عشقت زوجة ابي كاملة

رواية ذئب تخصص ارامل كاملة 

للكاتب المصري محمد مالك

جميع الحقوق محفوظة

[١٥/‏٨ ١٠:٠٥ ص] محمد مالك: انا اميرة عبد الصبور دكتورة صيدلانيه عمري ٣٢ سنة كنت متزوجه من ثلاث سنوات من صيدلي اسمه الدكتور علاء ابو الحسن اكبر مني ب خمس سنوات وربنا رزقني منه ب تقي عمرها دلوقتي سنتين .. المهم عشان مطولش عليكم مع ان حكايتي رخمة وطويلة بس استحملوني شوية هحاول اختصرها علي اد ما اقدر .. ال ٣ سنين زواج دول كانوا اصعب وامر ٣ سنين في حياتي اتعذبت فيهم بجد نفسيا وجسديا وكل حاجة لأن للاسف جوزي مكنش سوي .. يعني مكنش انسان طبيعي اولا كان مدمن مخدرات .. ثانيا كان شكاك جدا جدا وعصبي ودايما ما بينا مشاكل .. رحتي فين ؟!! كلمتي مين ؟!! اتأخرتي عند مامتك ليه ؟!! تليفونك كان مقفول ليه ؟!! انا شايفك كنتي بتبتسمي لفلان !! انا .. انا .. انا .. لحد ما كرهت اليوم اللي اتولدت فيه لدرجة ان في اخر كام شهر قبل الطلاق .. متستغربوش .. مش معقول بعد اللي حكيته دا كله استني معاه تاني !! .. المهم اخر كام شهر قبل الطلاق منعني اني انزل الصيدلية .. بالمناسبة هو عنده صيدلية كبيرة اوي وسط البلد وكمان منعني من زيارة اهلي واخر حاجة اخد مني الايفون بتاعي وادالي موبيل بدائي جدا يدوب بيقول الو بحجة انه شاكك اني بكلم حد ع الواتساب والماسنجر !! المهم اطلقت بعد ما شفت الذل والويل ورجعت بيت بابا ومعايا بنتي تقي اللي رفضت طبعا اسيبهاله .. بابا كان وكيل وزارة سابق بالتربية والتعليم يعني ع المعاش وماما مدير حسابات بمستشفي استثماري كبير صاحبها الدكتور .. عبد الباسط حمودة .. مش المغني الشعبي ؟!! اصحوا معايا شوية لو سمحتم دا مجرد تشابه اسماء .. المهم زي واحد لسة مطلقة جديد بتبقي نفسيتها تعبانه ولسة مجروحة ومحتاجة اللي يقف جمبها ويواسيها ولو بكلمة .. ماما شافتني بالحالة دي فقالتلي احسن حاجة ليكي الشغل ..
اميرة .. فكرة برضوا .. خلاص من بكرة اشوف اي صيدلية اشتغل فيها
الام .. وتشوفي ليه .. الدكتور عبد الباسط صاحب المستشفي اللي بشتغل فيها محتاج صيدلانية تمسك صيدلية المستشفي بدال الدكتورة نيفين اللي طالعة معاش بعد شهر .. انا هكلمهولك والراجل مش هيقول لا...
وياريته قال لا .. المهم ماما كلمته فرحب جدا ورحت قابلته .. حاجة كبيرة كدا وليها هيبة هو ارمل للمرة الخامسة !! واللي متحوزهم اصلا كانوا ارامل .. حاجة غريبة فعلا .. المهم قابلته وقعدت معاه واتكلمنا وعرف اني مطلقة .. فلقيته بيعلق وقال .. خسارة مش لو كنتي ارملة ؟!!..  انا مفهمتش معني كلمته وبالتالي عديتها ومسكت الصيدلية وهناك اتعرفت علي دكتور بشري اسمه ياسر .. اعجب بيا وبشخصيتي وبعد شهرين طلبني للجواز .. وبعد الحاح وضغط وافقت واتحوزنا بس طول الشهرين دول انا كنت ملاحظة نظرات الدكتور عبد الباسط ليا مكنتش مريحاني .. مش عرفة افسرها ابدا .. المهم الدكتور عبد الباسط طلب من ياسر جوزي انه يسافر فرع المستشفي بتاعته في الكويت وياسر سافر ومرجعش .. اتوفي هناك .. بيقولوا طلعوا قطاع طريق ضربوة ليه وعشان ايه ؟؟؟؟؟!!! شوفوا حطيت كام علامة استفهام وتعجب .. ومن ساعتها اخدت لقب ارملة في جوازة ما استمرتش غير شهرين ... وبدأت المشكلة ....
الرواية من اعظم ما كتبت .. لو في تفاعل ومشاركة هنزل باقيها في جزء واحد .. تحياتي ملك الروايات الكاتب المصري محمد مالك.
[١٥/‏٨ ١٠:٠٦ ص] محمد مالك: ذئب تخصص ارامل
للكاتب المصري محمد مالك
البارت الثاني
اميرة ما زالت تقص قصتها..
بصراحة رحيل ياسر اثر فيا جامد وتركي جرح كبير رغم المدة القصيرة اللي عشتها معاه .. كان دايما ساكت وحزين رغم اني كنت شايفة في عنية كلام كتير عايز يقوله .. المهم وانا قاعدة لقيت ماما دخلت عليا بتقلي
الام .. اميرة .. الدكتور عبد الباسط برة عايز يعزيكي
اميرة .. الدكتور عبد الباسط مين ؟!!
الام .. الدكتور عبد الباسط صاحب المستشفي اللي انا وانتي شغالين فيها
اميرة .. غريبة !! الدكتور عبد الباسط معروف عنه انه مش بتاع مناسبات ابدا .. لا افراح ولا احزان
الام .. الراجل كلف خاطرة وجاي يعزيكي .. نقلة انت جاي ليه ؟!!
اميرة .. خلاص اديني خارجة وراكي
المهم انا لبست عبايتي السودا وحطيت طرحة علي راسي وخرجت عشان اقابلة .. بصيت لقيته لابس بدلة سودا شيك اوي وتحتها قميص ابيض وكرڤات .. وانا ببص بعيني لقيت ع الطربيزة بوكيه ورد ؟!! بوكيه ورد في مناسبة زي دي !! المهم سلمت عليه وبعد ما سلمت لقيته وطي علي ايدي وباسها .. بصراحة انا استغربت اول مرة راجل يبوس ايدي حتي اجوازي الاتنين معملوهاش وراح قايلي
د.عبد الباسط .. دايما متأقلة والاسود عليكي بينطق
اميرة .. نعم !!!
تابعوني والجزء الاخير من الرواية ودا هيكون طويل بس بعد التفاعل والمشاركة .. تحياتي الكاتب المصري محمد مالك.
[١٥/‏٨ ١٠:٠٦ ص] محمد مالك: ذئب تخصص ارامل
البارت الثالث
للكاتب المصري محمد مالك
عبد الباسط .. انا مقصدش حاجة .. انا بس ببدي اعجابي بيكي .. لأني بصراحة من عشاق اللون الاسود في كل حاجة
اميرة .. بس حضرتك اللون الاسود دايما عنوان للحزن واليأس والمشاعر الحزينة عامة ٌ
عبد الباسط .. ودا المود بتاعي .. المهم انا مش عايزك تحزني ابدا لأن بصراحة العنين الحلوين دول خسارة في الدموع والوش الجميل ده خسارة في التكشيرة الوحشة دي
اميرة .. بس انا شايفة حضرتك ان دا شئ طبيعي .. واحدة جوزها لسة ميت من كام يوم هتكون فرحانه يعني ؟!!
عبد الباسط .. اظن انكم معشتوش مع بعض الفترة اللي تخليكي بعدها تحزني علي فراقة .. دول يدوب شهرين يا اميرة !!
اميرة .. حتي لو يوم واحد .. اسمه جوزي برضوا
عبد الباسط .. لا وفيه بجد !! بصراحة انا كل يوم بيزيد اعجابي بيكي عن اللي قبله .. انتي ظاهرة فريدة من نوعها وتخلي الواحد ينشدلك من اول نظرة
اميرة .. دكتور عبد الباسط .. حضرتك جاي تعزيني ولا جاي تتغزل فيا ؟!!
عبد الباسط .. جاي اعزيكي
اميرة .. بس انا شايفه ان كلام حضرتك من ساعة ما جيت غزل فيا !! حتي مقلتليش كلمة البقية في حياتك
عبد الباسط .. اها .. بعتذر .. البقية في حياتك يا اميرة .. وبوعدك ان اللي جاي احلي . خدي راحتك خالص ومنين ما تحبي ترجعي الشغل هتلاقية مستنيكي .. بعد ازنك
ثم يسلم عليها ويقبل يدها مرة اخري وهو ينظر اليها نظرة استلطاف واعجاب تفهمها اميرة
اميرة .. شرفت يا دكتور عبد الباسط
وبعد ان ينصرف تدخل ام اميرة فتراها في دهشة وحيرة
الام .. مالك يا اميرة ؟!! مبلمة ليه كدا ؟!!
اميرة .. الراجل ده غريب جدا !! اولا جاي يعزيني وحايب معاه ورد .. وبعدين قعدته كلها غزل ومعاكسة فيا ومقالش كلمة البقية في حياتك غير لما انا اخرجته .. دا غير نظراته اللي مش مريحاني!!
الام .. جايز يكون معجب بيكي وبيحاول يلمحلك
اميرة .. معجب بيا !! دا متجوز ٥ وكلهم ماتوا
الام .. دا نصيب واعمار بتاعة ربنا .. الراجل مموتهمش يعني .. وبعدين ما انتي دي الحوازة التانية ليكي
اميرة .. ماما .. كلامك مش مريحني .. انتي بتلمحي لحاجة .. هاتي من الاخر
الام .. بصراحة الدكتور عبد الباسط معجب بيكي وكلمني من يومين وقالي انه عايز يتجوزك بعد ما توفي شهور العدة
اميرة .. كلمك من يومين !! يعني اليوم اللي مات فيه ياسر !!! دا معندوش دم فعلا !!
الام .. يا بنتي الراجل ده بيزنس مان ومبيضعش وقت ابدا وعارف ان الحي ابقي من الميت وبعدين هو انتي تطولي واحد زي دا يبقي جوزك .. دا عنده مستشفي في كل دول العالم تقريبا دا ملياردير واسأليني انا
اميرة .. يعني انتي موافقة ؟!!
الام .. وايه اللي يخليني موافقش !! دا بنت البنوت تتمناه وتركع تحت رجليه كمان .. ما بالك بوحدة اتجوزت مرتين وعندها عيل كمان ؟!! فكري كويس يا بنتي وعايزاكي تفهمي ان الحظ مبيخبطش ع الباب غير مرة واحدة .. والحياه فرص والجدع اللي يحسبها صح خصوصا في الظروف اللي احنا عايشنها دلوقتي وانتي حرة برضوا
ثم تتركها وتنصرف واميرة في ذهول وتعجب ويمر شهر وتعود اميرة الي عملها بالمستشفي فتجد ان عبد الباسط قد احضر لها مفاجأة ويطلب مقابلتها
اميرة .. خير يا دكتور .. حضرتك طلبت تقابلني ؟!!
عبد الباسط .. انا اصدرت قرار بتعينك مدير ادارة الصيادلة بالجروب بتاعي اللي هنا واللي بره
اميرة .. ايه ؟!! بس انا لسة جديدة في المستشفي وصغيرة علي منصب زي دا
عبد الباسط يقترب منها ثم يمسك باحدي يديها ويقبلها وهو يقول .. كفاية انك كبيرة في نظري اوي .. اوي
اميرة .. احم .. انت عايز مني ايه يا دكتور ؟!!
عبد الباسط .. ههههه .. مش ماما قالتلك ؟!!
اميرة .. وياتري المنصب ده عشان تغريني اني اوافق علي طلبك ؟!!
عبد الباسط .. بالعكس حتي لو موافقتيش منصبك زي ما هو .. بس انا عارف انك هتوافقي
اميرة .. يا سلام !! وجبت الثقة دي كلها منين ؟!!
عبد الباسط .. الثقة هي سبب شهرتي ونجاحي ووصولي للمكانه اللي انا فيها دلوقتي وانا واثق انك هتوافقي
اميرة .. اشمعني انا ؟!!
عبد الباسط .. اسألي قلبي وهو يقلك .. انا من ساعة ما شفتك وانا مغرم بيكي
اميرة .. طب ما دام انت مغرم بيا من ساعة ما شفتني ليه مطلبتنيش للجواز قبل ياسر؟!!
عبد الباسط .. لأني بكل صراحة مبتجوزش غير من ارامل
اميرة تتعجب .. غريب منطقك ده !!
عبد الباسط .. كل واحد وزي ما بيحب او زي ما بيقولوا كل واحد وزوقه .. وانا زوقي كدا
اميرة .. طب ولنفرض اني مبقتش ارملة كنت هتعمل ايه ؟!!
عبد الباسط .. هفضل كاتم حبك في قلبي وساكت لحد ما تيجي الفرصة
اميرة .. واهي جت الفرصة .. صح ؟!!
عبد الباسط .. اكيد
اميرة .. قلي يا دكتور انت لسة معرفتش مين اللي طلعوا علي ياسر وضربوه ؟
عبد الباسط .. للأسف التحقيق لسة شغال هناك في الكويت وموصلوش لحاجة لدلوقتي .. اميرة..  انسي الماضي بكل آلامه وتعالي نبدأ صفحة جديدة مع بعض واوعدك ان مش هينكتب في الصفحة دي غير السعادة والفرح وكل شئ جميل
ثم بجلس علي مكتبه ويخرج دفتر الشيكات ويمضي علي شيك علي بياض ويعطيه ل اميرة
عبد الباسط .. امسكي يا اميرة
اميرة .. ايه دا ؟!!
عبد الباسط .. دا شيك علي بياض حطي فيه المهر اللي يعجبك
اميرة .. بس انا لسة موافقتش
عبد الباسط .. وماله .. خليه معاكي .. ولو موافقتيش قطعيه .. بس انا متأكد انك هتوافقي ..اتفضلي بقي عشان السكرتيرة توصلك لمكتبك الجديد .. مبروك
اميرة تخرج في ذهول وتقابل مني السكرتيرة وتقول لها
مني .. اكيد طلب منك الجواز ؟!!
اميرة .. وانتي عرفتي ازاي ؟!!
مني .. بصي انا مكنتش هقلك بس شكلك طيبة اوي وبصراحة صعبانه عليا .. انا هقلك بس وحيات بنتك انا مقلتلكيش حاجة
اميرة .. اتفقنا .. قولي بسرعة
مني تخبرها بشئ صادم ؟!!
تابعوني والبارت التالي .. تحياتي محمد مالك
[١٥/‏٨ ١٠:٠٧ ص] محمد مالك: رواية ذئب تخصص ارامل
البارت الرابع
للكاتب المصري محمد مالك
مني .. بصي يا ستي من الاخر كدا المستشفي كلها ان الراجل ده عينه منك واتأكدنا بعد ما عرفنا موضوع الترقية المفاجأة دي .. المهم الراجل ده متجوز خمس مرات قبل منك وكلهم ارامل وكلهم ماتوا بعد جوازهم منه بفترة صغيرة .. اكتر واحدة فيهم عاشت معاه سنة ..
اميرة .. طب ما انا عرفة الكلام ده .. والناس كلها كمان عرفاه .. ايه الجديد حضرتك ؟!!
مني .. الجديد بقي .. انهم بيقولوا ان الراجل ده متجوز جنية من تحت الارض وهي اللي رافضة يكونلها ضرة عشان كدا بتقتل اي واحدة يتجوزها في مدة قصيرة بعد الجواز
اميرة .. ايه التخاريف دي ؟!!
مني .. صدقيني وهي اللي بتشرط علية يتجوز ارملة
اميرة .. وازاي بقي رافضة يكونلها ضرة وشرطها انه يتجوز من ارملة ؟!! دا كلام تخاريف .. اولا الاعمار بيد الله وكل واحد عمره مكتوب عند ربنا .. معقول في ناس لسة بتفكر بالجهل ده لحد الآن ؟!!
مني .. صدقيني انا عايزة مصلحتك .. طب ما سألتيش نفسك هو اشمعني بيتجوز ارامل ؟!!
اميرة .. لا سألته هو وقالي ان دا مزاجه .. وفعلا كل واحد حر في نفسه يمكن هو باصص للأرملة من زاوية تانية احنا مش شايفينها وشايفها انها مناسبة ليه في كل حاجة
مني .. انا نصحتك يا دكتورة وانتي حرة بعد كدا .. اتفضلي اوريكي مكتبك الجديد
وتمر الايام بل الشهور وتنقضي عدة اميرة وذات ليلة تفاجأ بحضور الدكتور عبد الباسط الي منزلها ليطلبها بصفة رسمية من والدها وبعد تفكير عميق والحاح من الوالدين وافقت اميرة وكتبت مهرها في الشيك ٢ مليون جنيه ولم يعترض عبد الباسط بل اخبرها بأن تكتب مبلغ اكبر لو ارادت وتم الزفاف في احد الفنادق الشهيرة وسافرت اميرة مع عبد الباسط لقضاء شهر العسل في اليونان .. لم تكن تحلم بذلك ابدا فهذه اول مرة تسافر فيها خارج مصر وقضت هناك شهرا جميلا يعتبر من اجمل ايام العمر .. وتعود الي القاهرة وبالتحديد الي الفيلا التي يقيم بها عبد الباسط لتفاجأ بأشياء مذهلة اولا جميع خدم في الفيلا خُرص لا يسمعون ولا ينطقون فقامت بسؤاله
اميرة .. انا ملاحظة ان كل اللي شغالين هنا خرص حتي حارس الفيلا .. ليه ؟!!
عبد الباسط .. انا قلتلك دي ازواق ورغبات .. وانا رغبتي ان اللي يشتغلوا عندوا يكونوا صم وبكم
اميرة .. وانا دول هعرف اتعامل معاهم ازاي ؟!!
عبد الباسط .. هتعرفي بس واحدة واحدة انا كنت زيك كدا في الاول لحد ما اتعلمت
اميرة .. طب ليه متجبش ناس بتسمع وبتتكلم زينا ونوفر التعب دا كله؟!!
عبد الباسط .. قلتلك يا اميرة ذوقي كدا وبعدين مبحبش الاسئلة الكتير .. والجدال من الد اعدائي .. عاوزك دايما تقولي نعم وحاضر .. اتفقنا ؟!!
اميرة .. يعني ايه ماليش حق اني اعترض علي شئ شايفاه غريب شوية
عبد الباسط .. اعترضي براحتك بس بينك وبين نفسك .. لأن في الاخر قراري واجب التنفيذ .. اتفضلي بقي عشان تشوفي اوضة النوم
تصعد اميرة الي الدور العلوي فتجد خمس غرف بجوار بعضهم عليهم قفول كبيرة من الخارج فتتعجب
اميرة .. الاوض دي مقفولة ليه كدا ؟!!
عبد الباسط .. دول بتوع الخمسة اللي قبلك الله يرحمهم لا تقربي منهم ولا تيجي ناحيتهم ابدا
اميرة .. ليه ؟!!
عبد الباسط .. تاني .. ما قلتلك مبحبش الاسئلة الكتير يا اميرة
ويسافر عبد الباسط الي مؤتمر طبي ب لندن لمدة اسبوع ويترك اميرة وحدها في تلك الفيلا التي لم ينشرح ابدت لها صدرها عندما وطئتها قدماها لأول مرة بدأت تشعر بأن هناك سر غريب في تلك الفيلا وخاصة في الغرف الخمس المغلقة وذات يوم اخذها الفضول وتوجهت نحو احدي الغرف ووقفت امامها وامسكت بالقفل فوجدته فتح في يدها ترددت في بادئ الامر ان تدخل اليها ولكن قررت ان تدخل وتعرف ما تحويه تلك الغرفة من اسرار لا يريد عبد الباسط اطلاعها عليه وتصاب بصدمة شديدة بمجرد دخولها ..
ماذا رأت ؟!!
تابعوني والبارت الخامس .. تحياتي الكاتب والسيناريست المصري محمد مالك.
[١٥/‏٨ ١٠:٠٧ ص] محمد مالك: رواية ذئب تخصص ارامل
البارت الخامس
ما زالت اميرة تقص علينا تلك  القصة العجيبة التي ربما لا شبيه لها ولم تحدث من قبل ..
اخدني الفضول وانا ماشية جوة الفيلا ناحية ووقفت قدام اوضة من الاوض الخمسة المقفولين واول ما مسكت القفل بإيدي لقيته انفتح لوحدة وانفتح معاه الباب في الاول اترددت اني ادخل الاوضة لأن عبد الباسط حرج عليا اني اهوب ناحية اي اوضة فيهم لكن الفضول اخدني اني اعرف ليه عبد الباسط مش عايزني اقرب من الاوض دي !! ايه اللي مخبيه عني ومش عايزني اعرفة ؟!! وبالفعل دخلت الاوضة واول ما نورت النور انصدمت الاوضة كلها اسود .. الحيطان والارض باللون الاسود .. حتي اوضة النوم والملايات اللي عليها لونها اسود !!انا قلبي انقبض وقلت يا ساتر ايه ده ؟! ايه الفظاعة دي ؟!! منظر مخيف بجد .. قررت اني انسحب من الاوضة فورا لكن لفت نظري صورة واقعة علي الارض موجود فيها عبد الباسط ومعاه واحدة ست .. انا اخدت الصورة من الارض وبصيت فيها لقيته فعلا عبد الباسط ومتصور مع واحدة باين عليها حامل .. بطنها كبيرة اوي .. شكلها واحدة من زوجاته .. قلبت الصورة ولقيت مكتوب علي ضهرها .. حبيبي عبد الباسط انا مش مصدقة نفسي اني حامل .. شكرا ليك بجد .. حبيبتك شريفة ..قلت دي اكيد مراته الاولانيه لأن سمعت اسم شريفة دي قبل كدا من ماما .. هي تقريبا مهندسة ديكور .. بس مهندسة ديكور تبقي اوضتها باللون الاسود ؟!! جمدت قلبي ودخلت الاوضة قلت اكمل استكشاف واول حاجة عملتها اني فتحت الدولاب .. بصيت لقيت هدوم كتير اشكال والوان بس الصدمة الكبيرة ان لونها اسود هي كمان ؟!! وببص لقيت وسط الهدوم صندوق كبير .. اخدته وقعدت ع السرير وفتحت الصندوق .. لقيت جواة شوية مجوهرات مع مجموعة صور ل عبد الباسط وشريفة وكمان عقد جواز عبد الباسط من شريفة بتاريخ ٨ / ١٩٩٠ وفي ورقة كمان مدبسة في العقد من ورا ببص فيها لقيتها شهادة وفاة شريفة بتاريخ ٤ / ١٩٩١ .. يعني شريفة ماتت بعد جوازها من عبد الباسط ب ٩ شهور بس !! ببص لقيت سبب الوفاة هبوط حاد في الدورة الدموية وتسمم حمل !! يعني شريفة ماتت قبل ما تولد اصلا !! وببص كمان في الصندوق لقيت كراسة زي مفكرة كدا فتحتها لقيت شريفة كانت بتسجل فيها مذكراتها بصفة يومية .. قلبت في المذكرة بطريقة عشوائية فوقعت صفحة في ايدي مكتوب فيها .. ياربي حاسة اني هموت .. عمري ما شفت عبد الباسط بالحالة دي ؟!! يارب تمم حملي علي خير انا خلاص باقيلي ايام !! يارب انا بقيت اخاف من يوم الاتنين .. يارب انا استحملت كتير فوق طاقتي وشفت في الفيلا دي حاجات تطير العقل انا لولاك انت يارب انا كنت اتجننت .. انا انصدمت بجد في عبد الباسط .. مكنتش اعرف انه .......
وسابت نقط مكملتش انا استغربت مكملتش الجملة ليه وايه حكاية يوم الاتنين دي ؟!! وببص في التاريخ لقيتها كاتبة الكلام ده يوم ١٤ /٤/ ١٩٩١  يعني قبل وفاتها بأيام ؟!! المهم وانا قاعدة حسيت ان في حاجة مشيت علي جسمي انتقضت فمع حركة جسمي الصندوق اتقلب ع السرير فوقعت كل حاجة فيه علي الملاية فلما جيت الم الحاجات اللي وقعت الملاية اتحركت معايا بصيت لقيت الفرشة كلها دم مقدرتش استحمل المنظر جسمي كله ساب قررت اني اخرج من الاوضة فورا وانا خارجة اتصطيت في عم محمد الشغال في الفيلا لقيته بيبصلي وعنيه بتطق شرار زي ما يكون مفروس مني !!!
الاحداث اشتعلت وستشتعل اكثر بالبارت السادس .. تحياتي الكاتب المصري محمد مالك.
[١٥/‏٨ ١٠:٠٩ ص] محمد مالك: رواية ذئب تخصص ارامل
البارت السادس
للكاتب المصري محمد مالك
اميرة ترتبك وتتعجب من نظرة عم محمد ليها
اميرة .. انت بتبصلي كدا ليه ؟!!
محمد بصوت حاد ونبرة غضب .. انتي ايه اللي دخلك الاوضة دي ؟!! الدكتور مش محرج عليكي متهوبيش ناحية الاوض دي خالص ؟!!
اميرة .. ايه ده !! انت بتتكلم ؟!! هو انت مش المفروض اخرص؟!!
محمد .. انا بتكلم بس لما اكون متنرفز ؟!! من فضلك يا دكتوره اخرجي حالا ومتكررهاش تاني .. سامعة ؟!!
اميرة لا تصدق ويتملكها الخوف ثم تخرج مسرعة الي غرفتها وتغلق عليها الباب بالمفتاح من الداخل وبداخلها سؤال ملح لا تعلم اجابته .. ما الذي يحدث بالضبط في هذه الفيلا ؟!! هل ما رأت عينيها حقيقة ام مجرد كابوس مزعج ؟!! ثم تمسك بالمحمول بيدها المرتعشة الباردة وتتصل بأمها
اميرة .. الو .. اه يا ماما .. انتي فين ؟!!
الام .. في البيت يا حبيبتي .. مالك بتنهجي ليه كدا ؟!! انتي تعبانه يا اميرة ؟!!
اميرة ..لا مش تعبانه يا ماما .. بس انا خلاص مبقتش طايقة الفيلا دي
الام .. ليه يا حبيبتي ؟! هو الدكتور مزعلك في حاجة ؟!!
اميرة .. بالعكس يا ماما عبد الباسط كويس جدا معايا وبيتمنالي الرضا ارضي .. اينعم دماغة ناشفة حبيتين بس دا طبع غالب في كل الرجالة
الام .. طب ايه اللي مضايقك في الفيلا ومخليكي مش طايقاها ؟!!
اميرة .. في حاجات غريبة شفتها هنا ومش لاقيالها تفسير !! تصدقي يا ماما عم محمد اللي شغال عندنا في الفيلا طلع بيتكلم!!
الام .. ازاي ! انتي مش بتقولي ان اللي شغالين في الفيلا دول كلهم خرص ؟!!
اميرة .. ايوا .. بس صدقيني كلمني من شوية وسمعته بوداني دول !!
الام .. جايز يا بنتي اتهيألك ..
اميرة .. بقلك كلمني وسمعته بوداني ولما سألته ازاي بتكلم وانت اخرص ؟!! قالي انا بتكلم لما اكون زعلان ومتنرفز
الام .. ايه الكلام الغريب اللي انا بسمعه ده ؟!! في اخرص بيتكلم بس لما يكون زعلان ؟!! وبعدين ايه زعله اصلا ؟!!
اميرة .. اصله شافني دخلت اوضة من اوض مرتات عبد الباسط
الام .. طب وانتي ايه اللي دخلك يا بنتي هناك ؟!! هو جوزك مش قالك ملكيش دعوة بيهم ؟!
اميرة .. ايوا قالي .. بس انا اخدني الفضول هو ليه مش عايزني ادخل الاوض دي بالذات ؟!!
الام .. جايز يكون فيها ذكريات خاصة بيه وبزوجاته السابقين ومش عايزك تتطلعي عليها .. دا حقه يا اميرة يا بنتي
اميرة .. بس انا لما دخلت الاوضة دي اترعبت جدا ولقيت مفكرة مكتوب فيها كلام غريب زي ما يكون الغاز .. قليلي يا ماما .. هي شريفة دي مش مهندسة ديكور؟
الام .. ايوة .. دي اول واحدة اتجوزها الدكتور .. وماتت يا عيني في اخر ايام حملها بعد ما جالها نزيف شديد وتسمم حمل .. مالها دي يا بنتي ؟!!
اميرة .. ما هي دي اللي انا دخلت اوضتها .. تصدقي يا ماما الاوضة كلها اسود في اسود ؟!! مع انها مهندسة ديكور !! ماما انا حاسة اني قاعدة هنا في بيت الرعب .. في حاجات انا مش فاهماها بجد وحاسة ان عبد الباسط مخبي عليا سر كبير وبصراحة ان بديت اقلق
الام .. استهدي بالله يا بنتي .. انتي عشان لسة مستغربة المكان وبعدين انتي بتقولي ان الدكتور كويس معاكي .. روحي اتوضي وصلي ركعتين .. صدقيني انتي حظك من السما تعالي شوفي بيحسدوكي ازاي في المستشفي
اميرة .. قليلي .. تقي عاملة ايه ؟!!
الام .. اهوه زي القردة مش مبطلة شقاوة .. علي فكرة باباها جاي بكرة عشان يفسحها
اميرة .. والله انا بقلق لما بتخرج معاه
الام .. معلش يا بنتي ابوها برضوا ومن حقة يشوف بنته ويقعد معاها
اميرة .. مفيش مشكلة .. بس ميتأخرش بيها برة هما ساعتين تلاته مش اكتر
الام .. حاضر .. اهدي انتي بس واستمتعي بالاجازة بتاعتك وسيبك من الوسوسة بتاعتك دي .. ربنا يسعدك يا بنتي .. يلا تصبحي علي خير
اميرة .. وانتي من اهله ..
وفجأة تسمع اميرة صوت امرأة تضحك بصوت عالي .. تركز مع الصوت فتجد انه يصدر من غرفة مجاورة لها انها غرفة زوجة اخري من زوجات عبد الباسط .. تفتح اميرة باب غرفتها تسير في خطوات بطيئة نحو الغرفة تضع اذنيها علي الباب وتحاول ان تسمع الصوت مرة اخري وفعلا تعود المرأة وتضحك بصوت عال مرة اخري .. اميرة تقول
اميرة .. وبعدين !! ايه الليلة اللي مش فايته دي ؟!! ثم تسمع صوت اقدام تقترب منها تنظر الي نهاية بصرها لم تري شيئا .. صوت الاقدام يقترب اكثر واميرة تخاف فتدخل مسرعة الي غرفتها وتغلق عليها الباب من الداخل بالمفتاح مرة اخري وتضع اذنها علي الباب فتسمع صوت الاقدام ينتهي عند باب الغرفة المجاورة ثم ينفتح الباب وكأنه شخص دخل الغرفة ثم اغلق الباب .. ثم تسمع صوت المرأة تقول .. لا لا .. ارجوك بلاش .. ثم تصرخ صرخة تهز المكان وقلب اميرة ينتفض والتي لا تملك الا ان تهرول مسرعة الي السرير وتدفن نفسها تحت الغطاء وفي الصباح يعود عبد الباسط من المؤتمر حيث اخبره عم محمد بما حدث ..
ماذا حدث بعد ذلك ؟؟ تابعوني والبارت السابع مساء اليوم .. تحياتي #محمد_مالك.
[١٥/‏٨ ١٠:١٠ ص] محمد مالك: وادي كمان بارا عشان خاطر عيون متابعيني ..
ذئب تخصص ارامل
البارت السابع
للكاتب المصري محمد مالك
عبد الباسط في قمة الغضب بعد ان علم بما فعلته اميرة
عبد الباسط .. انا مش نبهت عليكي منهوبيش ناحية الاوض دي ؟؟! انطقي ؟
اميرة .. ايوه نبهت .. بس انا اخدني الفضول ووقفت قدام باب الاوضة ولما مسكت القفل بإيدي اتفتح لوحده .. انا مكنش قصدي افتح الباب .. وبعدين انا عايزة اعرف ايه الدم ده اللي مغرق السرير !! ولما قريت في المفكرة بتاعة شريفة مكتوب كلام انا مفهمتوش ؟!!
عبد الباسط .. وعمرك ما هتفهميه
اميرة .. ليه مش هفهمه .. فهمني انت وانا هفهم
عبد الباسط .. شريفة دي كانت مجنونة .. بتسمع وتشوف حاجات مبتحصلش .. فهمتي ؟!
اميرة .. يعني ايه مجنونة ؟!! امال انت اتجوزتها ازاي وهي بالحالة دي ؟!!
عبد الباسط .. انا لما اتجوزتها كان عقلها يوزن بلد
اميرة .. واتجننت هنا !! صح ؟!! هي كاتبة كدا في مذكراتها .. وفعلا دا اللي انا حاساه .. في حاجات مريبة بتحصل هنا ومش فاهمالها تفسير .. زي ما تكون الفيلا دي مسكونة !! وبعدين تعالي هنا .. انت مش قلتلي ان كل اللي شغالين في الفيلا خرص !! امال عم محمد اتكلم معايا ازاي ؟!!
عبد الباسط .. محمد مين اللي بيتكلم !! انتي اتجننتي يا اميرة ؟!! محمد دا اصم واخرص لا يسمع ولا يتكلم
اميرة .. بقلك اتكلم معايا وسمعني وسمعته
عبد الباسط .. تعالي معايا
ثم يدخل الي حجرة المكتب ويفتح درج المكتب ويخرج شهادة من معهد الصم والبكم
عبد الباسط .. دي شهادة من معهد الصم والبكم بأسم عمك محمد عشان تصدقي انه اصم وابكم
اميرة تقرأ الشهادة بتركيز .. مش معقول !!
عبد الباسط .. اميرة لآخر مرة هحذرك اسمعي كلامي ومتقربيش من اي اوضة من الاوض المقفولة دي نهائي .. متعمليش زي اللي قبلك كانت دماغهم ناشفة ومبيسمعوش الكلام
اميرة .. انا زهقت من قعدة البيت .. عايزة انزل المستشفي بكرة
عبد الباسط .. زي ما تحبي
اميرة .. وكمان عايزة بنت تكون بتسمع وتتكلم تشتغل هنا في الفيلا
عبد الباسط .. بس الشغالين كتير !!
اميرة .. بس مش عرفة اتعامل معاهم !!
عبد الباسط .. مع ان دا مش نظام حياتي بس هخالفه عشان خاطرك .. اي اوامر تاني ؟
اميرة .. عبد الباسط انت في حاجة مخبيها عني ؟!!
عبد الباسط .. انا مخبي حاجات كتير عنك .. لأن بكل بساطه ميهمكيش انك تعرفيها بالعكس انك متعرفيهاش افضل ليكي
اميرة .. بس انا عايزة اعرف كل حاجة عنك صغيرة وكبيره .. دا حقي يا عبدو
عبد الباسط.. اميرة بلاش تتوغلي بالطريقة دي في خصوصياتي .. ارجوكي ثم يمسك كلتا يديها ويقبلهم .. اتفقنا ؟؟
وتعود اميرة في اليوم التالي الي المستشفي لتباشر عملها فتجد الجميع يظهر لها الاحترام وتدخل مني السكرتيرة لتبارك لها
مني .. الف مبروك يا دكتورة وحمد الله علي السلامة
اميرة .. الله يسلمك .. اقعدي عايزة اتكلم معاكي
مني .. تحت امرك
اميرة .. انتي قلتيلي قبل كدا ان عبد الباسط مخاوي جن
مني .. انا آسفة .. ذلة لسان مني وحضرتك ادتيني الامان ولولا كدا انا مكنتش اتكلمت معاكي
اميرة .. انا مش بقلك كدا عشان تعتذري .. لا يا مني انا عايزة اعرف انتي عرفتي منين المعلومة دي ؟!!
مني .. ما تنسي حضرتك الموضوع ده وكأني مقلتلكيش حاجة .. هو حضرتك مش سعيدة في حياتك مع الدكتور؟
اميرة .. جدا ..بس في حاجات غريبة بتحصل قدامي ومش لاقيالها تفسير
مني .. في الفيلا صح ؟!!
اميرة .. انتي عرفتي منين انها بتحصل في الفيلا ؟!!
مني مرتبكه .. اه .. اااا .. اكيد هتحصل في الفيلا .. امال هتحصل فين يعني ؟!!
اميرة .. اها .. مني لو في حاجة مخبياها عني قليهالي ارجوكي
مني .. وانا هخبي عن حضرتك ايه بس يا فندم ؟!!
اميرة .. طب قليلي انتي عرفتي موضوع الجنيه دا منين ؟!
مني .. حاضر .. بس ارجوكي نتكلم في اي مكان بعيد عن هنا وتوعديني انك مش هتقولي لحد
اميره .. اكيد
مني .. اوك طب حضرتك طلبيات الادوية دي هتستني لبكرة عشان محتاجة توقيع الدكتور عبد الباسط
اميرة .. ليه هو الدكتور مش في مكتبه ؟!!
مني .. لا يا فندم انهارد يوم الاتنين وهو متعود ميجيش
اميرة ..ايه !! ليه ؟!!
مني ترتبك .. معرفش حضرتك هو دايما كدا بعد ازنك يا فندم
مني تنصرف واميرة تتذكر ما قرآته في مذكرات شريفة حيث ذكرت كلمة يوم الاثنين ..
امير متعجبه .. هي ايه الحكاية بالظبط ؟!!
الاحداث بلغت ذروتها ولو في تفاعل ومشاركة هنزل جزئين تاني اليوم .. تحياتي الكاتب المصري محمد مالك.
[١٥/‏٨ ١٠:١١ ص] محمد مالك: وادي كمان بارت اما اشوف التفاعل !!
رواية ذئب تخصص ارامل
البارت الثامن
للكاتب المصري محمد مالك
وتعود اميرة الي المنزل وطوال اليوم تحاول الاتصال ب عبد الباسط ولكن تليفونه مغلق حتي عاد الي منزله بعد منتصف الليل ليجد اميرة في انتظارة ويبدوا انها في حالة من القلق والغضب الشديد
اميرة .. انت كنت فين يا عبدو من الصبح؟!!
عبد الباسط .. طب قولي حمد الله علي السلامة الاول !!
اميرة .. الف حمد الله علي السلامة كمان .. قلي بقي كنت فين طول اليوم ؟!!
عبد الباسط .. كنت في اسكندرية
اميرة .. بتعمل ايه في اسكندرية ؟!!
عبد الباسط .. ولا حاجة متعود كل يوم اتنين من كل اسبوع اروح هناك في الشقة بتاعتي استجم واريح اعصابي شوية
اميرة .. بس انت مقولتليش لما وصلتني المستشفي الصبح انك هتسيبني هناك وتطلع علي اسكندرية ؟!!
عبد الباسط .. نسيت
اميرة .. نسيت !! اها .. طيب اشمعني بقي يوم الاتنين دا اللي انت بتسافر فيه اسكندرية ؟!!
عبد الباسط .. يوم عادي اخترته يكون اجازتي
اميرة .. اصل دايما الدكاترة الكبار بتكون اجازتهم يوم الخميس والجمعة
عبد الباسط .. انا حر يا اميرة اختار اليوم اللي يعجبني وقلتلك قبل كدا مبحبش الاسئلة الكتير .. وانتي مثرة تضايقيني بأسئلتك الغبية دي
اميرة .. انا أسئلتي غبية ؟!! .. الحق عليا اني بقلق عليك
عبد الباسط .. لا مش عاوزك تقلقي ابدا .. انا ميتخافش عليا خالص .. بالعكس لو مصرة انك تقلقي يبقي اقلقي مني
اميرة .. يعني ايه ؟!!
عبد الباسط .. يعني بلاش تفضلي تضايقيني بأسلوبك دا .. قلتلك انا ليا خصوصياتي ومبحبش حد يدخل فيها ابدا حتي لو مراتي
اميرة .. خلاص يبقي خدني معاك الاتنين الجاي اسكندرية انا كمان اعصابي تعبانه وعايزة استجم
عبد الباسط .. لا
اميرة .. ليه ؟!!
عبد الباسط .. مينفعش تيجي معايا هناك
اميرة ..ليه مينفعش ؟!!
عبد الباسط .. مينفعش وخلاص يا اميرة
اميرة .. انت ايه حكايتك بالظبط انت ليه غامض كدا ؟!! انت معيشني ليه معاك في الغاز وياريتني عرفه احلها !!
عبد الباسط .. كبري دماغك من اللي بيحصل حواليكي ومش هيكون في الغاز
اميرة .. علي فكرة تقي بنتي هتيجي من بكرة عشان تعيش معانا
عبد الباسط .. لا اوعي
اميرة .. ايه مالك انزعجت كدا ليه ؟!!
عبد الباسط.. اوعي تجيبي بنتك تعيش هنا
اميرة .. ليه ؟!! ما انا مينفعش اعيش من غير بنتي وهي كمان متقدرش تبعد عني اكتر من كدا دي خاربة الدنيا عند ماما وكفاية ليها اكتر من شهر ونص بعيد عن حضني
عبد الباسط .. انا قلتلك وانتي حرة .. انا مسافر انهاردة في مشكلة في فرع المستشفي بتاعتي في الكويت ولازم اكون موجود هناك بنفسي عشان احلها
اميرة .. بس انت لسة راجع من مؤتمر ف عايز تسافر تاني؟!!
عبد الباسط .. دا بيزنس والبيزنس عندي في اول قائمة اهتماماتي
اميرة .. وانا ترتيبي ايه في القائمة ؟!!
عبد الباسط ينظر لها تظرة ذات معني ثم يقول .. بعد ازنك ادخل الحمام اخد شاور
وبعدها بيومين حيث قد سافر عبد الباسط الي الكويت وترك اميرة وبنتها لوحدهما في الفيلا وبعد منتصف الليل حيث كانت اميرة نائمة وبنتها في حضنها استيقظت علي صوت الضحك العالي للسيدة من الغرفة المجاورة والذي قد سمعته قبل ذلك فتسلل الخوف الي قلبها وقامت واقتربت من الباب وسمعت نفس صوت الاقدام يقترب من الغرفة ثم قام بفتح الباب ثم دخل وبعدها صرخت المرأة كما فعلت من قبل .. اميرة تفتح باب غرفتها قررت ان تعرف ما الذي يحدث وهل هذا حقيقة ام مجرد تهيآت كما يظن البعض حتي تفاجأ ب عم محمد الشغال يخرج من الغرفة ويحمل في يده صينية عليها اطباق من الطعام الفارغة وحقنه ..
اميرة .. استني عندك .. انت كنت بتعمل ايه جوة ؟!!
محمد يشير اليها بأنه لا يفهم كلامها
اميرة تحاول ان تفهمه بلغة الاشارة .. بقلك انت كنت بتعمل ايه جوة ؟؟ وايه الصينية دي .. دا اطباق فيها اكل ؟!! وايه دي كمان ؟!! دي حقنه مهدئة !! هو في مين جوة ؟!! انتوا حابسين واحدة جوة انا سامعة صوتها .. انطق ومتمثلش انك اخرص !! انت اتكلمت قبل كدا .. انطق قول مين الست اللي في الاوضة دي
محمد يغضب فيدفعها بأحدي يديه قائلا ..
محمد .. خلاص بقي اسكتي يا شيخة
اميرة تصطدم باب الغرفة نتيجة دفعها عليه فينفتح الباب ........؟؟؟؟؟؟!!!!!
ماذا حدث تابعوني والبارت التاسع .. لو في تفاعل ومشاركة هنزل ببارت كمان انهاردة .. تحياتي ملك الروايات المصرية محمد مالك .
[١٥/‏٨ ١٠:١١ ص] محمد مالك: ذئب تخصص ارامل
البارت التاسع
للكاتب المصري محمد مالك
اميرة تندهش عندما تقع عينيها علي عيني امرأة مقيدة من كلتا يديها في سرير حديد وكأنه سرير مستشفي وجهها شاحب حزين عيناها دامعتين انها تبكي ودموعها قد تلونت بلون الدم ثم تنزل الي اسفل فتجد المرأة بلا قدمين !! نعم تراها بلا قدمين فأقدامها مبتورة حتي ركبتيها .. تلاحظ المرأة ان اميرة تنظر الي قدميها فَتُحرج وتحاول ان تغطيهم بالغطاء ولكنها لا تستطيع فيداها مقيدتان ثم تبتسم ل اميرة وتضحك ضحكتها العالية الهيستيرية
اميرة متعجبة ثم تلتفت الي الخلف لتسأل محمد قائلة .. مين دي ؟!!
ولكن لم تنتهي من جملتها حتي تجد محمد يضع منديلا به مادة مخدرة علي انفها وفمها فتنام خلال لحظات وبعد مرور بعض الوقت تفيق اميرة لتجد نفسها في غرفة نومها وحولها ابيها وامها وبنتها واحد الاطباء وشغالة تدعي فايزة
اميرة . انا فين ؟!!
الام .. انتي في سريرك يا بنتي
اميرة تنتفض قائمة .. في سريري !! انا ايه اللي جابني في سريري ؟!!
الام .. جابوكي الشغالين بعد ما اغمي عليكي وانتي في الحمام
اميرة .. حمام !! لا محصلش .. انا سمعت  صوت واضحة بتضحك في الاوضة اللي جمبي !! ايوه الاوضة اللي جمبي .. الحق يا بابا الحقي يا ماما الاوضة اللي جمبي فيها واحدة ست رابطينها من ايديها بسلاسل حديد في السرير .. انا شفتها بعيني لما زقني اللي اسمه محمد ووقعت علي الباب فاتفتح . شفتها بعيني صدقوني كان خارج من عندها ومعاه صينية اكل وحقنه مهدئة .. انتوا وافقين ليه ! روحوا اكسروا الباب وخرجوها .. شوفوا مين دي ؟!!
الاب .. اهدي يا اميرة وبلاش تخاريف من فضلك
اميرة .. انا مش بخرف يا بابا انا شفتها بعيني صدقوني
الاب .. اولا عمك محمد من الصبح في البلد عند اولاده
اميرة .. في البلد !!
الام .. ايوا في البلد من الصبح يا بنتي وهو كمان اللي باعتلك الشغالة دي اسمها فايزة بتتكلم وبتسمع زي ما طلبتي من الدكتور  تبقي بنت اخته
اميرة .. ومين دا ؟!! تقصد الطبيب
الام .. دا الدكتور وحيد اللي حبناه يكشف عليكي لما عرفنا انك مغمي عليكي في الحمام
اميرة .. هتقوليلي الحمام تاني يا ماما ؟!! انا ما اتنيلتش واغمي عليا جوة الحمام .. انا حد حط منديل علي بقي من ورايا بعدها مدرتش بالدنيا
الاب .. منديل ايه وكلام فاضي اللي انتي بتقوليه ده ؟!! اشحال ما احنا جينا وشفناكي بعنينا وانتي مغمي عليكي جوة الحمام!!
اميرة .. وانتوا عرفتوا ازاي اصلا اني انا مغمي عليا وجوة الحمام زي ما بتقولوا ؟!!
الام .. فايزة .. الله يباركلها اول ما جت الفيلا فضلت تدور عليكي لحد ما عرفت انك جوة الحمام ولما طولتي قلقت ففضلت تخبط عليكي مردتيش ففتحت الباب لقيتك مغمي عليكي في الارض جريت علي تليفونك واتصلت بأبوكي جاب الدكتور وجه عشان يكشف عليكي ويقلك مبروك
اميرة .. مبروك !! ليه ؟!!
الام .. انتي حامل يا اميرة في شهرين
اميرة .. حامل !!
الطبيب .. ايوا حضرتك حامل في شهرين تقريبا وتقريبا دا سبب الاغماء اللي حصلك في الحمام .. باين عليكي عندك انيميا واجهاد شديد
اميرة .. انا فعلا مجهدة نفسيا وبدنيا
الطبيب .. واضح جدا .. بس لازم تهدي اعصابك شوية مفيش حاجة تستاهل .. ومع شوية الادوية هتبقي زي الفل .. مبروك
الام .. الله يبارك فيك يا دكتور .. اتفضل حضرتك
وينصرف الطبيب والاب معاتبا بنته
الاب .. وبعدين معاكي ؟!! مش هتبطلي التخاريف دي ولا انتي ناوية تخربي بيتك ؟!! انا شايف ان الراجل مش مقصر معاكي في حاجة واي حاجة بتطلبيها بينفذها
الام .. مالك يا بنتي هو انتي اتحسدتي ولا ايه ؟!!
اميرة .. بقلك يا ماما في واحدة ست محبوسة جوة .. انا شفتها بتبكي بدال الدموع دم ورجليها الاتنين مقطوعين
الاب .. ودي شفتيها فين بقي ؟!!
اميرة .. في الاوضة اللي جمبي
الاب .. ازاي والاوضة اللي جمبك مقفولة وعليها قفل اد كدا !!
اميرة .. الباب اتكسر لما زقني الزفت اللي اسمه محمد عليه .. يا بابا دا طلع بيتكلم وعامل نفسه اخرص !!
الاب .. باب ايه اللي اتكسر !! الباب سليم وزي الفل .. وقلتك ان عمك محمد في البلد من الصبح ولسة مرجعش
اميرة تنهض من علي فراشها وتذهب مسرعة لتعاين الباب
الام .. رايحه فين يا اميرة ؟!!
اميرة تقف امام الباب وتدقق اليه النظر فتتعجب لقد حدث كسر بالباب مكان القفل نتيجة الدفع الشديد .. اين ذهب ؟! الباب سليم تماما والقفل كما هو مغلق
اميرة .. مش معقول !! كان في كسر هنا
الاب يخرج خلفها .. صدقيني دماغك اللي عاوزة الكسر لو معقلتيش وبصيتي لجوزك وبيتك .. انتي دلوقتي حامل فكري في ابنك اللي جاي ولا عايزاه يتولد يلاقي ابوه وامه منفصلين زي بنتك !! اسمعي كلام جوزك يا اميرة ومتحاوليش تشغلي بالك بأمور تخصه هو . انتي مش من حقك تحاسبيه علي الماضي .. حسابك معاه من ساعة ما اتجوزك .. فاهمه ؟!! انتي حرة
ثم يتركها وينصرف .. وبالمساء تتصل اميرة ب مني السكرتيرة لتطلب مقابلتها والتي اخبرتها انها مستعدة تقابلها الان في كوفي شوب بوسط البلد
فايزة تدخل الغرفة فتري اميرة ترتدي ملابس الخروج.
فايزة .. انتي خارجة يا ست هانم ؟!!
اميرة .. ايوا مشوار ساعتين وراجعة .. البنت نايمه دلوقتي لما تصحي حميها واكليها واياك عينك تغيب عنها لحظة واحدة .. فاهمة؟!!
فايزة .. عنيا يا ست هانم
اميرة .. الا قليلي .. عم محمد دت يبقالك ايه ؟!!
فايزة .. خالي يا ست هانم
اميرة .. انتي متأكدة ان خالك ده اخرص مبيتكلمش ؟!!
فايزة .. لا بيتكلم ولا بيسمع يا ست هانم .. مولود كدت بعيد عنك
اميرة .. اها .. ماشي
فايزة .. هو انتي رايحة فين يا ست هانم؟!!
اميرة .. قلتلك ورايا مشوار .. وبعدين انا بس اللي اسأل هنا وانتي اللي تجاوبي .. سامعة ؟!!
فايزة .. خدامتك يا ست هانم
اميرة .. مش مرتحالك بس ما علينا .. سلام
وتنصرف اميرة وفايزو تنظر اليها بكل مكر وخبث شديدين
اميره الان في الكوفي شوب في انتظار مني لقد تأخرت عن موعدها كثيرا ثم تحضر اخيرا
اميرة .. اتأخرتي اوي ؟!!
مني .. معلش في حادثة ع الدائري موقفة الطريق خالص
اميرة تلاحظ انا مني تنظر يمينا ويسارا
اميرة .. مالك في ايه ؟!!
مني .. مش عرفة حاسة ان في حد مراقبني من ساعة ما خرجت من البيت
اميرة .. اوعي بكون بيتهيألك انتي كمان ؟!!
تشربي ايه ؟
مني .. لا انا مش عاوزة اشرب حاجة
اميرة .. مالك يا بنتي مش علي بعضك ليه ؟!! روشتيني معاكي !!
مني .. بصي يا دكتورة من الاخر كدا ابعدي عن الدكتور عبد الباسط  .. انا بحذرك
اميرة .. انا عاوزة افهم بقي ليه بتقولي كدا فهميني واحدة واحدة
مني .. هفهمك ..
وفجأة يرن التليفون المحمول الخاص ب مني
مني .. بعد ازنك يا دكتورة .. الو .. انا .. اناااا ..انا في كوفي شوب .. لا مش معايا حد لوحدي .. صدقني يا فندم .. حاضر اديني خارجة . بعد ازنك يارب استر
اميرة .. رايحة فين ؟!! انتي محكتيش حاجة !!
مني تنظر اليها نظرة ندم وكأنها ندمت علي اخبارها ومقابلتها ثم تخرج مسرعة دون ان تعلق علي اميرة .. وتخرج اميرة بعدهت بدقائق لتشاهد تجمع من الناس ويبدوا انها حادثة فتقترب من هذا التجمع لتصاب بالصدمة عندما تجد مني في الارض وقد صدمتها سيارة اثناء خروجها من الكوفي شوب !!!!!
ايه اللي حصل بعد كدا تابعوني والبارت العاشر .. تحياتي #محمد_مالك
في متابعين طلبوا مني انزل الحلقة العاشرة عشان يتسلوا بيها لحين الانتهاء من كتابة الرواية كاملة .. عنيا ليكم وادي كمان بارت.
رواية ذئب تخصص ارامل
البارت العاشر
للكاتب المصري محمد مالك
جميع الحقوق محفوظة
اميرة عندما تشاهد منظر مني وهي ملقاه علي الارض والدم يسيل من رأسها نتيجة تعرضها لحادث سيارة
اميرة .. مش معقول !! مني ! هو ايه اللي حصل ؟!!
احد الاشخاص .. ضربتها عربية وهي خارجة من الكوفي شوب
اميرة .. ومحدش مسك اللي ضربها ؟!!
احد الاشخاص .. للأسف جري الجبان
اميرة .. طب محدش اخد نمرة العربية ؟!!
احد الاشخاص .. للأسف النمر ممسوحة ومش واضحة
اميرة .. مش واضحة ؟!!
احد الاشخاص .. واللي يستفزك انه بعد ما صدمها وقف ثواني وطلع راسه من الشباك وقالها .. خلي لسانك ينفعك يا حلوة
اميرة .. يعني دا قاصد يضربها
احد الاشخاص .. اكيد .. بس انا الحمد لله قدرت اصورة بالموبيل
اميرة .. بجد ؟! وريني كدا
احد الاشخاص .. هو اينعم خافي وشه بالنضارة الشمس والكسكته اللي علي راسه بس وحيات امه هشيرله الصورة علي الفيسبوك وهيتمسك ان شاء الله
ثم تأتي الاسعاف وتنقل مني الي المستشفي والتي تمكث في غرفة العناية المركزة وتزداد حيرة اميرة من هذا الشخص ؟! وما الدافع لقتله مني ؟!! ولماذا في هذا التوقيت بالذات وهي كانت علي وشك ان تخبر اميرة بالحقيقة !! ويا تري هل ل عبد الباسط علاقة بالموضوع ؟؟! اسئلة كثيرة ترهقها ولا تجد لها اجابة ويعود عبد الباسط من السفر وتخبره اميرة بكل ماحدث فيشتعل غضباً
عبد الباسط .. انا عاوز افهم انتي ليه مصرة تعملي مشاكل بينا !! انا مش قلتلك خرجي موضوع الاوض المقفولة دي من دماغك ؟!!
اميرة .. بقلك يا عبدو بالليل انا بسمع صوت واحدة بتضحك من جوة الاوضة وصوت رجلين بتيجي عند الاوضة وتقف وبعدها الباب بينفتح ولما خرجت اشوف ايه الحكاية لقيت عم محمد خارج من عندها ومعاه صينية اكل فاضية وحقنه مهدئة ولما سألته اتعصب وقالي اسكتي بقي يا شيخة زقني علي الباب فاتفتح فشفت ست ايديها مربوطة  بسلاسل حديد في السرير ورجليها مقطوعين كمان ودموع عنيها كانت عبارة عن دم ولما جيت الف اتحط منديل علي بقي ومدرتش بحاجة بعدها
عبد الباسط .. ايه فيلم الرعب اللي انتي بتحكية ده !! انتي خيالك واسع وبيتهيآلك حاجات غريبة!!
اميرة .. انا مش بيتهيآلي حاجات بالعكس دا اللي حصل بالفعل وعلي فكرة عم محمد اتكلم للمرة التانية !!.
عبد الباسط .. تاني ؟!، انا كدا هشك
اميرة .. هتشك في ايه ؟!
عبد الباسط .. هشك ان عقلك سليم يا دكتورة .. بلاش توصلي نفسك للدرجة دي
اميرة .. انت بتقول فيها انا قربت اتجنن فعلا من الغموض اللي انا عايشة فيه ده ؟!! انا عايزة افهم ايه اللي بيحصل ده ؟!! وانت مخبي عني ايه ومش عايزني اعرفة ؟!
عبدالباسط .. تعالي يا اميرة
ثم يذهب بها ليفتح الغرفة المغلقة امامها فتجدها فارغة تماما
عبد الباسط. فين بقي الست اللي بتقولي عليها دي وفين السرير اللي بتقوله عليه ؟!! الاوضة فاضية قدامك
اميرة .. مش معقول !! لا انا هتجنن بجد.. انت مين وعايز مني ايه ؟!!
عبد الباسط .. لآخر مرة بحذرك يا اميرة بلاش تدخلي نفسك في امور متخصكيش لأن العاقبة هتكون مش كويسة عشانك وادي الاوضة قدامك فاضية .. اهدي بقي ارجوكي
اميرة .. افتحلي باقي الاوض اللي انت قافلها حالا
عبد الباسط .. وبعدين معاكي .. علي فكرة انا حاسس ان اعصابك تعبانه شوية تعالي نسافر برة مصر كام يوم .. تعالي نروح ايطاليا
اميرة .. انا مش عايزة اروح معاك اي مكان .. انت انسان غامض وغريب وانا مبقتش مرتحالك .. انا عايزة اعرف انت مين بالظبط؟!!
عبد الباسط .. وانا هعذرك عشان مقدر حالتك النفسية .. وكمان عشان مش في ايدي حاجة غير اني اعذرك عشان بحبك ثم يقبل احدي يديها
اميرة .. علي فكرة .. انا حامل في شهرين
عبد الباسط .. ايه ؟!!
اميرة .. بقلك انا حامل .. اتخضيت ليه كدا؟!!
عبد الباسط .. نزليه فورا
اميرة .. مين ده اللي انزله ؟!!
عبد الباسط .. اللي في بطنك يا اميرة
اميرة .. ليه ؟!! انت مش عاوزني احمل منك .. انت مش عاوز اطفال مني ؟!! انت لسة قايل انك بتحبني !!
عبد الباسط .. ما انا عشان بحبك لازم تنزلي الولد .. اسمعي الكلام
اميرة .. ليه انزلة ؟!!.
عبد الباسط .. من غير ليه
اميرة .. مش بقلك غامض
وفي اليوم التالي وداخل المستشفي يحضر شخص يدعي بكر وهو الذي نفذ حادث الاعتداء علي مني السكرتيرة وهو الآن امام عبد الباسط
عبد الباسط غاضب .. غبي .. مطلع راسك من العربية وكأنك بتقلهم انا هو !!   .. اهو صوروك يا حيوان وشيروك علي الفيس
بكر .. طب والعمل يا باشا؟!! انا بكدا ممكن اتقفش واروح في داهية
عبد الباسط .. تاخد الفلوس دي وتختفي في اي مصيبة لحد ما اشوف هتصرف ازاي .. مش عايز الدبان الازرق يعرفلك طريق ومتتصلش بيا انا اللي هتصل بيك .. فاهم ؟!!
بكر .. فاهم
عبد الباسط .. امشي غور
واثناء خروجه من الباب تقابله اميرة فيقف امامها وينظران لبعضهما البعض ثم تتعجب قائلة
اميرة .. انت ؟!!
باقي من الرواية عشرة اجزاء كاملة .. يلا تفاعل ومشاركة عشان انزل بيهم مرة واحدة .. تحياتي الكاتب والشاعر المصري محمد مالك.