاهل ... هو أنا هتجوزه ولا همتحنه
يسرا :ـ بقلك ايه لو بيبصم علي خفيف ... هيبقي مناسب اوي ليكي
منال :ـ هههههه....ما ديكي بتعرفي تهزري اهوه
( يضحك عادل وعائشة من جملة يسرا )
ـ قطع ـ
تابعوني والحلقة التالية ..
حلوة
ردحذفهي يسرا في اعداديه ولا كليه
ردحذفجميله كالعاده
ردحذف