رواية انتقام شربات موسي
البارت الثالث
للكاتب المصري محمد مالك
وجاء المساء واتصل حسن ب جيهان ليخبرها بالمعلومات التي جمعهاحسن .. مساء الفل يا ست هانم
جيهان .. مساء النور خير يا حسن؟
حسن .. بصي يا ست الكل . . البنت دي اسمها شربات فتحي سيد من الطالبية ابوها صرماتي اتوفي وهي لسة كانت في اللفة وامها لسة ميته ملهاش اسبوع بتشتغل ممرضه في مستشفي خاص وحاليا واخده شبه بيات في المستشفي عشان متروحش البيت وتهرب من الديانه اللي قاعدين ليل نهار قدام باب الشقة عاوزين فلوسهم زي صاحب البيت اللي عايز ايجارة والبقال وغيرهم كتير .. تمام كدا سعتك ولا محتاجة معلومات اكتر ؟
جيهان .. لا يا حسن تمام كدا انت جيبت المفيد وانا لو عزت معلومات زيادة هكلمك
حسن .. تحت امرك يا ست الكل انا خدامك
جيهان .. مع السلامة ثم تغلق الخط وتحادث نفسها قائلة . بقي كدا !! يعني طلعتي شحاته ومش لاقية تاكلي !! عشان كدا جاية تعملي قصة عشان تطلعي بقرشين .. اه يا نصابة يا بنت الكلب .. وفجأة يرن تليفون جيهان والمتصل شوكت ذراعها الايمن في الشركة
جيهان .. ايوا يا شوكت .. خير طمني؟
شوكت .. للأسف يا ست هانم الورقة سليمة ١٠٠٪
جيهان .. ورقة ايه اللي سليمة ؟!!
شوكت .. الورقة اللي حضرتك اديتهالي بتاعة عقد الزواج العرفي وطلبتي مني اتأكد اذا كان التوقيع اللي عليها يخص المرحوم موسي والدك ولا لا .. انا وديتها عند اكبر مزيف فيكي يا مصر واكد ان دا توقيع المرحوم
جيهان .. طب والصور ؟!
شوكت .. سليمة ومفيهاش فوتوشوب
جيهان .. انت متأكد ؟!! شوف حد تاني يا شوكت
شوكت .. متأكد يا ست هانم وبعدين انا اسمع ان المرحوم ابوكي كان روميو زمان ومقطع السمكة وديلها واكيد دي كانت نزوة من نزواته .. هو في مشكلة يعني من ورا دي ؟!! ووقعت في ايديكي ازاي عدم لا مؤاخذة؟!!
جيهان .. مش وقته يا شوكت هتعرف كل حاجة بعدين .. سلام
وتغلق الخط ثم تتصل علي شربات
شربات .. الو .. مين معايا ؟
جيهان .. انا جيهان موسي
شربات .. اها .. اهلا بيكي
جيهان .. اسمعي يا بنت انتي انا قعدت مع نفسي وفكرت ولقيت ان جايز تكون ظروفك صعبه فعملتي القصة دي كلها عشان تاخدي قرشين .. ع العموم عدي عليا بكره هتلاقي مع الامن بره ظرف فيه ١٠٠ الف جنيه .. مبلغ طول عمرك ما تحلمي بيه ولا تعرفي تعديه .. خديه ومش عاوزه اشوف وشك تاني وانسي انك جيتيني او قابلتيني قبل كدا .. اتفقنا ؟
شربات بسخريه .. هو فعلا مبلغ كبير ومغري وعمري ما كنت احلم بيه زي ما بتقولي وكمان فعلا معرفش اعده لأني متعلمتش زيك .. لكن المبلغ دا وزعيه رحمه ونور علي روح ابوكي اللي هو ابويا .. انا مش جايالك اطلب حسنه انا جايه اطلب حقي في ميراث ابويا
شربات .. ابوكي مين يا جربوعة انتي !! بقي انتي يا معفنه بنت موسي الاسيوطي؟!!
شربات .. ايوا بنته غصب عنك
جيهان .. وايه دليلك ؟!!
شربات .. عقد الجواز العرفي اللي معاكي اللي بيقول ان ابوكي كان متجوز من امي
جيهان .. ولنفرض ان عقد الجواز سليم .. ايه اللي يثبت انك بنته؟!!
شربات .. ماما قالتلي كدا قبل ماتموت
جيهان بسخرية .. ماما قالتلك ؟!! وصدقتيها ؟!! روح يا شاطرة ارمي بلاكي علي حد تاني
شربات .. دا اخر كلام عندك؟!!
جيهان .. ايوا
شربات .. خلاص يبقي بيني وبينك المحكمة وهناك في مليون طريقة ممكن اثبت بيها اني بنت موسي الاسيوطي وان ليا في ميراثة زي ما ليكي بالظبط
جيهان .. اعلي ما في خيلك اركبيه .. بس عاوزاكي تعرفي ان لسة متخلقتش اللي تقف قصاد جيهان موسي انا ممكن امسحك من علي وش الدنيا واخلي الدبان الازرق ميعرفلكيش طريق .. فكري في موضوع القرشين دول وخديهم واحمدي ربنا وروحي سددي ديونك حتي علي الاقل تعرفي تروحي بيتك بدال ما انتي خايفة تروحي لا يقفشوكي
شربات .. اها .. انتي عملتي عني تحريات !! كنت متوقعة تعملي كدا
جيهان .. معنديش وقت اضيعه معاكي وعقلك في راسك وانتي حرة ..ثم تغلق الخط وتمر الايام وتفاجأ جيهان بحضور مُحضر الي الفيلا ومعه اعلان بدعوي قضائية من شربات تطلب فيها اثبات نسبها للمرحوم موسي الاسيوطي فيشتد غيظ جيهان وتتصل بشوكت
جيهان .. الو .. فينك يا شوكت ؟
شوكت .. في الشركة
جيهان .. تعالالي البيت حالا
شوكت .. اجي ازاي دا انا مستني الوفد الياباني والمفروض سعتك تكوني موجودة في الشركة دلوقتي
جيهان .. يتحرق الوفد الياباني .. اسمع الكلام وسيب اللي في ايدك وتعالالي البيت حالا
شوكت .. حاضر يا ست الكل مسافة السكة .. اكيد في مصيبة ؟!!
جيهان .. لما تيجي هتعرف .. سلام
ثم تغلق الخط وتحادث نفسها قائلة
جيهان .. ماشي يا جربوعة يا مقشفة ان ما جبت مناخيرك الارض وعرفتك قيمتك مبقاش انا جيهان هانم الاسيوطي ..
الاحداث اشتعلت تابعوني والبارت الرابع من الرواية .. تحياتي الكاتب والسيناريست المصري محمد مالك.
تعليقات
إرسال تعليق