رواية لغز لا يقبل الحل
البارت الثاني
للكاتب المصري محمد مالك
جميع الحقوق محفوظةوتأتي سيارة الاسعاف وتحمل السيدة المتوفاه الي المستشفي وتذهب معهما عواطف التي تحمل الطفلة الرضيعة علي يديها وهي في غاية الحزن علي وفاة تلك السيدة وان تلك الرضيعة اصبحت يتيمة الام من قبل ان تراها ولكنها حكمة الله عز وجل وهناك تم تفتيش حقيبة السيدة فلم يعثروا علي اي شئ يثبت هويتها ويأتي احد المسئولين بالمستشفي ليسأل عواطف ..
المسئول .. هو حضرتك تعرفي المتوفيه ؟!!
عواطف .. لا معرفهاش دي كانت راكبة جمبي في الاتوبيس
المسئول .. اصل ملقناش حاجة في شنطتها تقول هي مين ولا ساكنه فين !! هي مكنش معاها موبيل ولا أيه ؟!!
عواطف .. انا مشفتش موبيل في ايديها .. جايز يكون كانت حطاه في الشنطة
المسئول .. مفيش حاجة في الشنطة !! طب هنوصل لأهلها ازاي ؟!
عواطف .. هي اتوفت بأيه ؟!!
المسئول .. تقريبا هبوط حاد في الدورة الدموية
عواطف .. والبنت اخبارها ايه ؟
المسئول .. قصدك البيبي ؟
عواطف .. اها
المسئول .. دا ولد مش بنت !!
عواطف .. لا بنت طبعا
المسئول .. بقول لحضرتك ولد مش بنت
عواطف .. الست ولدت قدام عنيا وانا اللي رفعت المولود من علي الارض وكانت بنت
المسئول .. يا سيتي ولد مش بنت .. اللي انتي كنتي شايلاه علي ايدك وجيتي بيه هنا كان ولد مش بنت
عواطف .. مش معقول ؟!! انا متأكدة انها بنت
المسئول .. جايز متكونيش اخدتي بالك
عواطف .. طب هو عامل ايه دلوقتي ؟!!
المسئول .. كويس الحمد لله .. سابوه جوه الحضّانه شوية .. المهم احنا دلوقتي عايزين نوصل لأهل الست دي .. طب مقالتلكيش هي مين وساكنه فين ؟؟!!
عواطف .. لا .. بس هي قالت وانا بتكلم معاها .. انها قعدت فتره متحملش فقامت واحدة جارتها اسمها هنديه وديتها عند شيخ عملها حجاب
المسئول .. هي ركبت منين ؟؟
عواطف .. من دوران شبرا
المسئول .. ممكن تكون ساكنه هناك !! يبقي احنا لو صلنا ل هنديه جارتها يبقي اكيد هنعرف مين اهلها ..
عواطف .. انا ممكن اروح هناك واسأل عادي
المسئول .. وانتي ذنبك في القصة دي .. انتي كتر خيرك لحد كدا
عواطف .. انا كل اللي صعبان عليا الطفل الصغير دا اللي اتحرم من امه
المسئول .. ع العموم لو سألتي وقدرتي توصلي لأهلها يبقي كتر خيرك واحنا من ناحيتنا هنعمل نشرة ع الفيسبوك ويارب نوصل لأهلها عشان حتي يستلموها ويدفنوها بسرعة .. دا اكرام الميت دفنه
عواطف .. ان شاء الله هنوصل لأهلها لأكيد
وتذهب عواطف لتسأل عن منزل هنديه وبعد عناء تصل اليه وهي تسكن في منزل قديم جدا رائحته من الداخل قذرة جدا وتدخل عواطف الي داخل المنزل وتشاهد في المدخل وعلي السلالم قاذورات وقطط سوداء كثيره جدا منتشره في كل مكان تتغذي علي تلك القاذورات وعندما تصل الي باب شقة هنديه تتعثر قدمها في كلب اسود نافق امام شقة هنديه ويبدوا انه انثي .. عواطف يصيبها الفزع وترجع الي الوراء ثم تجد بعد ذلك مجموعة من الجراء الصغيره لونها اسود وعددهم خمسة خرجت من غرفة مفتوحه ليس لها باب وتجمعت بجوار بعضهم في صف واحد واخذوا ينظرون الي عواطف والي الكلبه النافقة ثم يهرعون نحوها بسرعة ويجرون تلك الكلبة بأسنانهم الي داخل تلك الحجرة وعواطف تراقب ذلك بكل دهشة واستنكار .. ثم تطرق باب الشقة وبعد عدة طرقات تفتح الباب سيدة عجوز ظهرها محني شعرها منكوش وبه بياض في معظمه .. حواجبها كثيفة وتوجد نقطه حمراء في جبهتها مثل الهنود .. وتنظر الي عواطف في غضب شديد وعواطف تخاف من رؤيتها بهذا الشكل
عواطف.. انتي الست هندية ؟!
هندية .. ايوا انا الست نيلة .. عايزة ايه ؟!!
عواطف خائفه وترتجف .. انا مش عاوزة حاجة خالص .. انا بس كنت عايزة اسألك انتي تعرفي الست دي
ثم تعرض عليها صورتها في المحمول وهندية تقترب من المحمول جدا لكي تري الصورة فيبدوا ان نظرها ضعيف جدا
هندية بعد ان تري الصورة وتعرف صاحبتها .. دي دلال !! ماتت .. صح ؟!!
عواطف .. ايوا ماتت .. بس انتي عرفتي ازاي ؟!!
هندية .. هي نفسها عرفة انها كانت هتموت ومع ذلك صممت تحمل !! فين العيل اللي ولدته ؟!!
عواطف .. هما الاتنين في المستشفي دلوقتي .. بس الولد تعبان جدا وفي الحضّانه
هندية .. ولد !! متقوليش ولد
عواطف .. بس هي ولدت ولد فعلا !!
هندية .. قلتلك متقوليش ولد .. انتي شفتيها بنت بس هما قالولك ولد !!
عواطف .. ايوا فعلا انا شفتها بنت بس قالولي في المستشفي انها ولد !! بس انتي عرفتي الكلام دا منين ؟!
هندية .. عرفت وخلاص .. بس يكون في علمك دا لا ولد ولا بنت حتي !!
عواطف .. امال هيكون ايه يعني ؟!!
هندية .. دي حاجة كدا ملهاش ملامح !!
عواطف .. يعني ايه ؟!! مش فاهمه ؟!!
هندية .. هههههههه .. ولا انا وحياتك .. هاتي من الاخر عاوزة ايه انا مش فاضيالك
عواطف .. انا عاوزه اعرّف اهلها انها اتوفت عشان حد يروح يستلم جثتها والبيبي
هندية .. محدش هيروح يستلم حاجة
عواطف .. ازاي يعني ؟!! حضرتك بلغي اهلها او قليلي بيتهم فين وانا ابلغهم بنفسي
هندية .. دلال معندهاش اهل ولا بيت !!
عواطف .. امال ساكنه فين ؟!! وفين جوزها اصلا
هندية .. ساكنه في الاوضة اللي جمبي دي( وتقصد الاوضة التي دخلت فيها الكلاب منذ قليل ) وجوزها محدش يعرف مين هو !!
عواطف .. ازاي جارتك ومتعرفيش مين جوزها ؟!! طب هو بيشتغل ايه ولا فينه دلوقتي عشان ابلغة ؟!!
عواطف .. قلتلك محدش يعرف مين هو ؟! ولو عاوزة تقابلية هي دي اوضته استنيه لو حبيتي
عواطف .. طب هو هيرجع امتي ؟!!
هندية .. هو ما ماشاش عشان يرجع !!
عواطف .. يعني هو قاعد في الاوضة دلوقتي ؟!!
هندية .. هو مش موجود اصلا !!
عواطف .. انتي بتخرفي تقولي ايه ؟!!
هنديه بغضب .. امشي .. امشي
ثم تعلق الباب بقوة في وجهها وعواطف في حيره من امرها وبعد تفكير قررت ان تدخل تلك الغرفة وهنا كانت الصدمة ..
الرواية مختلفة تماما فكره واحداث جديدة ومثيرة تابعوني علي مدونتي ( مدونة مالك الزعيم ) .. تحياتي الكاتب والسيناريست المصري محمد مالك.
فين نهايه ذئب في الكواليس انا زهقت
ردحذف