القائمة الرئيسية

الصفحات

رواية ذئب تخصص ارامل من البارت الحادي عشر وحتي العشرون

[٢٩/‏٨ ١:١٥ م] محمد مالك: رواية ذئب تخصص ارامل
البارت الحادي عشر
للكاتب المصري محمد مالك
جميع الحقوق محفوظة
اميرة .. انت ؟!!
عبد الباسط مرتبك .. روح انت خلاص يا بكر وانا هبقي اتصل بيك
بكر مرتبك ايضا .. ماشي يا دكتور .. سلاموا عليكم
اميرة بتعجب شديد .. مين دا ؟!
عبد الباسط .. دا بكر فني صيانه شغال مع شركة الصيانة اللي بتابع الاجهزة هنا في المستشفي .. بس ايه واد خطير بجد احسن من اكبر مهندس صيانه في الشركة .. بمجرد انه يبص للجهاز يعرف علطول العطل اللي فيه سببة ايه
اميرة .. بس ده انا اول مرة اشوفه هنا !! وبعدين هو احنا عندنا اجهزة عطلانه هنا في المستشفي ؟!! ما اظنش
عبد الباسط .. لا مفيش بس هو جاي يعمل تشيك علي الاجهزة وياخد حسنته من ورا الشركة  .. انتي عرفة الظروف صعبه .. ربنا يكون في عون الناس
اميرة .. بس دا يشبة الراجل اللي صدم مني بالعربية !!
عبد الباسط .. مني مين ؟!!
اميرة .. مني السكرتيرة بتاعتك
عبد الباسط .. يا دكتورة .. يخلق من الشبة اربعين
اميرة .. بس هو لية مرتبك ومش علي بعضه .. زي مايكون عامل عملة
عبد الباسط .. خجلان مني مش اكتر .. وبعدين كفاية اسئلة ممكن ؟!!
اميرة .. ماشي يا دكتور تحت امرك بعد ازنك
ثم تنظر له نظرة ذات معني وتنصرف
عبد الباسط .. اميرة
اميرة .. نعم
عبد الباسط .. هو انتي كنتي جاية عندي ليه ؟!!
اميرة بسخرية واضحة .. عشان اشوف بكر واعرف اد ايه انت بتساعد الناس وبتقف جمبهم وبتداري عليهم .. في الخير طبعا .. بعد ازنك يا دكتور
وفي المساء تعود اميرة الي الفيلا ثم تنادي
اميره .. فايزة .. فايزة .. انتي يا زفته
فايزة .. ايوا يا ست هانم
اميرة .. ايه نايمة علي ودانك ولا ايه ؟!!
فايزة .. تحت امرك يا ست هانم .. يعني جيتي بدري حضرتك
اميرة .. وانتي مال اهلك ؟!! تقي فين ؟
فايزة .. اتعشت ونامت من بدري
اميرة .. امشي روحي جهزيلي الحمام عشان اخد شاور
فايزة ترتبك ولا تتحرك
اميرة تتعجب .. مالك يا بت واقفة ليه ؟!! مسمعتيش قلتلك ايه ؟!!
فايزة .. سمعت يا ست هانم .. بس ...
اميرة .. بس ايه ؟!!
فايزة .. هو حضرتك لازم تاخدي الشاور بتاعك دلوقتي ؟!!
اميرة .. ليه .. هو فيه حد في الحمام ؟!! هو الدكتور عبد الباسط رجع ؟
فايزة .. لا لسة
اميرة .. امال ايه ؟!! اوعي من سكتي
وتتوجه اميرة مسرعة ناحية الحمام وبمجرد ان تقترب منه تجد امرأة تخرج من الحمام ترتدي برنس ابيض وتلف فوطه علي رأسها
اميرة تتعجب .. انتي مين ؟!!
المرأة ترتبك ثم تجري مسرعة نحو غرفتها .. وهي احدي الغرف المغلقة واميرة تطاردها
اميرة .. استني عندك
فايزة تحاول تعطيلها .. استني يا ست هانم لما اقلك
اميرة .. غوري من وشي
ولكن المرأة تكون اسرع من اميرة وتصل الي غرفتها في وقت قياسي وتدخل الغرفة بسرعة وتغلق الباب وخلفها اميرة التي تحاول فتح الباب فتجده مغلق من الداخل
اميرة تطرق الباب بشدة .. افتحي الباب بقلك .. افتحي الباب
ثم تقول ل فايزة .. مين دي ؟!! انطقي
فايزة .. مين يا ست هانم ؟!! مفيش حد
اميرة .. نعم يا روح امك انتوا عايزين فعلا تجنوني بقي !! مين دي يا بت اللي دخلت الاوضة وقفلت علي نفسها؟!!
ثم تجذبها بقوة من شعرها وفايزة تتألم
فايزة .. اه .. سيبي شعري يا ست هانم .. صدقيني مفيش حد دخل جوة . انتي بتهيآلك والله
اميرة .. بيتهيآلي يا بنت الكلب!!  .. خلاص هتطلعوني مجنونه رسمي !! .. انطقي يا بت احسنلك .. ايه اللي بيحصل في الفيلا دي بالظبط ؟!! ومين دي ؟!
فايزة .. انا مليش دعوة ومعرفش حاجة .. سيبي شعري يا ست هانم
ثم يأتي عم محمد غاضب ويقول
محمد .. سيبي البت يا ست انتي
اميرة .. يعني انت بتتكلم اهوه ؟!! امال عامل نفسك اخرص ليه ؟؟ ولا انا كمان بيتهيآلي انك واقف قدامي اهوه وبتتكلم كمان ؟!!
محمد .. ايوا انا بتكلم .. ارتاحي بقي .. وعرفة لو مسكتيش وبطلتي تحشري مناخيرك في اللي ميخصكيش هيحصلك ايه ؟!
اميرة بسخرية .. هيحصلي ايه اكتر من اللي انا شايفاه عندكم هنا ؟!
محمد .. انتي لسة مشفتيش حاجة .. بصي شوفي
اميرة تسقط في الارض مغشيا عليها من هول المنظر ..
ماذا رأت ... ؟!!
هنعرف من البارت التالي .. لو عاوزين حلقتين كمان .. تفاعل ومشاركة .. تحياتي الكاتب المصري محمد مالك.
[٢٩/‏٨ ١:١٦ م] محمد مالك: رواية ذئب تخصص ارامل
البارت الثاني عشر
للكاتب المصري محمد مالك
جميع الحقوق محفوظة
اميرة تنظر الي حيث يشير محمد ونراه يشير الي احد الغرف المغلقة انها الغرفة الرابعة حيث نري الباب يُفتح ببطئ فتظهر لنا سيدة وجهها مرعب منزوعة العينين شفتاها ممزقتان وتظهر اسنانها بالكامل نراها والدم يسيل من جميع انحاء جسدها ونسمعها تصرخ وتقول .. اه وتسير ببطئ وكأنها لا تستطيع المشي نحو اميرة واميرة تتعجب والخوف يتسلل الي قلبها
اميرة .. مين دي كمان ؟!!
ثم تسقط علي الارض مغشيا عليها ..ثم بعد ذلك نري اميرة علي السرير وحولها ابوها وامها
الام .. اميرة فوقي يا بنتي مالك فيه ايه ؟!!
اميرة . انا فين ؟!!
الاب .. انا عايز افهم انتي حكايتك بالظبط ؟!!
الام .. بالراحة عليها يا عبدو شوية .. البنت مفزوعة
اميرة .. ماما ابوس ايدك انا عايزة امشي من هنا .. انا مش عايزة هقعد هنا تاني.. انا خلاص عقلي هيطير من دماغي
الاب .. انتي مالك فيكي ايه بالظبط ؟!! تحبي نعرضك علي دكتور نفسي ؟!!
اميرة .. صدقني يا بابا انا لو استنيت في البيت ده اكتر من هدخل من كدا هتجنن وهقضي باقي عمري في مستشفي المجانين
الام .. بعد الشر عليكي يا بنتي .. ليه بتقولي كدا بس ؟!!
اميرة .. من الحاجات المريبة اللي بشوفها وبتحصل حواليا .. والكل مُصّر يقنعني انها محصلتش مع اني متأكدة انها حصلت فعلا
الوالد .. حاجات ايه !! شوية التخاريف اللي انتي بتحكيها !! ولا الوساوس اللي معششة جواكي بدون مبرر
اميرة .. لا يا بابا انا كل شكوكي ليها مبرر .. عبد الباسط مخبي عني حاجات كتير ومش عايزني اعرفها واي حد يحاول يساعدني ويعرفني الحقيقة بيموت فجأة .. زي مني السكرتيرة لما حبت تعرفني الحقيقة واحد اتصل بيها واحنا قاعدين خلاها ارتبكت وخافت وسابتني وخرجت جري وبعدها بثواني ضربتها عربية قدام الكوفي شوب واللي ضربها يقلها خلي لسانك ينفعك وتاني يوم الاقي واحد شبهه عندنا في المستشفي ولما اسألة يقلي دا فني صيانه مع انه مغير الاجهزة كلها اللي في المستشفي الشهر اللي فات !!
الاب .. قصدك تقولي ان جوزك ليه علاقة بالحادثة ؟!!
اميرة .. ايوا احساسي بيقلي كدا
الاب .. لا دا انتي كدا اتجننتي فعلا وعايزة علاج .. عايزة تودي جوزك في داهية عشان شوية تخاريف معششة جوة دماغك ؟!!
اميرة .. طب فسرولي انتم اللي بيحصل دا معناه ايه ؟!! انا من اول يوم شفته فيه وانا مستغرباه في كل حاجة .. حكاية انوا مبيتحوزش غير ارامل ؟!! وكلهم يموتوا في فترة قليلة بعد الجواز !! الاوض المقفولة باستمرار وجواها اسرار مش عايزني اعرفها ؟!! تلميحاته المستمرة ليا اني لو حاولت ادور علي الحقيقة هيحصلي زي ما حصل للي قبل مني .. وايه اللي حصلهم انا معرفش ؟!! تصدقي يا ماما انه عايزني انزل البيبي !!
الام .. تنزليه !! ليه بس ؟!!
اميرة .. سألته وكالعادة مفيش اجابة والمطلوب مني اني احل اللغز بنفسي وادور علي الاجابة .. وياريتني في الاخر بوصل لنتيجة !!
الاب . اولا .. قلتلك مش من حقك تدوري في اللي فات .. انتي حاسبيه من بعد ارتباطه بيكي .. ثانيا .. جايز يكون مش عايز اولاد دلوقتي .. مشكلتكم حلوها مع بعض وبهدوء
اميرة .. طب وحكاية يوم الاتنين دا اللي بيختفي فيه ومش عايزني اروح معاه او اعرف هو بيروح فين ؟!! والحاجات اللي بتحصل حواليا دي كلها وفي الآخر تقولولي تهيآت؟!! ماما انا عايزة اسيب بيت الرعب ده اللي انا عايشة فيه .. خديني معاكي ارجوكي
الام .. تعالي يا بنتي يمكن اعصابك ترتاح
الاب .. تستأذن جوزها الاول
وبالفعل يوافق عبد الباسط علي ذهاب اميرة الي بيت ابيها لكي ترتاح قليلا وتهدأ اعصابها وذات يوم وفي المساء يتصل بها رقم غريب من اميريكا وهو شخص يدعي د.رامي كان يعمل في السابق مع دكتور عبد الباسط ولكنه تركه وهاجر الي اميريكا منذ خمس سنوات
اميرة .. الو
رامي.. دكتورة اميرة معايا ؟
اميرة .. ايوا .. مين معايا حضرتك ؟!!
رامي .. انا الدكتور رامي بكلمك من امريكا .. كنت شغال مع الدكتور عبد الباسط جوزك من حوالي خمس سنين
اميرة .. اهلا بحضرتك .. اي خدمة ؟!!
رامي .. انا متابع اللي بيحصل من بعيد وعرفت ان الدكتور عبد الباسط اتجوزك وانك اكيد اكتشفتي وشفتي حاجات بعد كدا مكنتيش تتوقعي انك تشوفيها حتي في الكوابيس!!
اميرة .. فعلا !! بس انت عرفت منين ؟! وحضرتك بتكلمني ليه دلوقتي ؟!!
رامي .. انا وصلت لنمرتك بصعوبة . عشان بس احذرك
اميرة .. وتحذرني من ايه ؟!!
رامي .. انك تهربي وتنفدي بجلدك وبستحسن تسافري زيي كدا برة مصر
اميرة .. ليه يعني اعمل كدا ؟!!
رامي .. لأن انتي قدامك شهور معدودة وهتبقي المرحومة اميرة زي اللي قبلك بالظبط
اميرة .. مش فاهمه ؟!!
رامي .. هفهمك .. بس الموضوع عايز قاعدة طويلة .. انا نازل مصر بكرة وممكن نتقابل بعد بكرة ان امكن .. بس ياريت محدش خالص يعرف ان كلمتك .. تمام ؟
اميرة ..اكيد
رامي .. يبقي اتفقنا انتظري مني تليفون لما اوصل مصر وياريت متحاوليش تسيبي بيت باباكي وترجعي بيت جوزك لأي سبب انتي عندك في امان اكتر
اميرة .. انت عارف كل حاجة اهوه ؟؟! واصح انك مهتم بأمري جامد ؟!!
رامي .. اكيد الا مكنتش دورت علي نمرتك عشان اكلمك .. علي تليفون ان شاء الله .. سلام
اميرة .. سلام
ياتري ايه اللي حصل بعد كدا ؟؟!!!
الاحداث اشتعلت وستشتعل اكثر .. تابعوني والبارت الثالث عشر بعد التفاعل والمشاركة .. تحياتي الكاتب المصري محمد مالك.
[٢٩/‏٨ ١:١٦ م] محمد مالك: رواية ذئب تخصص ارامل
البارت الثالث عشر
للكاتب المصري محمد مالك
جميع الحقوق محفوظة
وتنتظر اميرة تليفون رامي علي احر من الجمر فأخيرا ساق اليها القدر من سيخبرها بحقيقة ما يدور حولها من احداث لا تجد لها تفسيرا وباتت تدفعها الي الجنون وفجأة يتصل بها رامي من القاهرة
رامي .. ايوة يا دكتورة انا وصلت بالسلامة
اميرة .. حمد الله علي السلامة
رامي .. لو وقتك يسامح نتقابل بعد ساعتين في كازينو الامل
اميرة .. اوك .. اتفقنا
وتذهب اميرة مسرعة الي الكازينو ويأتي رامي بعدها بدقيقتين
رامي .. اتأخرت عليكي ؟
اميرة .. بالعكس في ميعادك مظبوط .. اتفضل
رامي .. اولا انا اسمي الدكتور رامي عبد السلام دكتور جراحة عامة كنت شغال في الجروب بتاع الدكتور عبد الباسط وبالتحديد في فرع القاهرة والكلام دا من خمس سنين وكانت قبلها بسنتين بتشتغل في نفس المستشفي الدكتورة تهاني عبد السلام اختي الكبيرة كانت ارمله واعجب بيها الدكتور عبد الباسط واتجوزها كانت تقريبا الزوجه الرابعة ليه .. المهم معداش ٣ شهور من الجواز ولقيت اختي في حالة فظيعة لون عنيها تقريبا اتحول للأبيض وانهيار عصبي شديد ومش قادرة تنطق كلمتين وايه السبب معرفش دخلناها المستشفي عندنا قسم العصبية والنفسية ومفيش اسبوع واتوفت
اميرة .. اتوفت ليه ؟!
رامي .. صدمة عصبية شديدة وهبوط حاد في الدورة الدموية
اميرة .. ومعرفتش ايه سبب الصدمة العصبية دي ؟!!
رامي .. هقلك .. في مرة بالليل كان الوقت متأخر جدا وانا كنت نوبتجي واشتقت اني اشوف اختي واقعد معاها .. كان نفسي اعرف ايه اللي وصلها للحالة دي !! فلما رحت للاوضة اللي قاعدة فيها .. لقيت عندها عبد الباسط وكان بيتكلم معاها بصوت عالي وعصبية شديدة وسمعته بيقلها .. انا حذرتك وانتي صممتي تدوري ورايا .. يا تري بعد اللي حصلك ده لسة بتحبي يوم الاتنين ؟؟!
اميرة .. يوم الاتنين !! ايه حكاية يوم الاتنين ده انا عاوزة اعرف ؟!! ايه اللي بيحصل فيه بالظبط ؟!!
رامي .. انا شكيت وحسيت ان عبد الباسط ليه يد في اللي حصل لأختي ولما دورت اكتشفت مصيبة
اميرة .. ايه هي ؟!!
رامي .. عبد الباسط جوزك للأسف طلع ....
ولم ينتهي من كلمته حتي يصاب بطلق ناري في رأسه من الخلف فيتناثر الدم علي وجه اميرة وملابسها ثم تري في الخلف رجل يرتدي نظارة سوداء ويبدوا انه القاتل ينهض من علي الطربيزة ويبتسم في وجهها بكل سخرية
اميرة مصدومة وبشدة .. مش معقول !!! ايه اللي بيحصل بالظبط ؟!! حرام عليكم والله انا تعبت .. ثم تبكي وتنهار
بعدها يتم نقلها الي المستشفي وقد اصيبت بانهيار عصبي شديد ...
باقي من الرواية سبعة اجزاء ستنزل تباعاً تابعوني .. الكاتب والسيناريست المصري محمد مالك.
[٢٩/‏٨ ١:١٦ م] محمد مالك: رواية ذئب تخصص ارامل
البارت الرابع عشر
للكاتب المصري محمد مالك
اميرة تفيق فتجد نفسها في غرفة مظلمة لا يضاء منها الا علي وجه سيدة عجوز وجهها بشوش يبعث بالطمأنينة انها الدكتورة صفاء استشاري الطب النفسي تجلس امامها وفي يدها حقنه مهدئة
اميرة تلتفت يمينا ويسار ويبدوا انها في حالة من الدهشة والقلق الشديد
اميرة .. انا فين ؟!!
صفاء .. متخافيش انتي هنا في المستشفي .. افردي دراعك
اميرة تنظر لها في خوف وتتردد في فرد ذراعها
اميرة .. انتي مين ؟!!
صفاء .. افردي دراعك متخافيش
اميرة تنصاع لكلامها وتفرد ذراعها وبعد ان تعطيها الحقنه
صفاء .. انا الدكتورة صفاء المشرفة علي علاجك هنا
اميرة .. انا مش مجنونة !!
صفاء .. ومين قال انك مجنونة ..انتي اعصابك تعبانه مش اكتر
اميرة .. دول ضربوة بالنار في دماغة قدامي ..انا شفت اللي قتله ..  الدم !! الدم بتاعة غرق هدومي !!
صفاء .. الله يرحمه .. اهدي يا اميره
اميرة .. اهدي ازاي وانا مش لاقية تفسير واحد للي بيحصل دا كله !! انا حاسة اني عايشة في كابوس فظيع ومش قادرة افوق منه !! وساعات بقول لنفسي ان جايز اكون مجنونة زي ما بيقولوا وبيتهيآلي حاجات مش حقيقية
صفاء .. بالعكس كل اللي حصل معاكي كان حقيقي
اميرة .. ايه ؟!!
صفاء تهز رأسها بمعني نعم
اميرة .. طب ايه تفسير ده ؟!! وليه بيعملوا معايا كدا ؟!! انا عملت ايه ذنب يخليني استاهل العذاب اللي انا عايشة فيه ده ؟!!
صفاء .. ذنبك ان عبد الباسط حبك
اميرة .. مش فاهمة ؟!! يعني ايه ذنبي ان عبد الباسط حبني ؟!!
صفاء .. زي ما ذنب كل الستات اللي اتجوزهم قبلك انه برضوا حبهم
اميرة .. اتكلمي علطول وبلاش الغاز ارجوكي انا مش ناقصة !! لو عرفة تفسير للي بيحصلي ده قوليلي وريحيني ؟!!
صفاء .. ما انتي عرفة اللي بيتكلم بيحصله ايه يا اميرة !! وبعدين انتي ليه بتدوري في حاجات هتضرك ومش هتنفعك .. صح ؟!
اميرة .. بس انا لازم اعرف مين البني آدم اللي انا عايشة معاه ده !! صدقيني بديت اشك انه يكون بني آدم اصلا .. قليلي هو فعلا متجوز جنية من تحت الارض وهي اللي بتعمل دا كله؟!!
 وفجأة نسمع صوت رعد ونري برق في جميع انحاء الغرفة فترتجف اميرة من الخوف
صفاء .. اللي اقدر اقولهولك ان عبد الباسط بيحبك بجنون وجايز تكوني الوحيدة اللي حبها بجد في كل زوجاته ودا كفاية عليكي
اميرة .. انا حاسة انك عرفة حاجات كتير ومش عايزة تقولهالي .. انتوا فيه ايه مخبينوا عني ؟!! انتوا مين اصلا ؟!! انتوا جن ولا انس ؟!! حرام عليكم انا تعبت كفاية بقي .. كفاية
ثم تبكي وصفاء تربط علي كتفها
صفاء .. اهدي ... ما دام مصرة تعرفي انا هقلك .. بس مش هينفع دلوقتي لأن عبد الباسط عارف اني انا عندك دلوقتي ولو طولت هيشك فيا .. بكرة تجيلي المكتب الساعة ١٢ بالليل وانتي هتعرفي كل حاجة .. انا المفروض عندي بنت في سنك بس الله يرحمها .. خلي بالك من نفسك يا اميرة والله يكون في عونك .. اسيبك ترتاحي شوية
وتنصرف صفاء واميرة في غاية من القلق والخوف تنتظر الغد في فارغ الصبر
وفي نفس الوقت نشاهد عبد الباسط في حجرة مكتبه قد شاهد وسمع الحوار كاملا بواسطة كاميرات مزروعة في غرفة اميرة ونري رد فعل علي وجهه
وفي اليوم التالي نري اميرة تخرج من غرفتها في الموعد المتفق عليه تتسحب بحذر شديد  نحو غرفة صفاء وتطرق الباب برفق حتي لا يشعر بها احد ولكن لا احد يجيب .. فتفتح الباب بحذر شديد وتطل برأسها الي داخل الغرفة وهي تقول
اميرة .. دكتورة صفاء !!
ثم تدخل بخطوات بطيئة الي الغرفة وهي تتلفت عليها ثم تجدها علي مكتبها وتراها تجلس علي الكرسي ولكن ظهرها ناحية وجه اميرة
اميرة .. دكتورة صفاء انا جيتلك حسب الميعاد اللي اتفقنا عليه.. دكتورة صفاء !!
ثم تدير الكرسي نحوها فتجد صفاء وكأنها ميته علي الكرسي ثم تمسك بأحدي يديها وتتركها فتتأكد انها بالفعل قد ماتت .. ترتجف وتعود بخطوات مرتعشة الي الخلف
اميرة تبكي  .. لا ..لا .. حرام يا ربي
ثم تصطدم ب عبد الباسط فتدير نفسها فتجده هو
اميرة بغضب شديد وحزن عميق .. قتلتها هي كمان صح ؟!! قتلتها عشان كانت هتقلي الحقيقة وتريحني !! انت مين قلي ؟!! عمال تعذبني ليه بالشكل ده ؟!! هو انا اذيتك في ايه يا اخي استاهل تعمل فيا دا كله ؟!! ما دام مصيري الموت زي اللي قبلي اقتلني دلوقتي وريحني ارجوك .. انا خلاص مش قادرة استحمل اقتلني وارحمني بقي
عبد الباسط يلاحظ بطن زوجته قد كبرت وظهر عليها الحمل فيضع احدي يديه علي بطنها يتحسسها واميرة متعجبة تلاحظ الدموع تملأ عينيه ثم يجسو علي قدميه ويقبل بطنها ثم ينظر اليها لثوان ويتركها وينصرف .. ثم يدخل اثنان من التمريض يصطحبان اميرة الي غرفتها
اميرة .. انت مشيت ليه ؟!! ما انت لو مقتلتنيش يا عبد الباسط انا هنتحر .. يارب ارحمني بقي
الاحداث اشتعلت واقتربنا من حل اللغز .. تابعوني والبارت الخامس عشر .. تحياتي ملك الروايات المصرية محمد مالك .
[٢٩/‏٨ ١:١٧ م] محمد مالك: رواية ذئب تخصص ارامل
البارت الخامس عشر
للكاتب المصري محمد مالك
تمر اميرة بأصعب لحظات حياتها داخل قسم الصحة النفسية بمستشفي زوجها الدكتور عبد الباسط .. تنطوي علي نفسها وامتنعت عن الطعام والكلام نهائيا وبدا جسدها هزيلا نحيلا ولونها شاحبا والام تجلس معها يائسة حزينة تقشر لها برتقالة عسي ان تأكلها فهي تحب البرتقال جدا
الام .. كلي دي يا بنتي عشان خاطري
اميرة تهز رأسها ب لا
الام .. ده البرتقان اللي انتي بتحبيه !!
اميرة لا تجيب فقد زهدت كل شئ رغبة منها في الموت حتي تتخلص من كل آلامها ومعاناتها
الام .. وبعدين يا اميرة !! انتي كدا بتموتي نفسك بالبطئ !! طب عشان خاطر اللي في بطنك .. هو ذنبه ايه تموتيه معاكي ؟!! يا حول الله يا ربي .. ياريتني ما كنت وافقت علي جوازك منه وانا عرفة انه ممكن يحصلك كدا !!
اميرة تنتبه عند سماع تلك الجملة تنظر الي امها في دهشة وقد اتسعت عيناها الذابلتين والام ترتبك فقد تفوهت بتلك الكلمات دون قصد ولكنها الحقيقة تحدث بها لسانها رغما عنها حتي ينفضح امرها امام ابنتها
اميرة .. انتي قلتي ايه حالا ؟!!
الام .. سامحيني يا بنتي انا السبب في كل اللي بيحصلك ده
اميرة ..هو انتي كنتي عرفة ان كل دا هيحصلي من الاول ؟!!
الام .. انا كنت عرفة ان في حاجة غلط .. بس غالطت نفسي .. ومصدقتش كلام ايناس ليا
اميرة .. مين ايناس ؟!!
الام .. المستشارة ايناس عبد العاطي مراته اللي قبل منك الله يرحمها .. قالتلي كلام كتير وانا مصدقتوش .. لكن كل يوم كان بيمر بعد جوازك منه  اكدلي كل كلمة قالتهالي .. انا هقلك كل حاجة يا بنتي
اميرة تضع يدها علي فم امها لتمنعها من الكلام
اميرة .. لا .. ابوس ايدك انا مش عايزة اعرف حاجة .. دا شايفنا وسامعنا دلوقتي .. هيقتلك .. صدقيني هيقتلك يا ماما .. دا بيقتل اي انسان بيحاول يقلي الحقيقة .. قومي امشي بسرعة من هنا .. ارجوكي امشي
وفجأة يقتحم الغرفة عبد الباسط دون استئذان وينظر بعينان يشع منها شرار الغضب العارم الي والدة اميرة ويقول
عبد الباسط .. منورة يا حماتي .. واظن قعدتك طولت اوي ونفسك تروحي !!
اميرة تنهض من علي سريرها بسرعة تقف امام امها وتجعل امها خلفها لتحميها من عبد الباسط
اميرة .. انت قصدك ايه ؟!! الا ماما انت سامع .. هي مقالتش حاجة ومش هخليها تقول حاجة ابدا ومها اتكلمت انا مش هسمعها اصلا .. سيب ماما تروح يا عبدو .. ارجوك متأذيهاش
وفجأة تلقي الام برأسها علي كتف اميرة وفمها ينزف دما .. اميرة لا تصدق
اميرة .. ماما !!
والام تسقط علي الارض فاقدة للوعي
اميرة بهيستريا شديدة .. ماما !! .. لا لا !! انت قتلتها ازاي ؟!! انت مقتلتهاش صح ؟!! قول يا عبدو انك مقتلتهاش !! حرام عليك دي امي ؟!! انت ايه يا اخي معندكش رحمة دا انا مخليتهاش تتكلم عشان متتأذيش !! ثم تصرخ بصوت عالي يهز ارجاء المكان وتقول .. ماما
ثم تلمح السكين الذي كانت تقشر به امها البرتقال فتنظر الي عبد الباسط نظرة غضب ويبدوا انها عزمت علي شئ ما ...
ماذا فعلت وما الذي حدث لامها بالضبط ؟؟!!
 باقي من الرواية خمسة اجزاء هينزلوا مرة واحدة لو عملت مشاركة في ٣ مجموعات .. تحياتي الكاتب المصري محمد مالك.
[٢٩/‏٨ ١:١٧ م] محمد مالك: رواية ذئب تخصص ارامل
البارت السادس عشر
للكاتب المصري محمد مالك
جميع الحقوق محفوظة
اميرة تمسك بالسكين وتفكر في شئ ما وعبد الباسط ينظر اليها في ترقب وحذر
اميرة .. ما هو عشان اخلص من الكابوس اللي انا عايشه فيه ده لازم حاجة من اتنين .. يا اما انا اموت .. يا اما انت تموت .. بس الافضل اني انا اللي اموت لأنك دمرتني بجد ومش هينفع ارجع تاني زي ما كنت ابدا ..
ثم تغمض عينيها وبكل قوة ترشق السكين في قلبها ثم تفتح عينيها وتنظر مكان رشق السكين فلا تجد شيئا وتجد السكين علي الارض وقد اختفي منه السلاح الحاد ولم يبقي الا المقبض فقط .. اميرة متعجبة وبشدة
اميرة .. لا بقي !!! حتي الموت مش قادرة عليه!! .. امال اخلص منك ازاي قلي ؟!! قلي يا اخي انت مين وعايز مني ايه بالظبط ؟!!
عبد الباسط .. انتي اللي مش عاوزة تسمعي الكلام !! مصممة تدوري في حاجات لو انكشفت حقيقتها قدامك هتبقي ...
اميرة .. هتبقي ايه ؟!!
عبد الباسط .. هتبقي نهايتك يا اميرة .. زي ما كانت نهاية اللي قبلك لما حاولوا يعرفوها .. وزي ما برضوا كانت نهاية كل اللي ساعدوكي انك توصلي للحقيقة
اميرة .. وانا مش هرتاح غير لما اعرف ايه الحقيقة .. حتي لو نهايتي بعدها
عبد الباسط .. واذا قلتلك بلاش عشان خاطري تدوري عليها .. انا مستعد اعمل اي حاجة في الدنيا عشان مااخسركيش ..ارجوكي بلاش تخسريني
اميرة .. انت مين وحكايتك ايه ؟!! ريحني ارجوك
عبد الباسط .. حاضر هريحك
وفجأة تدق الساعة وقد اصبحت الثانية عشرة بعد منتصف الليل .. انها ليلة الاثنين وعبد الباسط يرتبك عند النظر للساعة
عبد الباسط .. انا لازم امشي دلوقتي وهنتكلم بعدين .. مامتك هتلاقيها في البيت بتتعشي مع باباكي دلوقتي
اميرة تنظر الي حيث ترقد والدتها فلم تجدها
عبد الباسط .. بس متقلقيش عليها لأنها هتكون ذاكرتها بعافية شوية
وكالعادة يمسك بكلتا يديها ويقبلهم بكل حب ثم ينصرف واميرة في تعجب ثم تتذكر انها ليلة الاثنين فقررت ان تعرف اين يذهب عبد الباسط وماذا يفعل في هذا اليوم بالتحديد فأستطاعت ان تهرول خلفة وتركب سيارتها وفي الطريق حدثت مفاجأة ...؟!!!!!
اقتربنا من حل اللغز وبقي من الرواية اربعة فصول .. تحياتي الكاتب والسيناريست المصري محمد مالك.
[٢٩/‏٨ ١:١٧ م] محمد مالك: رواية ذئب تخصص ارامل
البارت السابع عشر
للكاتب المصري محمد مالك
ينطلق عبد الباسط بسيارته مسرعا الي مدينة الاسكندرية وخلفة اميرة تراقبه بسيارتها .. الجو بارد ممطر وصوت الرعد يزيد من خوف اميرة وشعاع البرق يضئ لها الطريق المظلم .. عبد الباسط يدخل الي منطقة مهجورة خالية من الناس لا يوجد بها سوي بيت قديم مهجور .. يركن سيارته واميره تراقبه من بعيد .. يفتح الباب ويتقدم الي الداخل واميرة خلفة تسير ببطئ دون ان يلاحظها حتي تقف بعيدا قرب الباب لتراقب ما يحدث ..
عبد الباسط يتحدث الي امرأة عجوز اميرة تسمع صوتها ولكن لا تراها
السيدة .. اتأخرت ليه ؟!!
عبد الباسط .. معلش .. كنت في المستشفي مع اميرة
السيدة .. اها !! اميرة .. وحكايتها هتنتهي امتي معاك ست اميرة هانم ؟!!
عبد الباسط .. انتي مستعجلة ليه ؟!!
السيدة .. يبقي زي ما سمعت . انت وقعت في غرامها ؟!!
عبد الباسط .. انا فعلا حبيتها .. ومش عارف اتصرف ازاي ؟!! وبعدين دي حامل في ابني !!
السيدة .. ما انت حبيت اللي قبلها وفيهم اللي كانت حامل في ابنك برضوا !! ايه الجديد ؟!!
عبد الباسط .. بس دي حاجة تانية خالص غيرهم كلهم .. مشاعري ناحيتها مختلفة تماما وقلبي متعلق بيها بطريقة مش عادية
اميرة تحاول ان تتلصص لتري من التي يحادثها عبد الباسط ولكنها لم تستطيع رؤية شئ سوي ثعبان ضخم يتحرك ليلتف حول عبد الباسط فترتجف خوفا وتعود الي الوراء لتسمع ماذا يقولون
السيدة .. يعني ايه ؟!! هو انت نسيت العهد ولا أيه ؟!!
عبد الباسط .. مش ناسي .. ودا اللي محيرني مش عارف اتصرف ازاي ؟!!
السيدة .. هو انت مش عايزها تموت ؟!!
عبد الباسط .. لا
السيدة .. وانا !! ولا انت جريت ورا قلبك ومشاعرك ونسيتني انا ؟!!
عبد الباسط .. ازاي انساكي وانا روحي متعلقة بيكي !!
السيدة .. يبقي تنسي مشاعرك دي خالص وتعلم قلبك انه ميتعلقش غير بواحدة بس هي انا .. فاهم ؟!!
عبد الباسط .. بس انا ....
السيدة .. كلامي انتهي .. ومتنساش ان انت السبب في اللي انا فيه ده !! وان هي واللي قبلها تمن تحريري من الاسر وخلاص باقي خطوة واحدة واتحرر  .. ولا انت حاسس انها اغلي عندك مني ؟!!
عبد الباسط .. مفيش حد في الدنيا كلها اغلي منك انتي حتي روحي
واثناء تلك الجملة تميل اميرة برأسها لتري ماذا يحدث مرة اخري فتجد عبد الباسط يقبل يد ذئب فتنصدم وتعود الي الوراء بسرعة
عبد الباسط .. انا اعمل اي حاجة في الدنيا عشان خاطرك .. انا كنت السبب ولازم ادفع التمن .. بس المرة دي التمن غالي اوي
السيدة .. انا عرفة انك حبتها اوي واتعلقت بيها كمان .. بس ما باليد حيلة لازم توفي بالوعد مع العنيد  وتكملهم ست ارامل .. بعدها هتحرر وهرجع اخدك تاني في حضني زي زمان .. ولا ما وحشكش حضني ؟!!
ايه ده ؟!!
عبد الباسط .. ايه في ايه ؟!!
السيدة .. شامة ريحة غريبة في المكان !! في حد تالت معانا هنا !!
عبد الباسط .. حد تالت !! مين ؟!
اميرة ترتبك عند سماع تلك الجملة وتنوي مغادرة المكان بسرعة ولكن عندما تدور للخلف تفاجئ بالثعبان الضخم واقف امامها ينظر اليها في غضب وبدأ يلتف حول جسدها النحيل ..
ماذا حدث ؟
باقي من الرواية ثلاثة فصول وسنعرف الحقيقة كاملة .. تابعوني
#محمد_مالك
[٢٩/‏٨ ١:١٨ م] محمد مالك: ذئب تخصص ارامل
البارت الثامن عشر
للكاتب المصري محمد مالك
اميرة تستسلم للثعبان الضخم الذي يلتف حول جسدها النحيل الذي انهكته الافكار والوساوس والالغاز التي لم تعرف اجابتها حتي الآن وادركت انها اصبحت هالكة لا محالة اغمضت عينيها وحبست انفاسها تنتظر التهام الثعبان لها وبعد مضي ثوان معدودة فتحت عينيها فلم تجد الثعبان !! اين ذهب ؟!! لا تدري .. فرت مسرعة من المكان وركبت سيارتها وهي في حالة يرثي لها .. انهيار عصبي وبكاء شديد .. لا تصدق ما رأت فمن تلك المرأة التي علي هيئة ذئب ؟!! وما علاقتها ب عبد الباسط ؟!! وما قصتها مع الارامل بالتحديد ؟!! اسئلة كثيرة ما زال يحيط بها الغموض ولكن الشئ الوحيد الذي تعلمه جيدا ان نهايتها قد اقتربت بالفعل .. هكذا قالت تلك المرأة المستذئبة لكي تتحرر !! ولكن تتحرر من ماذا ؟!! وما هي القوة التي يملكها عبد الباسط تجعله يفعل كل ذلك من افعال اقل ما تسمي بأنها افعال شيطانية !!  ومن منحة تلك القوة؟!! عادت الي منزل ابيها فتعجب الاب عندما فتح الباب ووجدها ماثلة امامه ..
الاب.. اميرة !! هو انتي خرجتي امتي من المستشفي ؟!!
اميرة .. انا مخرجتش .. انا هربت
الاب .. هربتي !! ليه يا بنتي ؟!! انتي اعصابك تعبانه ومحتاجة تقعدي هناك شوية لحد ما تهدي
اميرة .. انا اعصابي تعبت هناك اكتر !! وبعدين انا عمري ما ههدي ولا هرتاح غير لما عبد الباسط يخرج من حياتي للأبد .. هو السبب في كل اللي انا فيه ده
الاب .. تاني يا بنتي الكلام ده ؟!! انتي عايزة تخربي بيتك وخلاص ؟!!
اميرة .. يا بابا انت مش فاهم حاجة .. عبد الباسط دا بني آدم شاذ وغريب وغامض لأبعد الحدود وبيعمل حاجات مفيش بشر بيقدر يعملها !! دا اذا كان بني آدم اصلا
الاب.. رجعنا للتهيآت تاني !! شوفتي بقي انك محتاجة تقعدي في المستشفي شوية لحد ما تخفي !!
اميرة .. انا مش بيتهيآلي !! انت مش عاوز تصدقني ليه؟!  .. انا شفت عبد الباسط انهاردة بعنيا دول وهو بيبوس ايد ذئب بيتكلم بصوت واحدة ست وطلعلي تعبان كبير كان هياكلني بس اختفي فجأة ومعرفش راح فين !!
الاب متعجب بشدة .. شفتي ذئب بيتكلم وبصوت واحدة ست !! وكمان طلعلك تعبان كان هياكلك !! ودا حصل فين الكلام ده ؟!!
اميرة .. حصل في بيت في مكان مهجور في اسكندرية انا مشيت وراه عشان اعرف هو بيروح فين كل يوم اتنين !! واديني عرفت ..وسمعتهم بيقولوا كلام غريب مفهمتوش وانهم كمان ناويين علي قتلي
الاب .. كمان !! لا دا انتي حالتك صعبة اوي يا اميرة !! انا هكلم عبد الباسط
اميرة بغضب وانفعال شديد .. متتصلش بيه .. بقلك ده عاوز يقتلني ! انت مش عايز تصدقني ليه ؟!! احميني منه يا بابا ارجوك .. طلقني من الكائن دا اللي انا مش عرفة جنسه ايه ؟!! بشر ولا جن ولا ايه بالظبط ؟!! دا قتل ماما قدام عنيا ومعرفش قتلها ازاي . عشان كانت ناوية تقلي علي سر تعرفه عنه وبعدها بدقايق قالي مامتك بتتعشي مع باباكي في البيت !! عملها ازاي معرفش !!
الاب .. فعلا امك جت امبارح من عندك وقعدنا نتعشي سوا ..اينعم هي تعبانة شوية
اميرة تقاطعه .. مالها ماما ؟!!
الاب .. مش عارف .. ذاكرتها بعافية شوية وزي ما تكون ناسية حاجات كتير .. بتكلم معاها وهي تايهه خالص زي ما تكون في دنيا تاني
اميرة .. ايه !! زي ما قال بالظبط .. هو قالي كدا!!
 الاب .. مين بس اللي قالك كدا يا اميرة ؟!!
اميرة .. عبد الباسط .. قالي ان مامتك هتكون ذاكرتها بعافية شوية .. عشان متفتكرش حاجة ومعرفش السر اللي مخبيه عني
الاب .. سر ايه بس .. دول شوية اجهاد مع امك بسبب التفكير والقلق المستمر عليكي .. روحي يا بنتي ادخليلها اوضتها
الاب .. لا حول ولا قوة الا بالله .. ايه اللي حصلك بس يا بنتي !!!
ثم يتصل ب عبد الباسط ويخبره بما قالت ويطلب منه الحضور ليأخذها مرة اخري الي المستشفي
اميرة مع امها في غرفتها والام لا تتذكر شيئا
اميرة .. انتي مش قلتيلي يا ماما ان مراته اللي قبل مني قالتلك علي حاجات كانت بتحصل معاها وانتي مكنتيش مصدقاها في الاول .. لكن بعد ما اتجوزني واتكررت معايا صدقتيها
الام .. حاجات ايه يا بنتي !! انا مفيش حد حكالي علي حاجة وانا اصلا معرفش مرتاته الله يرحمهم ولا ليا علاقة بيهم !!
اميرة .. ايه !! يا ماما افتكري كويس انتي قلتيلي انك تعرفي مراته المستشارة وحكتلك علي حاجات كانت بتحصل معايا
الام .. هو كان متجوز مستشارة !! صدقيني يا بنتي انا معرفش مرتاته اللي قبل منك كانوا بيشتغلوا ايه
اميرة .. نعم !! ولا تعرفي مهندسة الديكور اللي اسمها شريفة اللي كانت حامل وماتت قبل ما تولد بأيام .. انتي حكتيلي عنها
الام .. لا يا بنتي صدقيني .. وبعدين احنا مالنا بالاموات !! الله يرحمهم مطرح ما راحوا ..ليه تشغلي بالك بماضي مش بتاعك ؟!!  صدقيني يا اميرة مش هتلاقي احسن من جوزك اصل وادب واخلاق.. وكفاية انه بيحبك وبيموت فيكي
اميرة .. نعم !!!!
ثم يأتي عبد الباسط بوجه غاضب عبوس ليأخذ اميرة .. يغطي ثيابه تراب كثيف وكانه قد سقط علي ارض غير نظيفه وعندما تنظر اميرة الي يده تلاحظ شئ غريب ؟!!
باقي من الرواية فصلين وسنزيح الستار عن الغموض الذي يسيطر علي جو الرواية واحداثها  .. كما يرجي عدم نسخ الرواية وتداولها بدون ذكر مؤلف العمل فالرواية محمية بموجب حقوق الملكية .
تحياتي الكاتب والسيناريست المصري محمد مالك.
[٢٩/‏٨ ١:١٩ م] محمد مالك: رواية ذئب تخصص ارامل
البارت التاسع عشر
للكاتب المصري محمد مالك
والد اميرة .. ايه يا دكتور ده !! هدومك مليانة تراب جامد !! هو انت وقعت في الشارع ولا ايه ؟!!
عبد الباسط .. مفيش حاجة يا عمي .. فين اميرة ؟!!
والد اميرة .. اميرة في الاوضة عند مامتها جوة .. الا بعد ازنك قلي هو علاج ضعف الذاكرة ايه ؟!! حكم الذاكرة بتاعة ام اميرة بعافية شوية وفجأة كدا؟!!
عبد الباسط .. انها تطلعني من دماغها
والد اميرة .. نعم ؟!!
عبد الباسط .. اسف .. مش مركز معاك .. بسيطة ان شاء الله .. بعد ازنك ممكن ادخلها ؟
والد اميرة .. اتفضل يابني هو انت غريب !!
ويدخل عبد الباسط فيري اميرة في حالة يرثي لها عيناها مليئة بالدموع تضم امها الي صدرها مكسورة حزينة حائره اوجعتها تلك الطعنات المستمرة من اقرب الناس اليها بدون ذنب يذكر او اثم يُقترف ثم تقع عيناها عليه فيكسو وجهها الغضب الشديد ثم تقول
اميرة .. انت جاي ليه هنا ؟!!
عبد الباسط .. جاي عشان اخدك معايا
اميرة .. تاخدني معاك فين ؟!!
عبد الباسط .. المستشفي .. انتي تعبانه ومحتاجة علاج
اميرة .. انت كدبت الكدبة وعايز الكل يصدقها !! انا مين وصلني للحالة دي غير انت يا سفاح
عبد الباسط .. سفاح ؟!!
اميرة .. ايوا سفاح .. قتلت خمسة قبلي ملهمش اي ذنب دا غير اللي قتلتهم لما حبوا يعرفوني الحقيقة !! الحقيقة اللي انت بتعمل المستحيل عشان تداريها عني .. اللي انا شفتها بعيني انهاردة .. اموت واعرف انت مين ؟!!
عبد الباسط .. قومي يا اميرة واسمعي الكلام
اميرة .. عايزني اروح معاك عشان تقتلني وتكمل الستة وبكدا تحرر الكائن اللي كنت عنده انهاردة زي ما كانت بتقول !! مين دي ؟!! انس ولا جن ؟!! ولا حيوان !! دي شكلها شبة الذئب وكانت بتتكلم بصوت انسان !! مين دي انطق وتعرفها منين ؟!! .. تكونش دي الجنية اللي من تحت الارض اللي بيقولوا عليك متجوزها وهي اللي بتعمل دا كله ؟!! وانت مين اصلا وحكايتك ايه ؟!! بس تصدق هي فعلا لايقة عليك ذئبه زيك يا ذئب مفترس
عبد الباسط ينفعل ويضربها بالقلم قائلا
عبد الباسط .. اخرسي بقي
اميرة .. امشي اطلع برة ولو عندك دم وذرة رجولة طلقني يا سفاح
عبد الباسط .. بقلك قومي معايا يا اميرة
الام .. قومي يا بنتي روحي مع جوزك .. ربنا يشفيكي
اميرة بغضب .. انا مش مجنونة يا عالم !! اللي قدامكم ده ذئب مفترس ووراه سر كبير وعامل نفسه ملاك برئ
الاب يدخل فجأة .. هو فعلا ملاك وعمرك ما هتلاقي زيه .. وكل كلامك ده مجرد تخاريف وعمر ما انسان عاقل هيصدقك ابدا .. امشي مع جوزك يا بنتي وارجعي المستشفي عشان تخفي الله يهديكي
اميرة .. انا مش همشي مع السفاح ده مهما عمل .. فاهمين ؟!
عبد الباسط بغضب يمسكها من يدها .. تعالي معايا يا اميرة واسمعي الكلام
اميرة .. نزل ايدك عني
واثناء ما هي تحاول دفع يده عنها تري مكان عضة الثعبان علي كف يده فتمسك يده وتنظر اليها في دهشه شديدة فتعلم انه هو الذي انقذها من الثعبان  ثم ترفع نظرها اليه وهي تهز رأسها بالرفض وعدم تصديق ما يحدث
اميرة .. لا .. لا .. دا كتير اوي !!
ثم تهرول مسرعة وتفتح باب الشقة وتخرج الي الشارع
الاب ينادي عليها .. رايحه فين يا اميرة ؟!! استني يا بنتي .. وراها بابني ل تعمل في نفسها حاجة
اميرة تركب سيارتها وتنطلق مسرعة لا تعلم الي اين تذهب ولكنها تريد الهروب من هذا الكابوس المزعج الذي ظل يطاردها في كل خطوة تخطوها .. وفجأة يظهرامامها فتاه جميلة اشبه بالملاك لم تتجاوز العشرين من عمرها ترتدي ملابس بيضاء وتحمل علي ظهرها جناحين .. اميرة تفرمل بسرعة فتقف السيارة والفتاه تتوجه نحوها وتحمل صندوقا في يدها
اميرة .. انتي مين ؟!!
الفتاه .. ضحية زيك
اميرة .. مش فاهمه ؟!!
الفتاه .. امسكي الصندوق ده وجواه هتلاقي اجابات لكل اسئلتك
اميره .. في ايه الصندوق ده ؟!!
الفتاه .. فيه اللي انتي بتدوري عليه .. حملك تقيل وامرك عسير ..  ربنا يكون في عونك .. بس اوعي تستسلمي ل تبقي زينا
اميرة تسمع صدي لجملة بس اوعي تستسلمي ل تبقي زينا ..  وكأن يرددها السيدات الارامل الخمس في صوت واحد  .. اميرة تندهش
الفتاه تختفي فجأة واميرة تبحث بعينيها في مكان فلم تجدها !!! ثم تدخل الي سيارتها مرة اخري وتفتح الصندوق .... وهنا كانت الصدمة؟؟؟!!!!!!
باقي علي حل اللغز بارت واحد .. تفاعل بقي ومشاركة فضلا وليس امرا ..
#ملحوظة جميع الحقوق محفوظة .
تحياتي الكاتب المصري محمد مالك ..
مدونة مالك الزعيم

ملك الروايات

 الصفحة الرئيسية ▼



الأربعاء، 28 أغسطس 2019

رواية ذئب تخصص ارامل البارت الاخير

بسم الله الرحمن الرحيم .. والا بذكر الله تطمئن القلوب .. صدق الله العظيم.

رواية ذئب تخصص ارامل

البارت العشرين والاخير

للكاتب المصري محمد مالك

جميع الحقوق محفوظة
اميرة تفتح الصندوق فتجد مجموعة من الصور تجمع بين عبد الباسط وزوجاته الخمس ولكنها تلاحظ شيئا غريبا ففي كل صورة يظهر في الخلفية صورة معلقة علي الحائط لرجل غريب المنظر شعر رأسه اسود لامع طويل وايضا ذو لحية طويلة وشعر حاجبيه كثيف جدا لدرجة انه يكا يُِخفي عينيه واحدي عينيه عليها عصابه سوداء .. تتعجب تُري من هذا الرجل ؟؟! ولماذا يظهر في خلفية كل صورة ؟!! وتقريبا جميعها يدل علي انه تم التقاطها في نفس المكان واستمرت تقلب الصور حتي عثرت علي صورة يظهر فيها هذا الرجل بهيئته كاملة يرتدي بدلة بيضاء وقميص اسود وعلي يمينه عبد الباسط وعلي يساره سيدة اخري لم تظهر في الصور السابقة وعندما تقلب الصورة تجد مكتوب علي ظهرها .. اخويا وحبيبي الصغنن والوحيد عبد الباسط دي اخر صوره هظهر فيها معاك بهيئتي وانا انسانه جميلة .. لكن مش خساره فيك اللي انا هعمله عشانك .. بس ارجوك اوعي تنساني واوفي بوعدك ليا .. اختك اللي بتحبك اوي .. راويه
واخيرا تجد صوره ل عبد الباسط وهو في غاية الاسر
 يظهر فيها بوجه حزين باكي وهو يحضن ذئب !!!وهنا كانت الصدمة .. ايقنت اميره ان الذئب الذي رآته في ذلك المنزل المهجور هو اخته الكبري راويه .. ولكن كيف تحولت ل ذئب ولماذا ؟!! ذلك هو السؤال المحير وما علاقة ذلك بالارامل الخمس الذين ماتوا خلال فتره قصيره ؟!! هذا سؤال محير آخر .. وما هو الشئ الذي فعلته راويه من اجل عبد الباسط وتطلب منه ان يفي بوعده لها ؟؟! وما هو هذا الوعد ؟!! انها مجموعة من الاسئلة المحيره التي انضمت الي قائمة طويلة من الاسئلة والتي تحتاج الي اجابه .. وفي قاع الصندوق وجدت صورة اخري حيث يظهر فيها هذا الذئب بمفرده معلق برقبته طوق اسود يتدلي منه ستة رؤوس مقطوعه حتي العنق .. ما هذا ؟!! احداهما رأس شريفه احدي زوجاته التي رأت صورتها من قبل في غرفتها بالڤيلا  .. وما هذا ايضا .. انها رأس الفتاه الجميلة التي اعطتها هذا الصندوق .. اما الطامة الكبري الرأس السادسة والاخيرة هي رأس اميرة !!! اميرة اقشعر بدنها وبدأت ملامح الحقيقة تتضح امامها ثم وجدت خمس مفاتيح داخل الصندوق .. فعرفت انها مفاتيح الغرف الخمس المغلقة .. فقررت الذهاب الي الفيلا والبحث عن باقي معالم الحقيقة .. حتي تتضح كامله امامها .. نعم قررت المواجهة مهما كان الثمن .. فأنطلقت مسرعة الي الفيلا فوجدت عبد الباسط في انتظارها وعيناه يخرج منها شرار الغضب .....؟؟؟؟؟
عبد الباسط .. وبعدين اخرة اللي بتعمليه دا ايه ؟!!
اميرة .. اخرته اني اعرف الحقيقة .. وانا خلاص شبه وصلت للحقيقة .. بس جميل اوي احساس الاخوة والتضحية الكبيره اللي بينك وبين راوية اختك .. هي مش اسمها راوية برضوا ؟!!
عبد الباسط .. راوية مين ؟!!
اميرة .. راوية .. اختك الذئب المتحول اللي انا شفته في البيت المهجور اللي انت بتروحه كل يو اتنين
عبد الباسط يمسكها بقوة من احدي يديها .. انتي عرفتي مين الحكاية دي ؟!!
اميرة .. سيب ايدي .. واحدة من اللي انت قتلتهم غدر قالتلي او بمعني ادق روحها الطاهره هي اللي قابلتني واديتني الصندوق ده
عبد الباسط .. فيه ايه الصندوق ده ؟!!
اميرة .. فيه اللي عرفني الحقيقة اللي انت بتعمل المستحيل عشان تداريها عن الناس ..
عبد الباسط .. افتحي الصندوق ده ووريني ايه اللي فيه
اميره .. اوي اوي .. اتفضل .. افتحه بنفسك
عبد الباسط يفتح الصندوق فيجد فيه مجموعة من الادوية المهدئة التي تأخذها اميره في علاجها النفسي
عبد الباسط بسخريه .. ههههههه .. دا العلاج بتاعك !! عشان تعرفي انك فعلا مريضة وعايزة علاج .. روح ايه اللي هتقابلك وتديلك صندوق جواه الحقيقة يا مجنونة؟!!
اميرة .. انا مش مجنونة يا عبد الباسط .. وانت اكتر واحد عارف اني عاقلة وان انت السبب في كل اللي بيحصلي ده
عبد الباسط .. عارف انك اعقل مني كمان .. لكن انا سابق وحذرتك وقلتلك يا اميره بلاش تدوري ورايا وتفتشي في الماضي .. وانتي مصره تعذبي نفسك لحد ما هتضيعيها
اميره .. ومين قالك اني انا كدا مش ضايعة ؟!! انا ضعت خلاص يا عبد الباسط ومنتظره تصدر امر بموتي زي اللي قبلي عشان تحرر اختك بعد ما اتسخطت ديب عشان خاطرك .. ارجوك ما دام انا الدور عليا وميته ميته قلي الحقيقة وريحني علي الاقل اموت وانا عرفة سبب موتي
عبد الباسط .. اسكتي بقي كفايه .. انا في عذاب
اميرة .. عذاب !! انت بتعذب بس لكن تتعذب ؟!! ما أظنش
عبدالباسط .. ومين قالك اني مبتعذبش ؟!! دا انا بموت في اليوم مليون مرة عشانك
اميرة .. عشاني ؟!!
عبد الباسط .. ايوة عشانك .. عشان حبيتك بجد وحبيت ابني اللي انتي شايلاه في بطنك .. حبيتك ومش عايز اخسرك صدقيني .. لكن مش عارف اعمل ايه !! انا هتجنن يا اميره .. ازاي اقدر احافظ عليكي من ال....
اميرة .. من ايه كمل .. الموت صح ؟!!
عبد الباسط .. ايوا الموت .. ارتحتي بقي .. الموت اللي بيقرب منك كل يوم خطوه .. لحد ما بقي خلاص .. مفيش بينك وبينه اي مسافة
اميره .. يعني ايه ؟!!
عبد الباسط .. يعني المفروض تكوني دلوقتي ميته وانا اللي معطل ده.. عشان بحبك ومش قادر اتخايل انك تفارقيني او اعيش من غيرك ابدا
اميره .. واموت ليه اصلا ؟!! عشان تحرر اختك مش كدا ؟!! ارجوك لو بتحبني بجد قلي الحقيقة وصدقني انا معنديش مانع اموت ابدا بس اموت وانا عرفه الحقيقة . اتكلم ابوس ايدك
عبدالباسط .. حاضر يا اميره هتكلم عشان ترتاحي
فجأة صوت الرعد وضوء البرق يملأ المكان واميرة ترتجف بشدة .. الصور تسقط من علي الحائط والاباجورات تتحطم ونري الاشياء تسقط من كل مكان والشبابيك تفتح بشدة واميره تتعجب
اميره بخوف شديد .. ايه في ايه ؟!! ايه اللي بيحصل ؟!!
عبد الباسط .. متخافيش دا العنيد غضبان
اميرة .. مين العنيد ؟!!
عبد الباسط .. جابر العنيد .. ساحر ملعون
اميره .. هو اللي كان مع اختك في الصورة ومعاك انت كمان .. شعره طويل وحواجبه كبيره وعنده عين طايره
عبد الباسط .. وانتي شفتيه فين ؟!!
اميره .. في الصور اللي كانت في الصندوق .. وكمان فيه خمس مفاتيح
عبد الباسط .. بس الصندوق فاضي مفهوش حاجة ؟!!
اميره .. صدقني .. هي وقفت قدام عربيتي وانا ماشية واديتني الصندوق ده ولما فتحته لقيت فيه مجموعة صور وكمان خمس مفاتيح .. حتي انا فكرتهم مفاتيح الاوض الخمسة اللي انت قافلهم
عبدالباسط .. قالتلك ايه بالظبط ؟!! واوصفيلي شكلها
اميره .. قالتلي انها ضحية من ضحياك .. هي صغيره مش كبيره في سني تقريبا .. جميلة وشعرها اسود لامع وطويل .. اديتني الصندوق وهي بتقول حررينا من فضلك
عبدالباسط .. نانسي ؟!!
اميره .. مين نانسي ؟!!
عبد الباسط .. واحدة من مرتاتي اللي قبلك
اميرة .. اللي انت قتلتهم ؟؟!!
عبد الباسط .. انا مقتلتش حد .. هو اللي قتلهم
اميرة .. مين هو اللي قتلهم .. اتكلم ؟!!
عبد الباسط .. قلتلك جابر العنيد .. ساحر ملعون
اميرة .. وقتلهم ليه وعشان ايه بالظبط ؟!!
عبد الباسط .. قتلهم عشان اختي ترجع بني آدمة تاني بعد ما اتحولت ل ديب مخيف الناس عايزة تقتله عشان ميآذيهاش .. عشان كدا حبستها في البيت المهجور ده لحد ما تتحرر وترجع انسانه تاني
اميرة .. بعد ما طبعا تقتلني عشان يبقوا ست ارامل صح ؟!! انا سمعتها بتقلك كدا
عبد الباسط .. قلتلك انا مبقتلش حد .. هو اللي بيعمل كل حاجة وبينفذ كل شئ وانا مجرد وسيلة مش اكتر
اميره .. احكيلي بالظبط .. ايه الموضوع ؟!!
عبد الباسط .. هقلك .. انا وانا صغير كنت غبي جدا جدا ومخي تخين واستيعابي ضعيف من الاخر كنت طفل بليد مستقبله باهت عنوانه الفشل .. والدي كان طبيب اتوفي وانا كنت في الثانوية العامة وكان حلمه هو وامي اني ادخل كلية الطب وابقي دكتور ناجح ومشهور .. بس ازاي يحصل وانا كنت بنجح يدوب علي الحركرك ..اختي راوية دي اكبر من بعشر سنين عكسي تماما .. ذكاء وتفوق وسرعة بديهة خلتها نجحت في الثانوية العامة بمجموع كبير ودخلت كلية الطب كمان واتخرجت منها بتقدير ممتاز .. المهم ضغطت علي نفسي بكل الوسائل ونجحت في الثانوية العامة وجبت ٧٠٪ وطبعا دا مجموع ميدخلش طب .. قلت احسن اهي جت لوحدها وانا اصلا مش راغبها لأني مش هنفع فيها .. امي واختي اصروا اني ادخل الطب وقدمولي علي كلية الطب في السويد وقعدت سنه هناك وبعدها حولت جامعة القاهرة .. كانت ايام صعبه بالنسبه لي وسقطت في البكالوريوس ٣ سنين وبعدها نجحت بتقدير مقبول عشان ابقي بعدها دكتور فاشل واتخصص جراحة واول عمليه عملتها في حياتي كانت زايدة لواحد غلبان مات وانا بعمله العمليه وبعدها ادمرت نفسيا
وفلاش باك حيث يتذكر عبد الباسط هذا الموقف المؤلم
راوية .. ممكن اعرف انت بتعيط ليه دلوقتي ؟!!
عبد الباسط .. بعيط لأني فاشل .. فاشل في كل حاجة وتفكيري محدود وقليل الحيلة .. انا قلتلك يا راوية مش هنفع في كلية الطب وانتي صممتي ادخلها ونجحت فيها بتقدير مقبول بعد ما سقطت ٣ سنين في البكالوريوس .. وادي النتيجة !! قتلت الراجل بإيديا دول .. لأني فاشل ومنفعش اكون طبيب
راوية .. بس دا كان حلم ماما الله يرحمها .. وانا كان كل هدفي انك تحقق حلمها مش اكتر
عبد الباسط .. ومن امتي احلامنا كلها بتتحقق ؟!! حلم ماما ده كان اكبر مني ومن امكانياتي وادي النتيجة الحلم اتحول لكابوس مؤلم
راوية .. بالعكس الحلم علي مقاسك بالظبط ومتفصل عليك وهيتحول لواقع جميل هتفخر بيه كمان وهتشوف ان ما بقيت احسن دكتور في العالم كله وهيبقي عندك مستشفي في كل بلد في العالم والفلوس والشهرة هيجروا وراك
عبد الباسط بسخريه .. ودا ازاي يحصل بقي .. بفشلي !! ولا بغبائي؟!!
راوية .. لا بالعنيد
عبد الباسط .. ايه !! مين العنيد ده ؟!!
نرجع تاني ل عبد الباسط واميرة
عبد الباسط .. طلع العنيد ده ساحر اسمه جابر العنيد عاش طول عمره في الهند واتعلم السحر الاسود واتمكن في كل فنون السحر .. المهم هي قالتلي نرحله ويعملك حاجة تخليك تبقي شاطر ونابغ في مجالك .. انا بصراحة اخدت الامر بكل تريقة .. بقي في واحد يقدر يحول انسان غبي وفاشل لإنسان ذكي وناجح !!، انهي قوة في الدنيا تقدر تعمل كدا ؟!! معرفش ان زي ما بيتحول الانسان من ناجح ونابغ الي انسان فاشل وامعة بالسحر ممكن يحصل العكس ..المهم روحناله وقبلناه وقالنا ساعتها
جابر العنيد .. بسيطة اخد من ذكائك واوهبه ل عبد الباسط
راوية .. وانا موافقة بس ينجح ويبقي احسن دكتور في الدنيا كلها
عبد الباسط .. انا اعترضت لكن هي اصرت فوافقت لكن بعد ما فضل يقول الطلاسم بتاعته اللي انا مكنتش فاهم معناها لقيت راوية جسمها ولع نار وبقت تهرش جامد وبدون سبب ومفيش ساعة ولقيتها اتحولت ل ذئب بشع ولما سألته ايه اللي حصل قالي خطأ غير مقصود في التعويذة بس رب ضرة نافعة قالي اني هبقي مشهور جدا وعندي فلوس كتير وهيبقي ملازمني جني ذكي جدا هو اللي هيخطط وينفذ لكل حاجة في حياتي وقلتله واختي اللي اتحولت دي هترجع ازاي بني آدمة تاني ؟!! قالي هتتجوز ست مرات ولازم يكونوا ارامل وهتحط تحت مخدة سرير كل واحدة فيهم الورقة دي ليلة زفتك وسيب الباقي علي الجني المسخر لخدمتك بس ممنوع يحملوا منك او يصعبوا عليك .. لأن في عذابهم حرية اختك من الاسر
وكمان قالي عمرهم هيكون قصير اكتر واحدة هتعيش معاك عام ومن ساعتها وانا حياتي اتحولت ٣٦٠ درجة في ظرف سنتين بقي عندي مستشفي استثماري كبير وفروع في كل مكان في العالم لدرجة اني نسيت الطب اللي انا اصلا متعلمتهوش وبقي تركيزي كله علي البيزنس بقي الطب بالنسبه لي مجرد تجارة مش مهنة انسانية وبقيت انفذ العهد بكل دقة لحد ما قابلتك اعجبت بيكي من اول يوم .. حسيت لاول مرة في حياتي بقلبي وهو بيدق .. مصدقتش اني لسة عندي قلب وممكن يحب !! عرفت انك مطلقة وان العنيد شرط زواجي يكون من ارملة عشان كدا خليت الدكتور يتقرب منك ويطلبك للجواز
اميرة .. عشان انت تقوم تقتله بعد كدا وابقي انا ارملة ؟!! صح
عبد الباسط .. دي الحاجة الوحيدة اللي انا عملتها بارادتي عشان حبيتك
اميرة .. عشان حبيتني تستغل طيبة انسان وتخليه يتقرب مني ويتجوزني عشان انت تقتله بعد كدا !! يا جبروتك يا اخي .. وانا دايما اسأل نفسي واقول ليه ياسر ساكت وزي ما يكون مخبي عني حاجة !! واللي بيحصل في الفيلا دا ايه والحاجات البشعة اللي انا بشوفها ؟!!
عبد الباسط .. دي ارواح اللي قبلك معذبين
اميرة .. عشان كدا قالتلي حررينا!! وعشان يتحرروا اعمل ايه؟!!
عبد الباسط .. لازم تجمعي الاحجبة الخمسة ويتحرقوا
اميرة .. هات مفاتيح الاوض
عبد الباسط ..ليه ؟!!
اميرة  .. هلم كل الزفت اللي حاطوا تحت مخداتهم وههحرقه
عبد الباسط .. لا مش ممكن اختي تموت كدا
اميرة .. اختك تستاهل الموت وانت كمان يا عبدو علي كل اللي عملتوه في خمس ولايا ملهمش ذنب وانا السادسة لو بتحبني فعلا ومش عايزني اموت هات المفاتيح من فضلك
عبد الباسط .. بس انا اختي ضحت عشاني .. ازاي اضحي بيها بالساهل ؟!!
اميرة .. اختك غلطت لما حبت تساعدك بالغلط وكمان شجعتك علي كل اللي عملته ده.. كفر عن ذنبك يا عبدوا وهات المفاتيح وانهي المأساة دي
وبعد تفكير وبعيون دامعة كسيرة عبد الباسط يعطي اميرة المفاتيح والتي تهم مسرعة وتفتح الغرف الخمس وتحاول الارواح الشريرة اخافتها ومنعها وتستطيع ان تجمع الاحجبة الخمسة وتقوم بحرقها بعدها تشاهد ٥ حمامات بيضاء اللون يحلقون في السماء فرحين وترحل الارواح الشريرة من المنزل ويهدأ ويستكين ثم تلتفت فتجد عبد الباسط
قد تحول ذئبا .. اميرة تصرخ من هول المنظر .. وفجأة تدخل الام لتوقظها
الام .. ايه يا بنتي مالك؟!!
اميرة .. كابوس يا ماما فظيع .. قريت الرواية دي امبارح وياريتني ما قريتها
وتشير الي رواية ذئب تخصص ارامل
الام .. ما انتي اللي غاوية رعب !! المهم علاء بره جاي يصالحك قلتي ايه؟!!
اميرة .. موافقة طبعا وهستحمله وهقف جمبه لحد ما يبطل الهباب اللي بيشربه
الام .. غريبة .. غيرتي رأيك فجأة دا انتي راسك والف سيف تتطلقي!!
اميرة .. اطلق عشان اتجوز ياسر وبعد ياسر يموت فاتجوز عبد الباسط عشان يقتلني!!
الام .. اللي بتقوليه دا يا اميرة ؟!! مين دول اللي بتقولي اساميهم
اميرة .. لا متاخديش في بالك دي خطرفة بسبب الرواية.....
يارب تكون النهاية عجبتكم وبعتذر للتأخير .. تحياتي الكاتب المصري محمد مالك
#ملحوظة  جميع الحقوق محفوظة .

في أغسطس 28, 2019
هل اعجبك الموضوع :

تعليقات

4 تعليقات
إرسال تعليق
  1. ممتاز استاذ محمد واسفه ان كنت هاجمتك بسبب التاخير وهاتابعك هنا في المدونه ان شاء الله.. بالتوفيق ايها العبقري الواعد

    ردحذف
  2. جميله جدااااأا حضرتك بارع
    وياريت الجزء الاخير من ذئب فالكواليس

    ردحذف

إرسال تعليق