رواية تاجر العذرية
بقلم✍️
الكاتب المصري محمد مالك
البارت السابع
جميع الحقوق محفوظة
وتأتي الاسعاف وتنقل فردوس الي المستشفي التخصصي التي يعمل بها الدكتور عمر ويذهب معها بسيوني
ويدخل المس فاطمة حجرة الطبيب عمر لتخبره بوصول حالة معتدي عليها بالضرب بواسطة مطواه
فاطمه .. دكتور عمر .. في حالة دلوقتي جت اخوها بيقول انها مضروبة في جمبها بمطوه والحالة شبه فاقدة للوعي !!
عمر .. والله يا فاطمه انا مشوش وتعبان جدا .. خلي الدكتور ايمن يشوفها
فاطمه .. الدكتور ايمن في ريست انهارده
عمر .. طب خلي الدكتور شريف يبص عليها
فاطمه .. الدكتور شريف مجاش انهارده خالص بيقولوا وهو نازل من بيته الصبح وفي طريقة للمستشفي وقع ورجليه اتكسرت
عمر .. معقول !! محدش قالي يعني ؟!!
فاطمه .. حضرتك قاعد اليوم كله في اوضتك يا دكتور .. هتعرف منين بقي ؟!!
عمر .. يعني من الاخر كدا انا ادبست في الحالة دي ؟!
فاطمه .. دا اكيد لأن مفيش غيرك حاليا جراحة عامة في المستشفي
عمر .. الحالة دي فين ؟
فاطمه .. في الاستقبال
عمر .. امري لله .. بينا يا ستي ابص عليها
ويذهب عمر وفاطمه ليلقي نظرة علي الحالة فيقابل بسيوني
عمر يسأل بسيوني
عمر .. ايه اللي حصل بالظبط ؟!!
بسيوني .. اتنين ستات ولاد حرام جروا شكلها وقاموا ضاربينها بمطوه زي ما انت شايف !!
عمر .. دي طعنه نافذة !! وناحية الكليه كمان .. محتاجين نعمل اشعة دلوقتي حالا .. فاطمه اتصلي بالدكتور هشام جراحة مسالك بسرعة
فاطمه .. حاضر يا دكتور
بسيوني .. انتوا هتعملولها ايه دلوقتي عدم لا مؤاخذة ؟!!
عمر .. انت تبقالها ايه ؟
بسيوني .. انا اخوها
عمر .. تمام .. اختك لازم تدخل عمليات طبعا
بسيوني .. اوك ماشي بس والنبي يا دكتور متقصرش مع اختي في حاجة انا ادفع من جنيه ل مليون جنيه بس اختي تعيش .. فاهم يا دكتور ؟!! اختي لازم تعيش يا دكتور .. لازم تعيش يا ناس لازم تعيش
بسيوني يصطنع البكاء وانه حزين علي اخته
عمر .. اهدي يا استاذ مش كدا !!
بسيوني .. معلش اعذرني اصل دي اختي الوحيدة وانا بحبها اوي .. اوي يا دكتور
عمر .. ان شاء الله هتقوم بالسلامة .. اجمد اومال يا راجل ..واوعدك اننا هنعمل كل اللي نقدر عليه .. بس انت ادعيلها من قلبك
بسيوني .. دا هدخل المسجد دلوقتي وهفضل اصلي لربنا وهدعيلها بدموع عنيا انها تقوم بالسلامة وندر عليا لو قامت بالسلامة هدبح خمس عجول وافرقهم لله .. اومال دي اختي الوحيدة يا ناس وانا بحبها والله
عمر .. اطمن .. ان شاء الله خير .. بعد ازنك
بسيوني .. ازنك معاك يا دكتور
وبعد ان ينصرف بسيوني له نظره ذات ويبتسم كالعادة ابتسامته الخبيثة وتدخل فردوس غرفة العمليات وتمكث بها اكثر من خمس ساعات ليخرج بعدها عمر وزملاءه من طاقم العمليات منهكين بشدة
عمر يتلفت علي بسيوني لم يجده .. يظن انه ذهب فعلا الي المسجد .. فيتوجه الي مكتبه وبعدها يدخل اليه بسيوني ويبدوا انه في حالة غير طبيعية
بسيوني .. طمني يا دكتور .. اختي بخير ؟!
عمر .. اختك انكتبلها عمر جديد !! حظها حلو فعلا .. الطعنه جت بعيد عن الكلية بمسافة بسيطه جدا
بسيوني .. يعني هتعيش ؟!!
عمر .. ان شاء الله هتعيش .. وهطمنك اكتر بعد ال ٢٤ ساعة اللي جايين .. ادعي ربنا يعدوا علي خير .. ساعتها هنبقي عدينا مرحلة الخطر والحالة هتبقي استقرت
بسيوني .. بدعيلها والله .. دي اختي يا عالم
عمر يشم رائحة الخمر من فم بسيوني
عمر .. عفوا .. حضرتك شارب حاجة ؟!!
بسيوني .. اها .. شارب قرفة بالجنزبيل في الكافيتريا بتاعتكم
عمر .. بس دي مش ريحة قرفة خالص ؟!!
بسيوني .. اومال ريحة ايه يا دكتور عدم لا مؤاخذة ؟!!
عمر .. دي ريحة زي ما تكون خمرا !!
بسيوني .. خمرا !! اعوذ بالله .. ايه يا دكتور اشحال ما انا قايلك اني داخل الجامع عشان اصلي وادعيلها !! وبعدين انا اخرتي السيجارة وبس وصعبان عليا نفسي كمان اني مش قادر ابطلها.. مش عشان صحتي لا !! عشان دي معصية وانا مش عاوز ربنا يزعل مني ابدا
ثم يُخرج علبة السجائر من جيب الجاكيت ويشعل سيجارة ثم يقول
بسيوني .. ادعيلي ابطلها ينوبك ثواب
عمر ينظر ل بسيوني في تعجب شديد مستنكرا اسلوبه في الكلام تماما
وفي اليوم التالي يذهب عمر الي غرفة العناية المركزة ليطمئن علي فردوس وهناك يقابل المس فاطمه
عمر .. ايه الاخبار يا فاطمه ؟!!
فاطمة .. انا شايفة ان الحالة مستقرة .. هي فاقت عامة بس مش عرفة بتعيط ليه؟!!
عمر .. ليه بتعيط ؟؟!! قالتلك فيه حاجة تعباها ؟!!
فاطمة .. سألتها وقالت انها كويسة ومفيش حاجة تعباها !!
عمر .. طب تعالي اشوفها
ويتوجه عمر ناحية فردوس حيث كان وجهها مستدارا ناحية الشمال وكان عمر يقف ناحية اليمين
عمر .. ايه .. القمر بتاعنا بيعيط ليه ؟!! اسمحيلي ابص علي الجرح ؟
فردوس تهز رأسها بمعني نعم ولكن لا تلتفت نحوه
عمر .. لا الجرح زي الفل .. ممكن اعرف بقي بتعيطي ليه ؟!!
فردوس تلتفت نحوه ولكن تليفون عمر يرن فجأة
عمر دون ان ينظر ل فردوس
عمر .. ثانية بعد ازنك .. الو .. ايوا يا يا بابا .. انا في العناية بتابع الحالة بتاعة امبارح .. حاضر هشوفها واجيلك ع المكتب علطول .. سلام .. اه قليلي بقي بتعيطي ليه ؟!!
عمر ينظر ل فردوس فيندهش بشدة قائلا
عمر .. مش معقول !! انتي ؟!!
تابعوني والبارت التالي .. تحياتي .. ملك الروايات الكاتب والسيناريست المصري محمد مالك.
لو سمحت انا مش لاقيه البارت السادس بس الروايه راوعه جدا وتشد
ردحذفالحلقه العشرون
ردحذفرواية رائعة
ردحذف